ގަވާއިދާ ހިލާފަށް އުޅުނު 2013 ބިދޭސީން ޑީޕޯޓު ކޮށްލައިފި
މިބިދޭސީންގެ ތެރޭގައި ސީރިއަސް މައްސަލަތަކުގައި ހިމެނޭ މީހުން ވެސް ހިމެނޭ
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ކުރަމުންދާ މަސައްކަތުގެ ދަށުން މިހާތަނަށް 2013 ބިދޭސީން ޑީޕޯޓުކޮށްލައިފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ ބިދޭސީންގެ މައްސަލަ ހައްލުކުރުމަށް ޖޮއެންޓް ޓާކްސް ފޯސް އެކުލަވާލާ ކުރިއަށް ގެންދާ މަސައްކަތުގެ ދަށުން މިދިޔަ ހަފްތާ ތެރޭގައި ވަރަށް ފުޅާ އޮޕަރޭޝަންތަކެއް ކުރިއަށް ގެންދެވިފައިވާ ކަމަށެވެ.
ޝަމްއާން ވިދާޅުވީ 17 ނޮވެންބަރު 2023 އިން ފެށިގެން 11 ޖުލައި 2024 އާ ހަމައަށް 2013 ބިދޭސީއެއް ޑީޕޯޓު ކުރެވިފައިވާ ކަމަށެވެ. މިބިދޭސީންގެ ތެރޭގައި ސީރިއަސް މައްސަލަތަކުގައި ހިމެނޭ މީހުން ވެސް ތިބި ކަމަށް އޭނާ ވިދާޅުވިއެވެ.
މާރުކޭޓުތަކާއި، ވިޔަފާރިތަކަށް އަމާޒުކޮށް ހިންގަމުންދާ އޮޕަރޭޝަންތަކަށް އިޝާރާތް ކުރައްވައި ޝަމްއާން ވިދާޅުވީ ރެއިޑް އޮޕަރޭޝަންތަކުގައި ވެސް މިހާތަނަށް 120 ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށެވެ. އަދި މި މީހުން ވެސް ފުރުވާލުމުގެ މަސައްކަތްތައް ކުރަމުންދާ ކަމަށް ޝަމްއާން ވިދާޅުވިއެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް މަސައްކަތް ކުރަމުންދަނީ ފުލުހުން، ހޯމް މިނިސްޓްރީ، ލޭބަރ ޑިޕާޓްމަންޓް، އަދި އިމިގްރޭޝަން ގުޅިގެންނެވެ.
