ސްޕޭނާއި އިނގިރޭސިވިލާތް މާދަމާ ރޭ ކުޅޭ ފައިނަލް މެޗުގައި އެންމެ ގިނަ ބައެއްގެ ސަމާލުކަން ހުއްޓިފައިވާ އެއް ކުޅުންތެރިއަކީ ސްޕޭނުގެ ޒުވާން ފޯވަޑް ލަމީން ޔަމާލަށެވެ.
ބާސެލޯނާ އަށް ކުޅެމުން އަންނަ ޔަމާލަކީ ޔޫރޯގައި ސްޕޭނުގެ އެންމެ އަލިގަދަ ތަރި އެވެ. އޭނާގެ އުމުރަކީ 16 އަހަރެވެ. އޭނާ އަށް 17 އަހަރު ފުރޭނީ ޔޫރޯ ފައިނަލް ނިމޭތާ އެއް ދުވަސް ފަހުންނެވެ. ބޮޑު ފައިނަލަކަށް ނުކުންނައިރު ކުރިމަތިވެފައިވާ ބޮޑު ސުވާލަކީ ޖަރުމަނުގެ ގާނޫނާ ހިލާފަށް ޔަމާލަށް ކުޅެން ޖެހިދާނެ މައްސަލަ އެވެ.
ޖަރުމަނުގެ ގާނޫނު ބުނާ ގޮތުން އުމުރުން 18 އަހަރު ނުވާ އެއްވެސް ކުއްޖަކު ރޭގަނޑު 9ގެ ފަހުން މަސައްކަތް ކުރުމަކީ ގާނޫނީ ކުށެކެވެ. މި ގާނޫނު މިހެން އޮތަސް ފުޓްބޯޅަ ކުޅުންތެރިންނަށް 11 ޖަހަންދެން ކުޅުމުގެ ފުރުސަތު ލިބެ އެވެ. އެކަމަކު އެއީ މެޗު ނިންމާފައި ފެންވަރައި ޓީވީ އިންޓަވިއުދީ ހުރިހާ ކަމެއް ވެސް ނިންމަންޖެހޭ އެންމެ ފަހު ވަގުތެވެ.
ސްޕޭނާއި އިނގިރޭސިން ކުޅޭ ފައިނަލް މެޗު ފަށާނީ ޖާމަނީގެ ގަޑިން 9 ޖަހާއިރު އެވެ. މެޗުގެ ނަތީޖާ ނެރެން އިތުރު ވަގުތު ކުޅެން ޖެހިއްޖެނަމަ ޔަމާލަށް ޖަރުމަނުގެ ގާނޫނާ ހިލާފު ވެވޭނެ އެވެ.
މިހެންވެ މިހާރު އުފެދިފައިވާ އެންމެ ބޮޑު ސުވާލަކީ ސްޕޭނުގެ އުއްމީދީ ކުޅުންތެރިޔާ ޔަމާލަށް 90 މިނިޓަށް ފަހު ދަނޑުމަތީގައި ބަހައްޓާނެތޯ އެވެ؟ މި ކަމާ ސުވާލު ކުރުމުން ކޯޗު ޑެލަފުއެންޓޭ ބުނީ އެކަން ނުކުރާންވީ ކީއްވެތޯ އެވެ؟
![](https://dyncz33htw1ec.cloudfront.net/posts/585b2616-1ea2-46da-a208-4f1ec0e3186e.png)
އަހަރެންނަކަށް ނުފެނޭ އެއީ މައްސަލައެއް ކަމަށް. އޭނާ އަށް ކުޅެވޭނެ. ވަކި ވަގުތެއްވުމުން އޭނާ ބޭލުމުގެ ވިސްނުމެއްނެތްސްޕޭނުގެ ކޯޗު ޑެލަފުއެންޓޭ![]()
ރޭގަނޑު 11ގެ ފަހުން ޔަމާލް ލައްވައި އެއްވެސް ކަމެއް ކުރުވައިފިނަމަ ޖަރުމަނު ގާނޫނާ ހިލާފުވުމުގެ ކުށުގައި ޔަމާލް 25000 ޔޫރޯއިން ޖޫރިމަނާ ކުރެވޭނެ އެވެ. މިއީ ޔޫރޯއަށް ސްޕޭން ޓީމު އައިއިރު ވެސް އެމީހުންނަށް އެނގޭ ކަމެކެވެ. މިހެންވެ ސްޕޭން ފުޓްބޯޅަ ފެޑަރޭޝަނުން ތިބީ މިފަދަ ކަމެއް ކުރިމަތިވިޔަސް ޖޫރިމަނާ ދައްކަން ތައްޔާރުވެގެންނެވެ. އެއަށްވުރެ އެމީހުންނަށް މުހިންމީ މުބާރާތުގެ ތައްޓެވެ.
ގްރޭޑް 10ގައި ކިޔަވަމުންދާ ޔަމާލް ސްޕޭން ޓީމާއެކު ހުއްޓަސް އޭނާ ދަނީ އޮންލައިންކޮށް ކްލާސްތަކުގައި ބައިވެރިވެ، ޓެސްޓްތައް ފުރިހަމަ ކުރަމުންނެވެ. އަދި ޔޫރޯ އަށް ފަހު އެނބުރި ސްކޫލަށް ދިއުމުގެ ބަދަލުގައި އޭނާ ފުރާނީ ޗުއްޓީ އަށެވެ.
ޔަމާލަކީ އިކުއޭޓިއަލް ގިނީގެ އަންހެނަކާއި މޮރޮކޯގެ ފިރިހެނަކު ކައިވެނިކޮށްގެން ލިބުނު ކުއްޖެކެވެ. އެ ދެމަފިރިން ސްޕޭނަށް ހިޖުރަކޮށް، ޔަމާލް އުޅެ ބޮޑުވީ ބާސެލޯނާ ނިސްބަތްވާ ކެޓަލޯނިއާގެ ކުޑަކުށަ އަވަށެއްގަ އެވެ.