އިންޓަރނެޓްގެ ޚިދުމަތާ ގުޅޭ ސަރުކާރުގެ އައު ސިޔާސަތުތައް 27 މެއި 2021 ވާ ބުރާސްފަތި ދުވަހު އިއުލާން ކުރާނެ ކަމަށް ސަރުކާރުން ބުނެފިއެވެ.
ރައީސް އޮފީހުގެ ތަރުޖަމާނު މަބްރޫކް އަޒީޒް ކުރެއްވި ޓުވީޓެއްގައި ވިދާޅުވީ އިންޓަރނެޓްގެ ޚިދުމަތާ ގުޅޭ ސަރުކާރުގެ އައު ސިޔާސަތުތައް މެއި މަހުގެ 27 ވަނަ ދުވަހުގެ ހެނދުނު 10 ޖަހާއިރު އިއުލާން ކުރާނެ ކަމަށެވެ.
ރައްޔިތުންގެ ކަންބޮޑުވުންތަކަށް ރިއާޔަތްކޮށް، އިންޓަނެޓް އަގުހެޔޮކުރުމުގެ މަސައްކަތް ސަރުކާރުން ކުރަމުން އަންނަ ކަމަށް، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވަނީ ވިދާޅުވެފައެވެ.
މިނިސްޓަރ ވަނީ ރާއްޖޭގެ ޓެލެކޮމިއުނިކޭޝަން ދާއިރާ ފެށިގެން އައި އިރާ އަޅާބަލާއިރު މިހާރު ގިނަ ކަންތައްތަކެއް ރަނގަޅުވެ ބޮޑެތި ކުރިއެރުންތަކެއް ލިބިފައިވާކަން ފާހަގަކުރައްވާފައެވެ. އެެހެންނަމަވެސް އަދިވެސް ރަނގަޅުކުރަން ޖެހޭ ގިނަ ކަންތައްތަކެއް އެބަހުރިކަން މިނިސްޓަރ ފާހަގަކުރެއްވިއެވެ. އެގޮތުން ރާއްޖެއާއި ބޭރުދުނިޔެއާއި ސަބްމެރީން ފައިބަރ އޮޕްޓިކް ކޭބަލުން ގުޅާލުމުގެ އިތުރުން، ރާއްޖޭގެ އެތެރޭގައި ވެސް މިވަނީ ފައިބަރ ނެޓްވަރކްތައް ޤާއިމުކުރެވިފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ އަދިވެސް ރަނގަޅުކުރަން ޖެހޭ ކަންތައްތައް ގިނަ ކަމަށެވެ. އެގޮތުން އިންޓަނެޓުގެ އަގާއި ފެންވަރަކީ އެކަމަކާ މެދު ރައްޔިތުންގެ އެންމެ ބޮޑު ކަންބޮޑުވުމެއް އޮތް އެއް ކަންތައް ކަމަށެވެ. އެހެންވެ އެކަމަށް ރިއާޔަތްކޮށް އިންޓަރނެޓް ޚިދުމަތުގެ އަގުތަކާއި ފެންވަރަށް ހެޔޮ ބަދަލުތަކެއް ގެނައުމުގެ މަސައްކަތް ސަރުކާރުން ކުރަމުން އަންނަ ކަމަށް ވިދާޅުވިއެވެ.
ޓެކްނޮލޮޖީ މިނިސްޓަރ ކަމަށް އަލަށް އައްޔަންކުރައްވާފައިވާ ޝައުނާ މިހެން ވިދާޅުވި އިރު، އެއީ މި ސަރުކާރުގެ ރިޔާސީ ވައުދެކެވެ. މި ސަރުކާރުގައި އެ މިނިސްޓްރީއާ އެންމެ ފުރަތަމަ ހަވާލުވެ ހުންނެވި މަލީހް ޖަމާލް ވެސް ވަނީ ތަކުރާރުކޮށް ހަމަ އެހެން ވިދާޅުވެފައެވެ. އެހެންނަމަވެސް ވެރިކަމަށް ތިން އަހަރު ވީ އިރުވެސް އެކަމުގެ އެއްވެސް އަލިމަގެއް ނުފެނި އާންމުންގެ ވަރަށް ބޮޑެތި ފާޑުކިޔުން ވަނީ އެމަނިކުފާނަށް އަމާޒުވެފައެވެ. އެންމެ ފަހުން އިތުބާރު ނެތް ކަމުގެ ވޯޓެއް ނަގައި މަގާމުން ވަކިކުރީ ވެސް އެފަދަ މައްސަލަތަކުގައެވެ.
މިނިސްޓަރ ވިދާޅުވީ ރާއްޖޭއާއި ބޭރުދުނިޔެއާއި ގުޅުވާލަދޭ އިތުރު ސަބްމެރީން ކޭބަލްތައް ކުރިމަގުގައި ޤާއިމުކުރުމަކީ ވެސް މުވާސަލާތީ ޚިދުމަތްތަކުގެ އަގުތަކާއި ފެންވަރަށް ހެޔޮބަދަލުތައް ގެނައުމަށްޓަކައި ސިޔާސަތުތަކުގެ ތެރެއިން ކުރެވެމުންދާ މަސައްކަތެއް ކަމަށެވެ. އެ ބަދަލުތަކުގެ ހެޔޮ އަސަރު ދިވެހި އިޤްތިސާދަށް ލިބި، ދިވެހިން އެދޭ ތަރައްގީ ހޯދުމަށް މަގުފަހިވެގެންދާނެ ކަމަށް ވެސް ވިދާޅުވެފައިވެއެވެ.
