ޔަމަނުގެ އަސްކަރިއްޔާ އިން ތެލް އަވީވަށް ދިން ޑްރޯން ހަމަލާ އާއެކު އިޒްރޭލު ސިއްސުވާލައިފި

ޔަމަނުގެ އަސްކަރިއްޔާ އިން އިޒްރޭލުގެ ވެރިރަށް ތެލްއަވީވަށް ދިން ޑްރޯން ހަމަލާއާ އެކު އިޒްރޭލު ސިއްސުވާލައިފިއެވެ.

އިޒްރޭލުގެ އެއަރ ޑިފެންސް ސިސްޓަމް ފޫއަޅުވާލުމަށް ފަހު ހުކުރު ދުވަހު ދިން މި ހަމަލާ އަމާޒުވީ ތެލްއަވީވް ގައި ހުންނަ އެމެރިކާގެ ކޮންސިއުލޭޓް އޮފީސް ކައިރިއަށް ކަމަށް ޚަބަރުތައް ބުނެއެވެ.

ޔަމަންގެ ހޫތީންގެ އަސްކަރީ ތަރުޖަމާނު ޔަހްޔާ ސާރީ ވަނީ ތެލް އަވީވް އަށް ހަމަލާ ދިން ކަން ކަށަވަރު ކޮށްދީފައެވެ.

ޔަމަންގެ އަސްކަރިއްޔާގެ ފަރާތުން ޔަހްޔާ ސާރީ ޓީވީ މެދުވެރިކޮށް ހުކުރު ދުވަހު ދިން ބަޔާނެއްގައި ބުނެފައިވަނީ، ތެލް އަވީވް އަކީ މިހާރު ރައްކައުތެރި ސަރަހައްދެއްގެ ގޮތުގައި ނުބެލުމަށް ޔަމަންގެ އަސްކަރިއްޔާ އިން އަންގާ އިއުލާން ކުރާ ކަމަށެވެ. ޔަމަންގެ އަސްކަރިއްޔާ އިން އިތުރު ހަމަލާތައް ދޭނެ ކަމަށާއި، ތެލް އަވީވް އަކީ ޔަހޫދީން ފަލަސްތީންގެ ބިމުން ހިފާފައިވާ ސަރަހައްދެއް ކަމަށް ދެކޭތީ، ތެލް އަވީވް ގެ އެންމެ ފުނަށް ހަމަލާތައް ދޭނެ ކަމަށްވެސް ސާރީ ބުނެފައިވެއެވެ.

ސާރީ ހާމަ ކުރި ގޮތުގައި ޔަމަންގެ އަސްކަރިއްޔާ އިން ތެލް އަވީވަށް ދިން ހަމަލާގައި ބޭނުން ކުރީ ޔަފާ ނަމަކަށް ކިޔާ އަން މޭންޑް އުޅަނދެކެވެ. މިއީ މިބާވަތުގެ އުޅަނދެއް ބޭނުން ކޮށްގެން ހަމަލާ ދިން ފުރަތަމަ ފަހަރު ކަމަށްވެސް އޭނާ ބުނެފައިވެއެވެ.

ސާރީ ބުނި ގޮތުގައި މި ހަމަލާ އަކީ ފަލަސްތީން ރައްޔިތުންގެ ހައްގުގައި ދިން ހަމަލާ އެއް ކަމަށާ ހަމަލާގެ ހުރިހާ މަގްސަދެއް ވަނީ ކާމިޔާބު ކަމާ އެކު ހާސިލްވެފައި ކަމަށެވެ.

ޔަމަންގެ އަސްކަރިއްޔާ އިން އިޒްރޭލަށް ދޭ ހަމަލާތައް ކުރިއަށް ގެންދާނެ ކަމަށާއި، އެއީ ފަލަސްތީނުގެ ހިތްވަރުގަދަ ޖިހާދީންގެ ހައްގުގައި ދޭ ހަމަލާތަކެއް ކަމަށްވެސް ސާރީ ބުނެފައިވެއެވެ.

"ގާޒާ ގައި ހިންގަމުންދާ އުދުވާނުތައް ނުހުއްޓާހާ ހިނދަކު އަދި ގާޒާ ބަންދުކޮށްފައި އޮތް އޮތުން ނުނިމޭހާ ހިނދަކު އަހަރެމެންގެ އޮޕަރޭޝަން ނުހުއްޓާނަން،" ސާރީ ބުނެފައިވެއެވެ.

އަނެއްކޮޅުން އިޒްރޭލުގެ އަސްކަރިއްޔާ އިން ބުނެފައިވާ ގޮތުގައި ޑްރޯން ހަމަލާ އަށް އެއަރ ޑިފެންސް ސިސްޓަމް ހުރަސް ނޭޅީ ކީއްވެގެންތޯ ބެލުމަށް މިހާރު ވަނީ ތަހުގީގެއް ފަށާފައެވެ.

މި ހަމަލާގައި އިޒްރޭލު ރައްޔިތަކު މަރުވެ، އެތައް ބަޔަކަށް އެކި ވަރުގެ އަނިޔާ ލިބިފައިވާ ކަމަށްވެސް އިޒްރޭލުގެ އަސްކަރިއްޔާގެ ބަޔާނުގައި ބުނެފައިވެއެވެ.

އިޒްރޭލުގެ އޮފިޝަލުންނާ ހަވާލާ ދީ ބައެއް މީޑީއާ ތަކުގައި ރިޕޯޓް ކޮށްފައިވާ ގޮތުގައި ޑްރޯން ވެއްޓި ގޮވީ، އެމެރިކާގެ ކޮންސިލޭޓް އޮފީހާއި ސަތޭކަ މީޓަރެއްހާ ގާތުގައި ހުރި އިމާރާތަކަށެވެ.

މި ހަމަލާއާ އެކު އިޒްރޭލުގެ ބޮޑުވަޒީރު އެމެރިކާ އަށް ކުރައްވަން ހަމަޖެހިފައިވާ ދަތުރުފުޅު ކުއްލި ގޮތަކަށް ވަނީ ކެންސަލް ކުރައްވާފައެވެ.