އެންމެ މޮޅު ގޯލު ކީޕަރުގެ މަޤާމު މާޓިނޭޒް ދިފާއު ކޮށްފި

ދެކުނު އެމެރިކާ ސަރަހައްދުގެ ފުޓުބޯޅަ މުބާާރާތް (ކޮޕާ އެމެރިކާ)ގެ އެންމެ މޮޅު ގޯލު ކީޕަރުގެ މަޤާމު އާޖެންޓީނާގެ އެމިލިއާނޯ މާޓިނޭޒް ހޯދައިފި އެވެ.

އުމުރުން 31 އަހަރުގެ މާޓިނޭޒް ވަނީ މިއަހަރުގެ މުބާރާތުގައި އާޖެންޓީނާ އިން ކުޅުނު ހަ މެޗުގައި ވެސް އެ ޓީމު ގޯލު ބަލަހައްޓައިފަ އެވެ. މުބާރާތުގެ ކުއާޓާ ފައިނަލްގައި އާޖެންޓީނާ އިން އެކުއެޑޯއާ ދެކޮޅަށް ކުޅުނު މެޗުގެ ނަތީޖާ ނެރުމަށް ޖެހި ޕެނަލްޓީގައި މާޓިނޭޒް ވަނީ ދެ ޕެނަލްޓީ މަތަކޮށްފަ އެވެ. އެއީ އަލަން މިންޑާ އަދި އެންހެލް މެނާގެ ޕެނަލްޓީ އެވެ. އަނެއްކޮޅުން ފައިނަލްގައި ކޮލަމްބިއާއާ ދެކޮޅަށް ކުޅުނު މެޗުގައި ވެސް މާޓިނޭޒް ވަނީ މޮޅު ކުޅުމެއް ދައްކައިފަ އެވެ.

މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ އެންމެ މޮޅު ގޯލު ކީޕަރުގެ މަޤާމު މާޓިނޭޒް ހޯދާފައިވާއިރު، މީގެ ކުރިން 2021 ވަނަ އަހަރު އޮތް މުބާރާތުގެ އެންމެ މޮޅު ގޯލު ކީޕަރުގެ މަޤާމު ވެސް މާޓިނޭޒް ވަނީ ހޯދައިފަ އެވެ. އެސްޓަން ވިލާ އަށް ކުޅެމުން އަންނަ މާޓިނޭޒް އެ މުބާރާތުގައި ވިދާލިއިރު، ޖެހިގެން އައި 2022 ވަނަ އަހަރު އާޖެންޓީނާ އިން ފީފާ ވޯލްޑް ކަޕް ކާމިޔާބު ކުރުމުގައި ވެސް މާޓިނޭޒްގެ ދައުރު ބޮޑެވެ. އެ މުބާރާތުގެ މޮޅު ކީޕަރަކަށް ހޮވުނީ ވެސް މާޓިނޭޒް އެވެ.

މިފަހުން އާޖެންޓީނާ ޤައުމީ ޓީމުގައި މޮޅަށް ކުޅެމުން އަންނަ މާޓިނޭޒް ވަނީ 2022 ވަނަ އަހަރު ފީފާ އިން ހޮވި އަހަރުގެ މޮޅު ގޯލު ކީޕަރުގެ މަގާމު ވެސް ހޯދައިފަ އެވެ. އޭގެ ފަހުން 2023 ވަނަ އަހަރު އޭނާ ވަނީ ފްރާންސް ފުޓުބޯޅަ އިން އަހަރުގެ މޮޅު ގޯލު ކީޕަރަށް ދެމުން އަންނަ ޔަޝިން އެވޯޑު ހޯދައިފަ އެވެ.