މި ސަރުކާރުން ފާޅުގައި ދޮގު ހަދަމުން ދަނީ ރައްޔިތުން ސިޔާސީ ނިޒާމާމެދު ފޫހިކޮށްލުމަށް: މެންބަރު މީކާއީލް
މި ނިޒާމާމެދު ރައްޔިތުން ފޫހިކޮށްލުމުގެ ވަރަށް ރޭވުންތެރިކަމާމެދު ހަރަކާތްތަކެއް ހިންގާ
އެމްޑީޕީ ހަރުގެ ޖަލްސާގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ފާޅުގައި ދޮގު ހަދަމުން ދަނީ ރައްޔިތުން ސިޔާސީ ނިޒާމާމެދު ފޫހިކޮށްލުމަށް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ހަރުގެ ޖަލްސާގައި މެންބަރު މީކާއީލް ވިދާޅުވީ ރައްޔިތުން މަޖިލީހުގެ އިންތިޚާބަށްފަހު ރާއްޖެ މިހާރު އޮތީ ނުރައްކާތެރި ހާލަތެއްގައި ކަމަށެވެ. މިސަރުކާރުގެ އަނިޔާވެރިކަން މި 8 މަސް ދުވަހުގެ ތެރޭގައި ނުފެނުނު ނަމަވެސް އެމަންޒަރު އަދި ފެންނާނެ ކަމަށް މެންބަރު މީކާއީލް ވިދާޅުވިއެވެ.
މެންބަރު މީކާއީލް ވިދާޅުވީ ރާއްޖޭގެ ސިޔާސީ ކަންކަމާއި ސިޔާސީ ޕާޓީތަކާ އަދި ސަރުކާރު ހިނގާ މި ނިޒާމާމެދު ރައްޔިތުން ފޫހިކޮށްލުމުގެ ވަރަށް ރޭވުންތެރިކަމާމެދު ހަރަކާތްތަކެއް ހިންގާ ކަމަށާއި، ޕީއެންސީގެ ހަރުގެ ޖަލްސާތަކުން އެކަން ސާބިތުވާ ކަމަށެވެ. އެއީ ރާއްޖޭގެ ސިޔާސީ މަސްރަހުގައި ކަޅާ ހުދުން ސާފުކޮށް ފެންނަން ހުންނަ ކަންކަމުގައި ފާޅުކަން ބޮޑު ގޮތެއްގައި ދޮގު ހަދާ މަންޒަރު ފެންނަ ކަމަށާއި، އެއީ ރައްޔިތުން ސިޔާސީ ނިޒާމާމެދު ފޫކޮށްލުމަށް ކުރާ ކަމެއް ކަމަށް މެންބަރު މީކާއީލް ވިދާޅުވިއެވެ. އަދި ވިދާޅުވީ ރާއްޖޭގެ ވެރިކަމަށް މިހައި ބޮޑަށް ދޮގު ހަދާ ސަރުކާރެއް ނާންނަ ކަމަށެވެ.
ރައީސް މުއިއްޒު ހައްދަވާފައިވާ ދޮގުތަކަށް އަލިއަޅުއްވާލައްވައި މެންބަރު މީކާއީލް ވިދާޅުވީ ވެރިކަމަށް ވަޑައިގެންނެވުމަށް ކުރީ ސަރުކާރުން ދީފައިވާ ފްލެޓާއި، ގޯތިތައް ދިންތާކުން ދެއްވާނެ ކަމަށް ވިދާޅުވި ނަމަވެސް އެކަން ވެސް އޮޅުވާލާފައިވާ ކަމަށެވެ. އޮކްޓޫބަރު މަހުގެ ތެރޭގައި ފުލެޓުތައް ދޫކުރާނެ ކަމަށް މިސަރުކާރުން ބުނި ނަމަވެސް އެ ބުނާ އޮކްޓޫބަރު މަސް ނާންނާނެ ކަމަށް މެންބަރު މީކާއީލް ވިދާޅުވިއެވެ. ޑޮލަރު ރޭޓް ދަށް ކުރާނެ ކަމަށް ވިދާޅުވި ނަމަވެސް މިހާރު ފެނިގެންދަނީ ކޮވިޑް-19ގެ ދަތިހާލުގައި ވެސް ޑޮލަރު ރޭޓު މައްޗަށް ނާރާ މިންވަރަށް ޑޮލަރު ރޭޓް މައްޗަށް އަރާ މަންޒަރު ކަމަށް މެންބަރު މީކާއީލް ވިދާޅުވިއެވެ. އަދި ވިދާޅުވީ ވަޒީފާއިން ބިރު ނުދައްކާނެ ކަމަށް މިސަރުކާރުން ބުނި ނަމަވެސް އެމްޑީޕީގެ ޕޯޑިއަމްގައި ޤުރުއާން ކިޔަވައިދިނީތީ އެޗްޑީސީގައި މަސައްކަތް ކުރި މުވައްޒަފެއް ވަޒީފާއިން ވަކިކޮށްފައިވާ ކަމަށެވެ.
މެންބަރު މީކާއީލް ވިދާޅުވީ ރައްޔިތުން ސިޔާސީ ނިޒާމަށް ފޫހިވާ މިންވަރަކަށް ސަރުކާރަށް ވައްކަން ކުރަން ފަސޭހަވާ ކަމަށާއި، ސަރުކާރަށް އެހެން ނާޖާއިޒް ފާއިދާތައް ހޯދަން ފަސޭހަވާ ކަމަށެވެ. އަދި މިކަންކަމަށް ފުރުސަތު ނުދިނުމަށް މެންބަރު މީކާއީލް ގޮވާލެއްވިއެވެ.
