ނެޓުހެޔޮ މަޝްރޫއުގެ ދަށުން އުރީދޫ ޕްރިޕެއިޑް، ޕޯސްޓްޕެއިޑް އަދި ފަސޭހަ ހޯމް ބްރޯޑްބޭންޑް ޕްލޭންތަކަށް ބޮޑެތި ބަދަލުތަކެއް ގެނެސް، 60 އިންސައްތައާ ހަމައަށް އިތުރު ޑޭޓާ ލިބޭ ޕެކޭޖްތަކެއް އުރީދޫއިން ތަޢާރަފުކޮށްފިއެވެ.

ޑިޖިޓަލް ދިވެހި ރާއްޖެއެއް ބިނާކުރުމުގެ ތަސައްވުރާއި، ސަރުކާރުގެ ނެޓުހެޔޮ މަޝްރޫއުގެ ދަށުން އުރީދޫ ޕްރީޕެއިޑް ކަސްޓަމަރުންނަށް 60 އިންސައްތައާ ހަމައަށް އިތުރު ޑޭޓާ ލިބިގެންދާއިރު، ޕޯސްޓްޕެއިޑް ކަސްޓަމަރުންނަށް ބޮޑެތި ޑޭޓާ އެލަވަންސްއާއެކު ހެޔޮ އަގުގައި މުޅިން އައު ޕެކޭޖްތަކެއް ވެސް ވަނީ ތަޢާރަފްކޮށްފައެވެ. މީގެ އިތުރުން ފަސޭހަ ހޯމް ބްރޯޑްބޭންޑް ޕްލޭންތަކަށް 25 އިންސައްތަ އިތުރު ޑޭޓާއާއެކު، ކަސްޓަމަރުންނަށް ޚާއްޞަ އޮފަރއެއްގެ ގޮތުގައި 80 އިންސައްތައާ ހަމައަށް އިތުރު ޑޭޓާ ވެސް ލިބިގެންދާނެކަމަށް އުރީދޫއިންވަނީ ބުނެފައެވެ. އިތުރުވަމުން އަންނަ ޑިޖިޓަލް ޚިދުމަތްތަކާއެކު ކަސްޓަމަރުންގެ ބަދަލުވަމުން އަންނަ ބޭނުންތަކާ އެއްގޮތްވާ ގޮތުގެ މަތިން ހެޔޮ އަގުގައި ކޮލިޓީ އިންޓަނެޓެއް ފޯރުކޮށްދިނުމަށް އުރީދޫ މޯލްޑިވްސްއިން އަބަދުވެސް މަސައްކަތްކުރާކަމަށް އެކުންފުނިން ވަނީ ބުނެފައެވެ.

އުރީދޫ ޕްރީޕެއިޑް ޕްލޭންތަކަށް 60 އިންސައްތައާ ހަމައަށް އިތުރު ޑޭޓާ ލިބިގެންދާއިރު ޕެކޭޖްތަކުގެ އަގުތައް ވަނީ 38 އިންސައްތައާ ހަމައަށް ތިރިކޮށްފައެވެ. ޕޯސްޓްޕެއިޑް ޕްލޭންތަކަށް ގެނެވުނު ބަދަލާއެކު، 30 އިންސައްތައާ ހަމައަށް އިތުރު ޑޭޓާ އެލަވަންސް ލިބިގެންދާއިރު، ޕެކޭޖްތަކުގެ އަގުތައް ވަނީ 29 އިންސައްތައާ ހިސާބަށް ތިރިކޮށްފައެވެ. ހަމަ މިއާއެކު، ސޯޝަލް މީޑިއާ އެޕްތަކުގެ ތެރެއިން ވައިބަރ، ޓްވިޓާ، ވަޓްސްއަޕް، ފޭސްބުކް، އިންސްޓަގްރާމް އަދި ޓެލެގްރާމް ބޭނުން ކުރުމަށް ޙާއްސަ ޑޭޓާ އެލަވަންސްއެއް ލިބިގެންދާނެއެވެ. މީގެ އިތުރުން ނެޓުހެޔޮ ޕޯސްޓްޕެއިޑް 600 އާއި އެއަށްވުރެ މަތީގެ ޕްލޭންތައް ގެންގުޅުއްވާ ފަރާތްތަކަށް ޑޭޓާ ރޯލްއޯވަރގެ ޚިދުމަތާއެކު، ކަސްޓަމަރުންނަށް މަސް ނިމޭއިރު ބޭނުންނުކޮށް ހުރި ރެގިއުލަރ ޑޭޓާ އޮޓަމެޓިކުން އަނެއް މަހުގެ ޑޭޓާ އެލަވަންސްއަށް އެއްވެގެންދާނެކަމަށް ވެސް އުރީދޫއިން ވަނީ ބުނެފައެވެ.

އިންޓަނެޓުގެ އަގު އަތްފޯރާފަށަށް ތިރިކުރުމަކީ މި ސަރުކާރުން ރައްޔިތުންނަށް ވެފައިވާ ވަޢުދުތަކުގެ ތެރެއިން އެއް ވަޢުދެވެ.