ކައުންސިލަރުންނަށް ނިކަމެތިވާ ގޮތަށް ވާހަކަދެއްކުމަކީ ރައްޔިތުން ނިކަމެތިކުރުން ކަމަށް ވެސް އޭނާ ވިދާޅުވި
ނުފޫޒު ފޯރުވައިގެން ޚިދުމަތް ލިބޭ ތަނަކަށް މާލެސިޓީ ވަނީ ބަދަލުވެފައި، އެ އުސޫލު ބަދަލުކުރާނަން: މޭޔަރު އާޒިމް
މާލޭގެ މޭޔަރ އާދަމް އާޒިމް ރައީސް މުއިއްޒު އާ ބައްދަލުކުރައްވަން އެދިގެން 3 މަސް ވީއިރު ވެސް އެޕޮއިންޓްމެންޓެއް ނުލިބޭ ކަމަށް އާޒިމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އާޒިމް ވިދާޅުވީ އާއްމުންނާއި ގުޅުން ހުރި ގިނަ ކަންތައްތަކެއް މޭޔަރުގެ ހައިސިއްޔަތުން ރައީސާއި ހިއްސާކުރައްވާން ބޭނުންފުޅުވާ ކަމަށެވެ. އެހެންނަމަވެސް މޭޔަރުކަމަށް ވަޑައިގަތް ފަހުން ރައީސް މުއިއްޒު އާ ބައްދަލުކުރައްވަން އޭނާ އަށް ފުރުސަތު ލިބިފައި ނުވާ ކަމަށް އޭނާ ވިދާޅުވިއެވެ. މާލެ ސިޓީ ފަދަ ސިޓީ އެއްގެ މޭޔަރާއި ރައީސާއި ބައްދަލުކުރަން އެދި 3 މަސް ދުވަސް ވާއިރު ބައްދަލު ނުވުން އެއީ އެންމެ ރަނގަޅު ގޮތް ކަމަށް ޤަބޫލު ނުކުރައްވާ ކަމަށް އޭނާ ވިދާޅުވިއެވެ. މީގެ އިތުރުން ލާމަރުކަޒީ ނިޒާމަށް މި ސަރުކާރުން އެންމެ ރަނގަޅަށް އިޙްތިރާމްނުކުރާ ކަމަށް އޭނާ ވިދާޅުވިއެވެ. އިންތިޚާބުކޮށްފައި ތިބޭ ކައުންސިލްތަކުގެ ޚިޔާލު ހޯދުމަކީ ކަންކަން ރަނގަޅަށް ހިންގުމަށް ލިބޭ ބާރަކަށް ވާނެ ކަމަށް އޭނާ ވިދާޅުވިއެވެ. އެ ކައުންސިލަރުންނަށް ނިކަމެތިވާ ގޮތަށް ވާހަކަދެއްކުމަކީ ރައްޔިތުން ނިކަމެތިކުރުން ކަމަށް ވެސް އޭނާ ވިދާޅުވިއެވެ.
އާޒިމް ވިދާޅުވީ މިހާރު ފެނިގެން ދަނީ ކައުންސިލްތަކުގެ އަގު ވައްޓާލުމަށް މަސައްކަތްކުރާތަން ކަމަށް އާޒިމް ވިދާޅުވިއެެވެ. އާޒިމް ވަނީ ކައުންސިލްތައް ޑައުންސައިޒްކޮށް ކުޑަކުރުމާއި މެދު ދެކެވަޑައިގަންނަވާ ގޮތް ހާމަކުރައްވާފައެވެ. އެގޮތުން ކައުންސިލަރުން މަދުކުރުމަކީ އެއީ ޚަރަދުކުޑަކުރަން އެކަނިކޮށްގެންވާނެ ކަމެއް ނޫން ކަމަށް އާޒިމް ވިދާޅުވިއެވެ. ލާމަރުކަޒީ ޤާނޫނަށް ބަދަލުތަކެއް ގެންނަން ޖެހޭ ކަމަށާއި އެހެންނަމަވެސް އެކަން ކުރަން ވާނީ ވަރަށް ބޮޑަށް ދިރާސާކޮށްގެން ކަމަށް އޭނާ ވަނީ ވިދާޅުވެފައެވެ.
