ރަސްމާލެ ދެވުނީ ގޯސްކޮށް ކަމަށް ރައީސް މުއިއްޒު ލުއިކޮށް ވިދާޅުވާއިރު، އެކަމުގެ ހަގީގަތް ރައްޔިތުންނަށް އެނގެން ޖެހޭ - ރައީސް ޔާމީން
ދުވަހަކުވެސް ސަރުކާރަކުން ކޮރަޕްޝަން ފިލުވާލަން ނުކުރާ ވަރަށް މަސައްކަތް ކުރައްވާނެކަމަށް ވިދާޅުވާއިރު، ކިހިނެއްތޯ އެހާ ލުއިލުއިކޮށް އެވާހަކަ ވިދާޅުވީ
ކުރީގެ ރައީސް އަބްދުﷲ ޔާމީން ޕީއެންއެފް ޖަލްސާގައި ވަހަކަފުޅުދައްކަވަނީ
ރައްޔިތުންގެ ބޯހިޔާވަހިކަމާއި ގުޅިފައިވާ އަދި މި ސަރުކާރުގެ އެންމެ ބޮޑު ޕްރޮޖެކްޓްކަމަށް ބުނާ ރަސްމާލެ މަޝްރޫއު ރާޖޫއަށް ދެވުނީ ގޯސްކޮށް ކަމަށް ރައީސް ޑރ. މުހައްމަދު މުއިއްޒު ލުއިކޮށް ވިދާޅުވާއިރު، އެކަމުގެ ހަގީގަތް ރައްޔިތުންނަށް އެނގެން ޖެހޭ ކަމަށާއި، އެކަމުގައި ކޮރަޕްޝަން ހިމެނޭކަމަށް ގަބޫލުކުރައްވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފް އޮފީހުގައި ކުރިއަށްދިޔަ ޖަލްސާފައި ރައީސް ޔާމީން ވިދާޅުވީ ރާޖުއަށް ރަސްމާލެ ދެވިފައި އޮތީ ރަނގަޅަށް ނޫން ކަމަށް ރައީސް ޑރ. މުހައްމަދު މުއިއްޒު އަމިއްލަފުޅަށް އިއުތިރާފުވެވަޑައިގަންނަވާ ކަމަށެވެ. އަދި ރާއްޖޭގައި ދުވަހަކުވެސް ސަރުކާރަކުން ކޮރަޕްޝަން ފިލުވާލަން މަސައްކަތް ނުކުރާ ވަރަށް މަސައްކަތް ކުރައްވާނެ ކަމަށް ވިދާޅުވެފައިވާ ކަމަށެވެ. އަދި ރަސްމާލެ މަޝްރޫއަކީ ހައްސާސީ މައްސަލައަކަށްވެފައި އެތަން ދެވިފައިވަނީ ރަނގަޅަށް ނޫން ކަމަށް ރައިސް މުއިއްޒު ވަރަށް ލުއިގޮތަކަށް ވިދާޅުވެފައިވާ ކަމަށެވެ.
އަދި ރަނގަޅަށް އެކަން ނުދާކަމަށް ވިދާޅުވާއިރު، އެކަން ރައްޔިތުންނަށް ތަފްސީލު ނުކޮށްދެއްވަނީ ކީއްވެގެންތޯ ރައީސް ޔާމީން ސުވާލު އުފެއްދެވިއެވެ. އަދި ސަރުކާރަކަށް އެވަރުގެ ބޮޑު ބްލަންޑަރެއް ހެދިގެން ނުވާނެ ކަމަށާއި، އެތަން ހަވާލުކުރި ރާޖޫއަތުން ގެންދިޔަ އެއްޗަކަށް ބަދަލު ހޯދަށް އޭނާ ކޯޓަށް ގޮސްފައިވާ ކަމަށެވެ.
ރައީސް ޔާމީން ވިދާޅުވީ ހެދުނު ގޯސް ރައީސް މުއިއްޒަށް ކިޔައިނުދެއްވިގެން އުޅެނީ ކީއްވެގެންތޯއާއި، އެކަމުގައި ކޮރަޕްޝަން ހުރިކަމަށް ގަބޫލުކުރައްވާ ކަމަށް ވިދާޅުވެފައެވެ.
ރަސްމާލެ މަޝްރޫއާއި ގުޅޭގޮތުން އެސީސީއަށް ވަނީ ރައީސް މުއިއްޒާއި ދެކޮޅަށް މައްސަލައެއް ވައްދާފައެވެ. އެ މައްސަލައިގެ ކޭސް ނަންބަރެއްވެސް ވަނީ ދީފައެވެ. އަދި މިނިވަން ދުވަހުގެ ޖަލްސާގައި ރައީސް މުއިއްޒު ވަނީ ރަސްމާލެ މަޝްރޫއު ކުރިން ހިނގިގޮތަށް ކަމު ނުގޮސްގެން އެ އެގްރީމެންޓް ބާތިލްކޮށް، އެއްވެސް ފަރާތަކަށް ބިމެއް ދޭން ނުޖެހޭ ގޮތަށް މަޝްރޫއު ހިންގަން ނިންމާފައިވާ ކަމަށް ވިދާޅުވެފައެވެ.
ނަމަވެސް ރަސްމާލެ ހިއްކުމުގެ ބަދަލުގައި ހުޅުމާލެ ފޭސް 2ން ވަނީ އެ ބިން ހިއްކަން ހަވާލުކުރި ރާޖޫއަށް ބިންދީފައެވެ.
