ޚާން ޔޫނިސްގެ އިރުމަތީ ހިސާބުތަކަށް ޔަހޫދީ ސިފައިން ގޮތެއް ފޮތެއް ނެތި ދެމުންދާ ހަމަލާ ތަކުގައި މަދުވެގެން 57 މީހުން މަރުވެފައިވާ ކަމަށް ގާޒާގެ ސިއްހީ އޮފިޝަލުން ހާމަކޮށްފި ކަމަށް އަލް ޖަޒީރާ އިން ބުނެފިއެވެ.
ބަރު ހަތިޔާރާ އެކު އެ ސަރަހައްދަށް އަރާ ޔަހޫދީ ސިފައިން ފަލަސްތީން މީހުން މަރަމުން ދާއިރު މި ސަރަހައްދަކީ އިޒްރޭލުން ކުރިން ރައްކައުތެރި ސަރަހައްދެއްގެ ގޮތުގައި ކަނޑައަޅާފައިވާ ޒޯން އެކެވެ.
ޔަހޫދީ ސިފައިންގެ ހަމަލާ ތަކުގައި މިހާތަނަށް 172 މީހުން ޒަޚަމްވެފައިވާ ކަމަށާއި، ޒަޚަމްވެފައިވާ މީހުން ނާސިރު ހޮސްޕިޓަލަށް ގެންނަމުން ދާއިރު އެމީހުންގެ ހަށިތަކުން ފައިބާ ލެއިން ހޮސްޕިޓަލު ތެރެ ކޯރު ހެދިފައިވާ ކަމަށް މެޑިކަލް އޮފިޝަލުން ބުނެފައިވާ ކަމަށް އަލް ޖަޒީރާ އިން ވަނީ ހާމަ ކޮށްފައެވެ.
ޔަހޫދީ ސިފައިން އެއްވެސް ބެލުމެއް ނެތި ހަމަލާތައް ދޭން ފެށީ އެ ސަރަހައްދުގެ ވަޒަންވެރިން އެތަން ދޫކޮށް ވަގުތުން ދިޔުމަށް އަމުރު ކުރިތާ މަދު ވަގުތު ކޮޅެއްގެ ތެރޭގައި ކަމަށްވެސް އަލް ޖަޒީރާ އިން ބުނެފައިވެއެވެ.
ޚާން ޔޫނިސްގެ އިރުމަތީ ބައިން ވަޒަންވެރިން ފައިބާގެން ދާން އެންގި އެންގުމުގައި ވަނީ އެތަނުގައި ނުގޮސް މަޑުކުރާ މީހުންނާ މެދު ޔަހޫދީ ސިފައިން އަމަލު ކުރާނީ ހަރުކަށިކޮށް ކަމުގައެވެ.
ސަރަހައްދުގެ ވަޒަންވެރިން ގޯތި ގެދޮރުން ނުކުންނަން އެންގުމުން މަދުވެގެން 400،000 މީހުން ހާލުގައި ޖެހި މަގުމަތި ވެފައިވާ ކަމަށް ފަލަސްތީނުގެ ސިވިލް ޑިފެންސް ފޯސް އިން ބުނެފައިވެއެވެ.
