އަލް-މަވާސީ ކޭމްޕަށް ބޮންއެޅި ހާދިސާގައި މަރުވެފައިވާ މީހުންގެ ހަށިތައް އަދިވެސް ހޯދަނީ

އަލް-މަވާސީ ރެފިއުޖީ ކޭމްޕަށް ޔަހޫދީ ސިފައިން ބޮން އެޅުމުގެ ސަބަބުން މަރުވި މީހުންގެ ހަށިތައް ހޯދުމުގެ މަސައްކަތް ކުރިއަށް ދާ ކަމަށާއި އަދި ވެސް އެތައް ބަޔަކު ވީ ނުވީއެއް ނޭގި ގެއްލިފައިވާ ކަމަށް ދުނިޔޭގެ ސިއްހަތު ޖަމްއިއްޔާ އިން ބުނެފިއެވެ.

މިހާތަނަށް ހާމަވެފައިވާ އަދަދު ތަކަށް ބަލާއިރު ހަމަލާގައި ފަލަސްތީނުގެ 90 މީހުން މަރުވެ އިތުރު 300 މީހުން ޒަޚަމްވެފައިވެއެވެ.

މަންޒަރު ދުށް މީހުން ބުނާ ގޮތުގައި މަރުވެފައި ތިއްބާ ފެންނަ ތުއްތު ކުދިން ފާހަގަ ކުރަން ނޭނގޭ ވަރަށް ވަނީ ކުދިކުދިވެފައި ކަމަށެވެ.

އިޒްރޭލުން މި ހަމަލާއަކީ ހަމާސްގެ މިލިޓަރީ ކޮމާންޑަރު މުހައްމަދު ދީފް މަރާލަން ދިން ހަމަލާއެއް ކަމަށް ބުނުމަށްފަހު އިޒްރޭލުގެ ބޮޑު ވަޒީރު ފަހުން ވިދާޅުވެފައިވަނީ އޭނާ މި ހަމަލާގައި މަރުވި ކަން ޔަގީން ނުކުރެވޭ ކަމަށާއި އެހެން ނަމަވެސް މަރާލަން ހަމަލާ ދެވުމަކީވެސް އިޒްރޭލަށް ފައިދާ ހުރި ކަމެއް ކަމުގައެވެ.

ފަލަސްތީނުގެ ރައްޔިތުންނަށް ވަގުތީ ހިޔަލެއްގެ ގޮތުގައި ގާއިމް ކޮށްފައިވާ މަވާސީ ކޭމްޕަށް ޔަހޫދީ ސިފައިން ހަމަލާ ދިން އިރު މިތަނަކީ ރައްކައުތެރި ތަނެއް ކަމަށް އިޒްރޭލުން އޮތީ ކަނޑައަޅާފައެވެ.

މި ހަމަލާ ވަނީ އދ އިތުރުން މެދުއިރުމަތީގެ ގައުމުތަކުން ހަރުކަށި އިބާރާތުން ކުށްވެރި ކޮށްފައެވެ.

އަނެއްކޮޅުން ޔަހޫދީ ފައުޖުތަކުން ވަނީ ގާޒާ ސިޓީގެ ޝާތީ ރެފިއުޖީ ކޭމްޕްގެ މިސްކިތަކަށް ހަމަލާދީ އެ މިސްކިތުގައި ނަމާދަށް ތިބި މީހުން ހިމެނޭ ގޮތުން 20 މީހުން މަރާލާފައެވެ.

ޔަހޫދީ ސިފައިން މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ދެމުންދާ ހަމަލާ ތަކުގައި މިހާތަނަށް 38،443 ފަލަސްތީން މީހުން ވަނީ މަރުވެފައެވެ. އޭގެ އިތުރުން ޔަހޫދީ ސިފައިންގެ ހަމަލާތަކުގައި 88،481 މީހުން ވަނީ ޒަޚަމްވެފައެވެ.