ސަރުކާރުން "ރީޕްރިއޮރަޓައިޒް”ކޮށް، "ރޭޝަނަލައިޒް" ކޮށްގެން މަޝްރޫއުތަކަށް އެންމެ ފަހުން މިވީ ގޮތެއް ނޭގުނު

އެމްޓީސީސީއާ ހަވާލު ކޮށްފައިވާ މަޝްރޫއުތަކުގެ ތެރެއިން އަމަލީ މަސައްކަތް ފަށާފައިވާ އެއްވެސް މަޝްރޫއެއް މަޑުޖައްސާނުލާނެ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

އެހެން ނަމަވެސް މިނިސްޓަރ ވިދާޅުވީ، ސޮއިކޮށް ޢަމަލީ މަސައްކަތް ނުފެށިވާ މަޝްރޫޢުތައް މިވަގުތައް ނުފަށައި ޢަމަލީ މަސައްކަތް ފެށިފައިވާ މަޝްރޫޢުތައް ނިންމުމަށް އިސްކަން ދިނުމަށް ސަރުކާރުން ނިންމާފައިވާ ކަމަށެވެ.

އެ ގޮތައް ނިންމި މައިގަނޑު ސަބަބެއް ކަމަށް މިނިސްޓަރ ވިދާޅުވީ "މަޝްރޫޢުތައް ކުރިއަށް ގެންދަން ބޭނުންވާ މިންވަރަށް ފާސްކޮށްފައިވާ 2024 ގެ ބަޖެޓުގައި ފައިސާ ހިމަނާފައިނުވުން،" ކަމުގައެވެ.

މިނިސްޓަރ މިހެން ވިދާޅުވެފައިވާއިރު 30 ޖުލައި 2024 ގެ ތާރީޚްގައި ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީން އެމްޓީސީސީ އަށް ފޮނުވާފައިވާ ސިޓީ ގައި މަޝްރޫއުތައް މަޑުޖައްސާލަން އެންގީ ދައުލަތުގެ އާމްދަނީ އިތުރުކޮށް ޚަރަދުތައް ކުޑަކުރުމަށް އަޅަން ހަމަ ޖެހިފައިވާ ފިޔަވަޅު ތަކުގެ ތެރެއިން ކަމަށް ވަނީ ބުނެފައެވެ.

އެސިޓީގައި މަޑުޖައްސާލަން ނިންމި މަޝްރޫއުތަކަކީ އަމަލީ މަސައްކަތް މިހާތަނަށް ފަށާފައި ނުވާ މަޝްރޫއުތައް ކަމަށް ބުނެފައެއް ނުވެއެވެ. އޭގެ ބަދަލުގައި ސިޓީގައި ބުނެފައިވަނީ، ޚަރަދު ތައް ކުޑަ ކުރުމުގެ ގޮތުން ކުރިއަށް ގެންދާނެ މަޝްރޫއުތައް ކަނޑައަޅާފައި ވަނީ "ރީޕްރިއޮރަޓައިޒްކޮށް، "ރޭޝަނަލައިޒް" ކޮށް މަސައްކަތްތައް ކުރިއަށް ގެންދަން އެކުލަވާލައިވާ ޕްލޭނެއްގެ ދަށުން ކަމުގައެވެ.

ދިވެހި ގައުމިއްޔަތަށާއި ދިވެހި ބަހަށް އިސްކަންދޭ ކަމަށް ބުނާ ސަރުކާރުން އެމްޓީސީސީ އަށް ފޮނުވާފައިވާ ސިޓީ ގައި މަޝްރޫއުތަކަށް އަލަށް އަމަލު ކުރުމަށް ނިންމި ގޮތް ހާމަ ކުރަން ބޭނުން ކޮށްފައިވާ އިނގިރޭސި ދެ ލަފްޒުގެ މާނަ އަށް ވިސްނާލުމުން، މިހާރު ހަވާލު ކޮށްފައިވާ މަޝްރޫއުތަކަށް މިނިސްޓްރީން ގަބޫލު ކުރާ ހަމައަކަށް އިސްކަން ދޭނެ ތަރުތީބެއް އަލުން ކަނޑައަޅާފައިވާ ކަން ދޭހަވެއެވެ.

މިނިސްޓްރީން އެމްޓީސީއަށް ފޮނުވި ސިޓީ ނިންމާލަމުން ބުނެފައިވަނީ، މިނިސްޓްރީން ލިސްޓްގައި ހިމަނާފައިވާ މަޝްރޫއު ތަކުގެ މަސައްކަތްތައް މިނިސްޓްރީން ވަކި އެއްޗެއް އަންގަންދެން ވަގުތީ ގޮތުން ކުރިއަށް ނުގެންގޮސް މަޑު ޖައްސާލުމަށް އަންގާ ކަމުގައެވެ.

މަޝްރޫއުތައް މަޑު ޖައްސާލާ ސަބަބެއް ކަމަށް 2024 ވަނަ އަހަރުގެ ބަޖެޓުގައި އެކަށީގެންވާ ވަރަށް ފައިސާ ނެތުން ކަމަށް މިނިސްޓަރ ވިދާޅުވާއިރު، ބަޖެޓްގައި އެއްގޮތަކަށް ނެތް މަޝްރޫއުތައްވެސް މި ސަރުކާރުން ކުރިއަށް ގެންގޮސްފައިވާކަން ފާހަގަ ކުރެވެއެވެ.