ރަންމެޑަލް ހޯދުމުން ޕެންޝަނާއެކު ބޮޑު އިނާމެއް

ފްރާންސްގައި މިހާރު ކުރިއަށްދާ އޮލިމްޕިކްސްއިން ރަންމެޑަލް ހާސިލްކުރުމުން ސާބިއާގެ ޓެނިސް ކުޅުންތެރިޔާ ނޮވަކް ޖޮކޮވިޗަށް ޕެންޝަނާއެކު ބޮޑު އިނާމެއް ދޭން ނިންމައިފި އެވެ.

އުމުރުން 37 އަހަރުގެ ޖޮކޮވިޗް އަކީ ދުނިޔޭގެ އެންމެ މޮޅު އެއް ޓެނިސް ކުޅުންތެރިޔާ އެވެ. އޭނާ އަށް މިހާތަނަށް ނުލިބި އޮތް ހަމައެކަނި މުބާރާތަކީ އޮލިމްޕިކްސް ކުޅިވަރު މުބާރާތުގެ ރަންމެޑަލް އެވެ. ނަމަވެސް ސްޕޭނުގެ ކާލޮސް އަލްކަރާޒް ބަލިކޮށް، މިކަން ނިމުމަކަށް ގެނައުމާއެކު ޖޮކޮވިޗް ވެފައިވަނީ ޓެނިހުގެ ހުރިހާ މުބާރާތެއް ހާސިލްކުރި ފަސް ވަނަ ކުޅުންތެރިޔާ އަށެވެ. މީގެ ކުރިން މި ކާމިޔާބީ ހާސިލްކޮށްފައިވަނީ އޭނާގެ އެންމެ ބޮޑު ވާދަވެރިޔާ ސްޕޭނުގެ ރަފޭލް ނަޑާލް އާއި އަންހެން ކުޅުންތެރިޔާ ސެރީނާ ވިލިއަމްސް އާއި ކުރީގެ އެއްވަނަ ކުޅުންތެރިން ކަމަށްވާ އަންދްރޭ އަގާސީ އާއި ސްޓެފީ ގްރާފެވެ.

ޖޮކޮވިޗް މި ފަހަރު ހޯދި ރަންމެޑައްޔަކީ ސާބިއާ އަށް މި މުބާރާތުން ލިބުނު ދެ ވަނަ މެޑަލް އެވެ. އަދި މިއީ 2006ގައި މިނިވަން ގައުމަކަށްވި ފަހުން ސާބިއާ އަށް އޮލިމްޕިކްސްގައި ލިބުނު 10 ވަނަ މެޑަލްވެސްމެ އެވެ.

މިކަމުގެ އިނާމެއްގެ ގޮތުން ސާބިއާއިން ނިންމާފައިވަނީ އޭނާ އަށް ޕެންޝަން ދިނުމަށެވެ. ނަމަވެސް ޕެންޝަން ފައިސާ ލިބެން ފަށާނީ އޭނާގެ އުމުރުން 40 އަހަރު ފުރުމުންނެވެ. މީގެ އިތުރުން ރަންމެޑަލް ހޯދުމުން އިނާމެއްގެ ގޮތުގައި 218000 ޑޮލަރު ލިބޭނެ އެވެ. ސާބިއާ އަކީ މި ފަހަރުގެ އޮލިމްޕިކްސްގައި ރަންމެޑަލް ހޯދާ އެތްލީޓުންނަށް އެންމެ ގިނަ ފައިސާ ދޭން ނިންމާފައިވާ އެއް ގައުމެވެ.