މަސްތުވާތަކެތި އެތެރެކޮށް ބޭނުންކޮށް ގެންގުޅެ އެތެކަތީގެ ވިޔަފާރިކުރުމުގެ ތުހުމުގައި 30 އަހަރުގެ ޒުވާނަކު 30 ދުވަހަށް ބަންދުކޮށްފިއެވެ.

ފުލުހުން އެދިގެން ކްރިމިނަލް ކޯޓުން ނެރުނު އަމުރުގައި ބުނެފައިވަނީ އޭނާ ބަންދުކުރަން އަމުރުކޮށްފައިވަނީ ކަސްޓޯޑިއަލް ޖަލެއްގައި ކަމަށެވެ.

މީނާގެ މައްޗަށް ތުހުމަތުކޮށްފައިވާ ކުށް މީނާ ކުރިކަމަށް ތުހުމަތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވެއެވެ. އަދި ޕޯސްޓް މެދުވެރިކޮށް އައި ޕެކޭޖެއްގައި މަސްތުވާތަކެތި ހުރިކަމަށް ޝައްކުކުރެވިގެން ހިންގުނު އޮޕަރޭޝަނެއްގައި، އެ ފޮށިގަނޑު ބަލައި އައި ފަރާތުގެ ހާޒިރުގައި ކަނޑައި ބެލިއިރު، މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވެއެވެ.

އަދި ބަލައި އައި ފަރާތުގެ އެހީތެރިކަމާއެކު ހިންގުނު ކޮންޓްރޯލް ޑެލިވަރީގައި ފޮށިގަނޑާ ހަވާލުވާން އައީ އޭނާކަމަށް އަމުރުގައި ބުނެފައިވެއެވެ. މީގެ އިތުރުން މި ދެމީހުންގެ ދެމެދުގައި ފޮށިގަނޑު ބަލައި އައުމަށް މުއާމަލާތްތަކެއް ކުރެވިފައިވާކަމަށް ސީނުގައި ތިބި ފުލުހުންގެ ބަޔާނުން އެނގެއެވެ. އަދި މީނާ އެވަގުތު ދުއްވަން އިން ސައިކަލުގެ މަޑިދަށުން މަސްތުވާއެއްޗެއް ކަމަށް ބެލެވޭ އެއްޗެއްހުރި ޖޫސްޕެޓީ ކޮތަޅެއް ފެނިފައިވެއެވެ.

އަދި މި މީހާގެ ކުޑަކަމުދާތަކެތި ޓިއެޗްސީއަށް ޕޮޒިޓިވްވެފައި ވާއިރު، ފުލުހުން ހުށަހަޅާފައިވާ މި މީހާގެ ފޯނުގެ މޮބައިލް އެކްސްޓްރެކްޝަން ރިޕޯޓުން މަސްތުވާތަކެތި ހުރި ޕެކޭޖުގައި ބަޔާންކޮށްފައިވާ ފޯނު ނަންބަރަށް ގުޅާފައިވާ ކަން އެނގޭކަމަށް ބަޔާނުގައި ބުނެފައިވެއެވެ.

ބަންދު އަމުރުގައި ބުނެފައިވަނީ މި މީހާ ބަންދުގައި ބަހައްޓަންޖެހެނީ މުޖްތަމައުގެ ސަލާމަތާއި ރައްކާތެރިކަމަށްޓަކައި ކަމަށެވެ.

ފޮށިގަނޑުން ފެނުނު މަސްތުވާތަކެތީގެ ތެރޭގައި ޓެޓްރާހައިޑްރޯ ކެނެބިލް އަދި ކެނެބިނޯލް ހިމެނެއެވެ. ބަރުދަނުގައި 311 ގްރާމް ހުރިކަމަށް ތަހުލީލު ރިޕޯޓުން އެނގެއެވެ. އަދި މިއީ އިތުރު ބަޔަކާއި ގުޅިގެން ރާއްޖެއަށް މަސްތުވާތަކެތި އެތެރެކުރުމުގެ އަމަލެއްކަމަށް ބެލެވޭ ކަންކަން ފާހަގަކުރެވޭ ކަމަށް ފުލުހުން ބުނެފައިވެއެވެ.

މީގެއިތުރުން މި މީހާ ދުއްވަން އިން ސައިކަލުގެ މަޑިދަށުން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 45 ގްރާމުގެ ޖޫސްޕެޓީ ކޮތަޅެއް ވަނީ ފެނިފައެވެ.