މަޤާމުން އިސްތިއުފާ ދިނީ ވަޒީފާގެ މަސްއޫލިއްޔަތެއް ނެތި ބޮޑު މުސާރައެއް ނަގަން ބޭނުން ނުވާތީ: މާނިއު
25 ޖުލައި 2024 | ބުރާސްފަތި 08:42ކޮމިޝަނަރުގެ މަޤާމުން ކުއްލި ގޮތަކަށް ވަކި ކުރެއްވުމުން ހައިރާންކަމެއް ލިބިލެއްވި
މާނިއު ކަސްޓަމްސްގެ ސީޖީއަކަށް އައްޔަންކުރެއްވި ދުވަހު ފަތްކޮޅު އަރުވަނީ
ސްޓޭޓް މިނިސްޓަރު ކަމުގެ މަޤާމުން އިސްތިއުފާ ދެއްވީ ވަޒީފާގެ މަސްއޫލިއްޔަތެއް ނެތި ބޮޑު މުސާރައެއް ނަންގަވަން ބޭނުން ނުވާތީކަމަށް ކުރީގެ ކޮމިޝަނަރ ޖެނެރަލް އޮފް ކަސްޓަމްސް އަދި ހޯމް މިނިސްޓްރީގެ ސްޓޭޓް މިނިސްޓަރަކަށް ފަހުން ބަދަލުކުރެއްވި ޔޫސުފް މާނިއު މުހައްމަދު ވިދާޅުވެއްޖެއެވެ.
ކޮމިޝަނަރ ޖެނެރަލް އޮފް ކަސްޓަމްގެ މަގާމަށް މާނިއު އައްޔަންކުރެއްވީ 20 ނޮވެމްބަރު 2023 ގައެވެ. މި މަޤާމަށް ޔޫސުފް މާނިޢު މުޙައްމަދު އައްޔަނު ކުރައްވާފައިވަނީ ސްޓޭޓް މިނިސްޓަރ ފެންވަރުގައެވެ. ނަމަވެސް ދާދި ފަހުން މަޖިލީހުގެ ކޮމިޓީގައި މާނިއު ދެއްކި ބައެއް ވާހަކަތަކަށް އާންމުންގެ ފާޑުކިއުންތައް އަމާޒުވެ، ކަސްޓަމްސްއިން އަމަލުކުރަމުން އަންނަ ބައެއް އުސޫލުތަކަށް ބަދަލު ގެންނަވާ ވާހަކަ ދެއްކެވި ފަހުން މާނިއު ވަނީ ކުއްލި ގޮތަކަށް އެ މަގާމުން ވަކިކުރައްވާފައެވެ.
އަދި މާނިއު އައްޔަންކުރެއްވީ ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރުކަމުގެ މަގާމަށެވެ. މާނިއު ކަސްޓަމްސްއިން ވަކިކުރި ސަބަބެއް ސަރުކާރުން ހާމައެއް ނުކުރެއެވެ. ސަރުކާރުން ބުނެފައިވަނީ މާނިއު ކަސްޓަމްސްގެ ސީޖީކަމުން ވަކިކޮށް ހޯމްލޭންޑަށް ބަދަލުކުރެއްވީ ރައީސްއަށް ލިބިވަޑައިގަންނަވާ ބާރުގެ ދަށުން ކަމަށެވެ. އޭނާ ބަދަލުކުރެއްވީ 22 ޖުލައިގައެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން މާނިއު ވިދާޅުވީ، ކޮމިޝަނަރުގެ މަޤާމުން ކުއްލި ގޮތަކަށް ވަކި ކުރެއްވުމުން ހައިރާންކަމެއް ލިބިލެއްވި ކަމަށާއި، އެ ބަދަލު ގެންނެވީ އެއްވެސް ވަރަކަށް މަޝްވަރާ ކުރުމެއް ނެތި ކަމަށެވެ.
އޭގެ އިތުރުން، ހޯމް މިނިސްޓްރީގައި މިހާރުވެސް 6 ވަރަކަށް ސްޓޭޓް މިނިސްޓަރުން ތިއްބަވާއިރު، އެހައި ގިނަ ސްޓޭޓް މިނިސްޓަރުން ކުރައްވަން މަސައްކަތްތައްވެސް ނުހުންނާނެކަން މާނިއު ފާހަގަ ކުރެއްވިއެވެ.
މާނިއު ވިދާޅުވީ އިސްތިއުފާ ދެއްވީވެސް އެ ސަބަބާހުރެ ކަމަށެވެ. އެގޮތުން އިސްތިއުފާ ދެއްވީ މަޤާމުގެ މުސާރަ "ޙަލާލުވާ މިންވަރުގެ" މަސްއޫލިއްޔަތުތަކެއް ނެތުމުންކަމަށް މާނިއު ވިދާޅުވިއެވެ.
ވަކިން ޚާއްސަކޮށް ސަރުކާރުގެ ވިސްނުމަކީ ހަރަދުކުޑަކުރުން ކަމަށްވާއިރު، 20،000 ރުފިޔާގެ މުސާރައެއްދީގެން ކުރެވެން އޮތް މަސައްކަތެއް ކުރަން 45،000 ރުފިޔާ ދީފައި ސްޓޭޓް މިނިސްޓަރުންތަކެއް އައްޔަން ކުރުން އެއީ އެއީ ޒަމީރު ޤަބޫލު ކުރައްވާކަމެއް ނޫންކަމަށްވެސް މާނިއު ވިދާޅުވިއެވެ.
