ޚާން ޔޫނިސް އަށް ޔަހޫދީ ސިފައިން އަލުން ދޭން ފެށި ހަމަލާ ތަކުގައި 27 މަރު، އެތައް ބަޔަކު ޒަޚަމްވެއްޖެ

ޔަހޫދީ ސިފައިން ޚާން ޔޫނިސް އަށް އަލުން ދޭން ފެށި ހަމަލާތަކުގެ ސަބަބުން ޒަޚަމްވީ އެތައް ބަޔަކާއި، މަރުވެގެން 27 މީހެއްގެ ހަށިގަނޑު ނާސިރު މެޑިލަކް ކޮމްޕްލެކްސް އަށް ގެނެސްފައިވާ ކަމަށް އެ ހޮސްޕިޓަލް އާ ހަވާލާދީ އަލްޖަޒީރާ އިން ބުނެފިއެވެ.

ޚާން ޔޫނިސް އަށް އިޒްރޭލުން ހަމަލާ ދޭން ފެށީ ޚާން ޔޫނިސްގެ ބައެއް ސަރަހައްދު ތަކުން އެތަންތާނގެ ވަޒަންވެރިން އެތަން ދޫކޮށް ދިއުމަށް އިޒްރޭލު ސިފައިން އަމުރު ކުރިތާ މިނެޓް ކޮޅެއްގެ ތެރޭގައި ކަމަށް މީޑިއާ ރިޕޯޓްތައް ބުނެއެވެ. އިޒްރޭލުގެ މި އަމުރާއެކު ދިރިއުޅޭ ވަޒަން ދޫކޮށް ދާން މަޖުބޫރު ވުމުން 400،000 މީހުންނަށް ނޭދެވޭ އަސަރު ކުރާނެ ކަމަށް ފަލަސްތީނުގެ ސިވިލް ޑިފެންސް ފޯސް އިން ހާމަ ކޮށްފައިވެއެވެ.

ޔަހޫދީ ސިފައިން ވަނީ ބަނީ ސުހެލާ އަށް ވެސް ހަމަލާ ދީފައެވެ. ފަލަސްތީނުގެ އޮފިޝަލުން ބުނެފައިވަނީ މި ހަމަލާގައި މަދުވެގެން 16 މީހުން މަރުވެފައިވާ ކަމަށެވެ. ޚާން ޔޫނިސްގެ އިރުން އޮންނަ މި ޓައުންއަށް އެއްގަމު މަގުން ޓޭންކް ތަކުގައި ދިން ހަމަލާގެ އިތުރުން މި ސަރަހައްދަށް އިޒްރޭލުން ވަނީ ބޮންވެސް އަޅާފައެވެ.

އެމެރިކާ އަށް ކުރައްވާ ދަތުރުފުޅުގައި އުޅުއްވާ އިޒްރޭލުގެ ބޮޑު ވަޒީރު ބެންޔަމިން ނަތަންޔާހޫ ވަނީ ހުއްޓިފައިވާ ސުލްހައިގެ ވާހަކަތައް އަލުން ފަށަން އުޅޭ ކަމުގެ އިޝާރާތެއް ދެއްވާފައެވެ. އޭނާ ވިދާޅުވީ މަޝްވަރާތަކަށް އިސްރޭލުގެ ވަފްދެއް ބުރާސްފަތި ދުވަހު ފުރާނެ ކަމަށެވެ. މަޝްވަރާތައް އޮންނަނީ ކޮންތަނެއްގައި ކަމެއް ނަތަންޔާހޫ ހާމައެއް ނުކުރައްވައެވެ.

ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނު ރައްޔިތުނަށް ދެމުންދާ ހަމަލާތަކުގައި ފަލަސްތީނުން މަރުވި މީހުންގެ އަދަދު 38,989ށް އަރާފައި ވާއިރު ޒަޚަމްވި މީހުންގެ އަދަދު 89،727ށް ވަނީ އަރާފައެވެ.