އިޒްރޭލުން ލުބުނާންގެ ވެރިރަށް ބެއިރޫތަށް އަންގާރަ ދުވަހު ދިން ހަމަލާގައި ހަމާސް އިސް ކޮމާންޑަރަކު ޝަހީދުވެއްޖެ ކަމަށް އެ ޖަމާއަތުން ބުނެފިއެވެ.
ބެއިރޫތުގެ ދެކުނުގެ ސަރަހައްދެއްގައި ހުންނަ ހިޒްބުﷲ ގެ މަރުކަޒަކަށް ޑްރޯން ބޭނުން ކޮށްގެން ދިން ތިން މިސައިލް ހަމަލާ އަކީ ހިޒްބުﷲ ގެ ކޮމާންޑަރަކަށް އަމާޒު ކޮށް ދިން ހަމަލާ އެއް ކަމަށް އިޒްރޭލުން ބުނެފައިވެއެވެ.
އިޒްރޭލުން ހާމަ ކޮށްފައިވަނީ ހަމަލާ އަމާޒު ކުރި ކޮމާންޑަރަކީ އިޒްރޭލުން ހިފާފައިވާ ގޯލާން ހައިޓްސް އަށް ހޮނިހިރު ދުވަހު ދިން ހަމަލާގައި އިސް ދައުރެއް އަދާ ކުރި ފަރާތް ކަމަށެވެ.
ހޮނިހިރު ދުވަހުގެ ހަމަލާ އިޒްރޭލުން ހިޒްބުﷲ ގެ ބޮލުގައި އެޅުވި ނަމަވެސް އެ ޖަމާއަތުން ބުނެފައިވަނީ ހިޒްބުﷲ އާ ހަމަލާއާ ގުޅުމެއް ނެތް ކަމުގައެވެ.
އަންގާރަ ދުވަހުގެ ރޭ އިރާކޮޅު ބެއިރޫތަށް ދިން ހަމަލާގައި އިޒްރޭލުން ޓާގެޓް ކުރި ހިޒްބުﷲ ގެ ކޮމާންޑަރ މުހްސިން ޝުކޫރު ހަމަލާއިން ސަލާމަތްވި ކަމަށް އޭއެފްޕީ އާއި ރޮއިޓާސް އިން ކުރިން ބުނި ނަމަވެސް ބުދަ ދުވަހު ހިޒްބުﷲ އިން ވަނީ އޭނާ މި ހަމަލާގައި ޝަހީދުވެއްޖެ ކަމަށް ބުނެފައެވެ.
މުހުސިން ޝުކޫރު އަށް ފުއާދު ޝުކޫރު ގެ ނަމުންވެސް މުޚާތަބް ކުރޭވޭ ކަމަށް މީޑިއާ ރިޕޯޓްތައް ބުނެއެވެ.
އޭނާ އަކީ ހިޒްބުﷲ ގެ އަސްކަރީ ބައިގެ އެންމެ އިސް އެއް ފަރާތް ކަމަށާއި އަދި ހިޒްބުﷲ ގެ ލީޑަރު ހަސަން ނަސްރުﷲ ގެ މުޝީރެއް ކަމަށް ވެސް ޚަބަރުތައް ބުނެއެވެ.
ފުއާދު ޝުކޫރަކީ އެމެރިކާ އިން ހޯދަން ބޭނުންވާ އަދި އޭނާ އާ ބެހޭ މައުލޫމާތު ދޭ ފަރާތަކަށް 5 މިލިއަން ޑޮލަރު ހުށަހަޅާފައިވާ ފަރާތެކެވެ. އެމެރިކާ އިން ބުނެފައިވަނީ ބެއިރޫތުގައި ހުރި އެމެރިކާގެ މެރިން ބެރެކްސް އަށް 1983 ވަނަ އަހަރު ދިން ހަމަލާ ގައި އިސް ދައުރެއް އަދާ ކުރީ ފުއާދު ޝުކޫރު ކަމަށެވެ. އެ ހަމަލާގައި 241 އެމެރިކާ ސިފައިން މަރުވެފައިވެއެވެ.
ރިޕޯޓްތައް ބުނާ ގޮތުގައި ހިޒްބުﷲ ގެ ޝޫރާ ކައުންސިލް ހުންނަ އާންމުން ދިރިއުޅޭ ބައިބޯ ހިސާބަކަށް އިޒްރޭލުން ދިން މިހަމަލާގައި އާންމުންގެ ހަތަރު މީހުން މަރުވެފައިވެއެވެ. އޭގެ ތެރޭގައި ހިމެނެނީ އެއްބަނޑު އެއްބަފާ ކުޑަ ދެކުދިންނާއި ދެ އަންހެނުން ކަމަށް ލުބުނާންގެ ސިއްހަތާ ބެހޭ ވުޒާރާއިން ބުނެފައިވެއެވެ. އިޒްރޭލުގެ މި ހަމަލާގައި ގިނަ ބަޔަކު ވަނީ ޒަޚަމްވެފައެވެ.
