ކާވާ ނޭޝަންސް ލީގުގައި ރާއްޖޭގެ ގައުމީ އަންހެން ވޮލީބޯޅަ ޓީމް އިންޑިޔާ އަތުން ބަލިވުމަކީ މައްސަލައެއް ނޫން ކަމަށާއި, ކުޅުމާމެދު ހިތްހަމަ ޖެހޭ ކަމަށް ކޯޗު ސޮފްވާން އަހުމަދު ބުނެފިއެވެ.

ނޭޕާލްގައި ކުރިއަށްދާ މުބާރާތުގައި ރާއްޖެ ކުޅުނު ފުރަތަމަ މެޗުގައި އިންޑިޔާ އަތުން ބަލިވީ ސީދާ ތިން ސެޓުންނެވެ. މެޗުގެ ސެޓްތައް އިންޑިޔާއިން ގެންދިޔައީ 25-05, 25-11 އަދި 25-10 ނެވެ. މުބާރާތަށް ރާއްޖެއިން ދިޔައީވެސް މޮޅެއް ހޯދޭނެކަމަށް ދެކިގެން ނޫނެވެ. އޭގެ ބަދަލުގައި މިއަހަރު އޮންނަ ކާވާ ޗެލެންޖް ކަޕަށް ތައްޔާރުވާން ބޭނުންކުރާ މުބާރާތެއްގެ ގޮތުގައެވެ. ފުރަތަމަ މެޗުގައި އިންޑިޔާއާ ދެކޮޅަށް ރާއްޖޭގެ ޓީމް ނިކުތީ މުހިއްމު ދެ ކުޅުންތެރިން ކަމަށްވާ ހައްވާ ރާޝިދާއާއި އައިޝަތު މާޖިދާ ނުލައެވެ. އެއީ ފަށާ ހައެއްގައި ގަވާއިދުން ހިމެނޭ ރާއްޖޭގެ އެޓޭކްގެ މުހިއްމު ދެ ކުޅުންތެރިންނެވެ. އެކަމަކު އެދެކުޅުންތެރިން މިވަގުތު ތިބީ ކާވާ ބީޗް ވޮލީބޯޅަ މުބާރާތުގައި ވާދަކުރަން ބޫޓާންގައެވެ. ރާއްޖޭގެ ދެވަނަ މެޗަށް އެދެކުޅުންތެރިންގެ އިތުރުން އަރީޝާވެސް ޓީމާ ގުޅޭނެއެވެ.

އިންޑިޔާ އަތުން ބަލިވި މެޗަށްފަހު ކޯޗު ސޮފްވާން އެންމެ ބޮޑަށް ފާހަގަކުރީވެސް އެދެކުޅުންތެރިން ނެތުމުގެ އުނިކަމެވެ. އޭނާ ބުނީ ސްކޯ އިތުރުކުރަން ޓީމަށް ބޭނުންވާ ދެކުޅުންތެރިން މިއަދު މަދުކަމަށެވެ. އޭގެއިތުރުން ކޯޗު ފާހަގަކުރީ ޓީމްގެ ގިނަ ޕޮއިންޓްތައް ހޯދީ އެންމެ ކުޅުންތެރިއެއް ކަމެވެ. އެއީ މިދިޔަ މަހު ނިމުނު ކާވާ 20 އަހަރުން ދަށުގެ މުބާރާތުގައި މޮޅަށް ކުޅުނު މާޔާ އެވެ. ޓީމްގައި ތިބި ކުޅުންތެރިންގެ ތެރެއިން އެންމެ ރަނގަޅު އެއް ކުޅުންތެރިޔާ ޝަހާ ޝާމިންގެ ނިންމުންތައް އިންޑިޔާ މެޗުގައި އެހާ ރަނގަޅު ނޫންކަމަށާއި, އިތުބާރުގެ މައްސަލަ ފާހަގަ ކުރެވުނު ކަމަށް ސޮފްވާން ބުންޏެވެ. އެކަން ރަނގަޅުކުރަން ޝަހާ އަށް އެހީތެރިވެދީ, ކުރިއަށްހުރި މެޗުތައް އިތުރަށް ރަނގަޅު ކުރާނެ ކަމަށް ކޯޗު ބުންޏެވެ. ޕީއެސްއެމް ސްޕޯރޓްއާ ވާހަކަދައްކަމުން ކޯޗު ސޮފްވާން ބުނީ އިސްކޮޅުން ދިގު ކުޅުންތެރިން ތިބި, ވަރުގަދަ އިންޑިޔާއާ ދެކޮޅަށް ރާއްޖޭގެ ފަރާތުން ރަނގަޅު ކުޅުމެއް ފެނުނު ކަމަށެވެ. ކުޅުންތެރިންނަށް އިތުބާރު ހޯދައިދީގެން ކުރިއަށް އޮތް މެޗު ރަނގަޅު ކުރެވޭނެ ކަމަށް ޒުވާން ކުޅުންތެރިންތަކެއް އުފެއްދި ކޯޗު ބުންޏެވެ.

ރާއްޖެ ދެން މުބާރާތުގައި ވާދަކުރާނީ އިރާނާއެވެ. މީގެއިތުރުން ހިމެނެނީ ސްރީލަންކާއާއި ނޭޕާލެވެ.