ކާރު ޓޯ ކުރުމާ ދެކޮޅަށް ކުރި މުޒާހަރާ: މި ސަރުކާރުން ޓެކްސީ ޚިދުމަތް ކުރިއެރުވުމަށް އެއްވެސް ކަމެއް ކޮށްދީފައިނުވޭ، ކުރަނީ ޖެއްސުން
މި ސަރުކާރަށް 8 މަސްވެގެން ދިޔައިރު ފެނުނީ ޕާކު ކުރާނެ ޖާގަ ނުދައްކާ، ވެހިކަލްތައް ޓޯ ކުރާ މަންޒަރު
ކާރު ޓޯ ކުރުމާ ދެކޮޅަށް ކުރި މުޒާހަރާގެ ތެރެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގަންނަވާ ޓެކްސީ ޚިދުމަތަށް ފުޅާކޮށް ކުރިއެރުވުމަށް އެއްވެސް ކަމެއް ކޮށްދީފައިނުވާ ކަމަށާއި، މަސައްކަތް ކުރަނީ މިސިނާއަތް ހަލާކުކޮށްލުމަށް ކަމަށް ބައެއް ޑްރައިވަރުން ބުނެފިއެވެ.
ކާރު ޓޯ ކުރުމާ ދެކޮޅަށް ޓެކްސީ ބައެއް ޑްރައިވަރުން ދަނީ ސިލްސިލާ މުޒާހަރާތަކެއް ކުރަމުންނެވެ. ހޮނިހިރު ދުވަހުގެ ރޭ ވެސް އާޓިފިޝަލް ބީޗް ސަރަހައްދުގައި ވަނީ މުޒާހަރާ ކުރިއަށް ގެންގޮސްފައެވެ.
މި މުޒާހަރާގެ ބައިވެރިން ބުނެފައިވަނީ ރައީސް މުއިއްޒު ވެރިކަމަށް ވަޑައިގެންނެވުމަށް ޒުވާނުންނާއި، ޓެކްސީ ޑްރައިވަރުންނަށް ވަރަށް ގިނަ ގޮތްގޮތުން ލުއިތައް ލިބޭނެ ކަމަށް ވިދާޅުވެ ވައުދުވެވަޑައިގެންނެވި ކަމަށެވެ. އެގޮތުން ޕާކު ކުރާނެ ޖާގައާއި، ލުއި ގޮތަށް ލޯނު ލިބޭނެ ކަމަށް ވިދާޅުވި ކަމަށެވެ.
ނަމަވެސް ވެރިކަމަށް ވަޑައިގަންނަވާ ސަރުކާރަށް 8 މަސްވެގެން ދިޔައިރު ފެނުނީ ޕާކު ކުރާނެ ޖާގަ ނުދައްކާ، ވެހިކަލްތައް ޓޯ ކުރާ މަންޒަރު ކަމަށާއި، ޓެކްސީތައް ރަޖިސްޓްރީ ކުރުމުގެ ފުރުސަތު ވެސް ބަންދުކޮށްފައިވާ ކަމަށް އެމީހުން ބުނެއެވެ.
މީގެ އިތުރުން މުޒާހަރާގައި ބައިވެރިވި ޑްރައިވަރުން ޓެކްސީ ވިޔަފާރިއަށް ސަރުކާރުން ވަންނަމުންދާ ކަމަށާއި، މަސައްކަތް ކުރަނީ މި ސިނާއަތް ވެސް ހަލާކުކޮށްލުމަށް ކަމަށެވެ. ގިނަ އަދަދެއްގެ ވެހިކަލްތައް ޓޯ ކޮށްފައިވާއިރު، ވެހިކަލްތަކަށް ގެއްލުން ލިބޭ ކަމަށާއި، މިއީ ރައްޔިތުންގެ މުދަލަށް ގަސްތުގައި ގެއްލުން ދިނުން ކަމަށް އެމީހުން ބުނެއެވެ.
ޓެކްސީގެ ޚިދުމަތްތަކަށް ބުރޫއަރުވާ ގޮތަށް ސަރުކާރުން ކުރަމުންދާ އަމަލުތައް ހުއްޓާލުމަށް މުޒާހަރާގެ ބައިވެރިން ވަނީ ގޮވާލާފައެވެ. އަދި މި މައްސަލަތަކަށް ހައްލު ލިބެންދެން މުޒާހަރާ ކުރާނެ ކަމަށް މުޒާހަރާ ކުރާނެ ކަމަށް ޑްރައިވަރުން ބުނެއެވެ.
