ރަޖިސްޓްރީނުކޮށް ގިނަ ދުވަސްތަކެއް ވަންދެން ހުޅުމާލޭގައި ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ފުލުހުން ފަށައިފިއެވެ.

ހުޅުމާލެ ފޭސް-1 އަދި ހުޅުމާލެ ފޭސް-2 ގައި ގިނަ އަދަދެއްގެ ކާރުތަކާއި، ޕިކަޕުތައް ވަނީ ޕާކުކޮށްފައެވެ. ބޮޑެތި މަގުތަކުގެ ދެފަޅީގައި ކާރުތައް ޕާކުކޮށްފައި ހުރުމުގެ ސަބަބުން މަގުތައް ހަނިވެ، އެކަމުގެ ސަބަބުން ހިނގާ މީހުންނާއި، ދުއްވާ މީހުންނަށް ވަނީ އުދަނގޫތައް ކުރިމަތިވެފައެވެ. ޕާކުކޮށްފައި ހުންނަ ވެހިކަލްތަކުގެ ތެރޭގައި ރަޖިސްޓްރީ ނުކުރާ ވެހިކަލްއާއި، ހަލާކުވެ ގިނަ ދުވަސްވެފައިވާ ވެހިކަލްތައް ހިމެނެއެވެ.

މިމައްސަލަ ބޮޑުވުމާއި ގުޅިގެން ފުލުހުން ބުނީ ރަޖިސްޓްރީނުކޮށް ގިނަ ދުވަސްތަކެއް ވަންދެން ހުޅުމާލޭގައި ޕާކުކޮށްފައިހުރި އުޅަނދުތައް ނެގުމުގެ މަސައްކަތް ހުޅުމާލޭ ޓްރެފިކް ޕޮލިސް ޑިޕާޓްމަންޓުން ފަށާފައިވާ ކަމަށެވެ.

މިމަހުގެ 22 ވަނަ ދުވަހު ވެހިކަލްތައް ނެގުމުގެ މަސައްކަތް ފަށާފައިވާއިރު، ފުލުހުން ބުނީ ހުޅުމާލޭގެ އެކި ސަރަހައްދުތަކުން ހަތަރު ފުރޮޅުލީ 10 އުޅަނދު މިހާރު ނަގާފައިވެއެވެ. އަދި ކުރިއަށް އޮތްތަނުގައި ވެސް، ރަޖިސްޓްރީނުކޮށް ހުޅުމާލޭގެ މަގުތަކުގައި ޕާކުކޮށްފައި ހުންނަ އުޅަނދުތައް ނެގުމާއި އުޅަނދު ރަޖިސްޓްރީކޮށްފައިވަނީ ގަވާއިދާ އެއްގޮތަށްތޯ ބެލުމުގެ މަސައްކަތްކުރަމުން ގެންދާނެ ކަމަށް ފުލުހުން ބުނެއެވެ.

ފުލުހުން ބުނީ މަގުމަތީގެ ސަލާމަތާއި ރައްކާތެރިކަން ކަށަވަރުކޮށް މަގުތަކަކީ އެންމެނަށް އަމާން ރައްކާތެރި ތަނަކަށް ހެދުމަށް ކުރަމުންދާ މި މަސައްކަތްތަކުގެ ތެރެއިން، ސައްހަ ނޫން ރަޖިސްޓްރީ ހަދައިގެން ދުއްވާ އުޅަނދުތައް ހޯދައި ފިޔަވަޅުއެޅުމުގެ ކަންކަން ވެސް ކުރަމުން ގެންދާނެއެވެ.