ނޭޓޯގެ ބައްދަލުވުން ކުރުކޮށްލެއްވުމަށްފަހު، ބޮޑު ވަޒީރު ނިކުންނެވީ ކޭންގެ ޕެނަލްޓީ ބައްލަވަން!

އެމެރިކާގައި ކުރިއަށްދާ ނޭޓޯ ބައްދަލުވުން ކުރުކޮށްލެއްވުމަށްފަހު، އިންގްލެންޑުގެ ކެޕްޓަން ހެރީ ކޭން ޖެހި ޕެނަލްޓީ ބައްލަވާލެއްވުމަށް ބޮޑު ވަޒީރު ކެއި ސްޓާމާ ނިކުމެ ވަޑައިގެންފި އެވެ.

ބުދަ ދުވަހުގެ ރޭ ކުޅުނު ސެމީ ފައިނަލް މެޗު ފަށައިގެން ނެދަލެންޑްސް އިން ވަނީ ލަނޑު ޖަހައި ލީޑު ނަގައިފަ އެވެ. އޭގެ އިރުކޮޅެއް ފަހުން ނެދަލެންޑްސްގެ އޭރިޔާ ތެރެއިން ކެޕްޓަން ކޭން އަށް ކުރި ފައުލަކަށް ޕެނަލްޓީ ދޭން ރެފްރީ ނިންމި އެވެ. މެޗުގެ ރެފްރީ ފެލިކްސް ޒްވޭއާ، އިނގިރޭސިވިލާތަށް ޕެނަލްޓީ ދޭން ނިންމީ، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު އެވެ.

ކޭން ޕެނަލްޓީ ޖެހި މަންޒަރު ބައްލަވާލެއްވުމަށް، އިނގިރޭސި ބޮޑު ވަޒީރު ސްޓާމާ ވަނީ ނޭޓޯ ބައްދަލުވުމުގައި އިންނެވުމަށްފަހު ސްޓާމާ ވަނީ ނިކުމެ ވަޑައިގެންފަ އެވެ. އެއަށްފަހު ޓީވީއެއް ކައިރީ އިންނަވާ އެ މަންޒަރު ބެއްލެވިއިރު، ކޭން ޕެނަލްޓީ ކާމިޔާބުކޮށް ނަތީޖާ ހަމަހަމަ ކުރުމުން ސްޓާމާ ވަނީ އުފާ ފާޅު ވެސް ކުރައްވައިފަ އެވެ.

ބޮޑު ވަޒީރު ސްޓާމާ ވަނީ އެ މަންޒަރު ފެންނަ ވީޑިއޯއެއް އެމަނިކުފާނުގެ ރަސްމީ އެކްސް އެކައުންޓުގައި ވެސް ޕޯސްޓު ކުރައްވައިފަ އެވެ. އެ ވީޑިއޯ އާއެކު ސްޓާމާ ލިޔުއްވާފައި ވަނީ، ނޭޓޯގެ ބައްދަލުވުމުގައި އިންނެވުމަށްފަހު، މެޗުގެ ނަތީޖާ ބައްލަވާލެއްވުމަށް ނިކުމެ ވަޑައިގެންނެވުނީ އެންމެ ރަނގަޅު ވަގުތުގައި ކަމަށެވެ. އެ ވީޑިއޯގައި ފެންނަ ގޮތުން ސްޓާމާ އާއެކު، ނެދަލެންޑްސްގެ ބޮޑު ވަޒީރު ޑީކް ޝޫފް ވެސް އިންނެވި އެވެ.

ފަަހަތުން އަރައި ނެދަލެންޑްސްގެ މައްޗަށް އިނގިރޭސިން ކުރި ހޯދައި، ފައިނަލަށް ދިޔުމުން ބޮޑު ވަޒީރު ސްޓާމާ ވަނީ ޓީމަށް މަރުޙަބާ ވެސް ވިދާޅުވެފަ އެވެ. އިނގިރޭސިން ހޯދި މޮޅަށް ތައުރީފު ކުރައްވައި ސްޓާމާ ވިދާޅުވީ، ބާލިން އަށް އެ ޤައުމުން އަންނަ ކަމަށެވެ. މިއަހަރުގެ މުބާރާތުގައި އިނގިރޭސިން ވަނީ ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން އެއް މެޗުން މޮޅުވެފަ އެވެ. އަނެއް ދެ މެޗު ވަނީ އެއްވަރުވެފަ އެވެ. މުބާރާތުގެ ގަދަ 16 ވަނަ ބުރުގެ މެޗުގެ އިތުރުން، ކުއާޓާ ފައިނަލް އަދި ސެމީ ފައިނަލްގައި ވެސް އިނގިރޭސިން ވަނީ ފަހަތުން އަރައި ލަނޑު ޖަހައިފަ އެވެ.

ޔޫރޯ މުބާރާތުގެ ފައިނަލަށް އިނގިރޭސިލާތް ދަތުރު ކޮށްފައިވާއިރު، މިއީ މުބާާރާތުގެ ފައިނަލްގައި އިނގިރޭސިިވިލާތުން ޖެހި ޖެހިގެން ކުޅޭނެ ދެ ވަނަ ފަހަރެވެ. މީގެ ކުރިން 2021 ވަނަ އަހަރު އަމިއްލަ ޤައުމުގައި އޮތް ޔޫރޯ މުބާރާތުގެ ފައިނަލްގައި ވެސް އިނގިރޭސިވިލާތުން ވަނީ ކުޅެފަ އެވެ. އެ އަހަރުގެ ފައިނަލްގައި އިނގިރޭސިވިލާތް ވަނީ ޕެނަލްޓީ ޖަހައިގެން އިޓަލީ އަތުން ބަލިވެފަ އެވެ.

ފުޓުބޯޅައިގައި ތައްޓެއް ހޯދުމަށް މަސައްކަތް ކުރަމުން އަންނަ އިނގިރޭސިވިލާތަށް މިހާތަނަށް ކާމިޔާބު ކުރެވުނީ އެންމެ ތައްޓެކެވެ. އެއީ 1966 ވަނަ އަހަރުގެ ފީފާ ވޯލްޑް ކަޕް އެވެ. ވެސްޓް ޖާމަނީ އަތުން މޮޅުވެ، އެ އަހަރުގެ ވޯލްޑް ކަޕް ކާމިޔާބު ކުރި ފަހުން މިހާތަނަށް އިންގްލެންޑަށް އެއްވެސް މުބާރާތެއް ކާމިޔާބު ކުރެވިފައެއް ނުވެ އެވެ.