މަތީ ތައުލީމުގެ ވާހަކަ މި ސަރުކާރުން ދެއްކީމަ މިހާރު އަންނަނީ ހިނި - މީކާއިލް

މަތީ ތައުލީމުގެ ވާހަކަ މި ސަރުކާރުން ދެއްކީމަ މިހާރު އަންނަނީ ހިނި ކަމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ ސަރުކާރުގެ ފަރާތުން ހުށަހަޅުއްވާފައިވާ މަތީ ތަޢުލީމާއި ތަމްރީނުގެ ޤާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ.

އޭނާ ވަނީ އެ ބިލަކީ ވަކި މީހަކަށް ފައިދާ ވާގޮތަށް އޮތް ބިލެއް ކަމަށް ސިފަކުރައްވާފައެވެ. އަދި އަވަސް އަރުވާލައިގެން އެ ބިލް ޑްރާފްޓްކޮށް މަޖިލީހަށް ހުށަހެޅި ސަބަބާއި މެދު އޭނާ ވަނީ ސުވާލު އުފައްދަވާފައެވެ.

ސަރުކާރުގެ ޚަރަދުގައި ދީފައިވާ ސްކޮލާޝިޕްތަކާއި ސްޓޫޑެންޓު ލޯނުގެ އެހީގައި ބޭރުގައި ކިޔަވާ ދިވެހި ދަރިވަރުންނަށް ފޯރުކޮށްދޭން ޖެހޭ ފައިސާ ނުދެވި ބައެއް ދަރިވަރުން ވަރަށް ބޮޑަށް ވަނީ ހާލުގައި ޖެހިފައެވެ. ނަމަވެސް އެކަމާއި ގުޅިގެން އެމްޑީޕީގެ ފަރާތުން ހުށަހެޅި ކުއްލި މައްސަލަ ވަނީ މަޖިލީހަށް ބަލައި ނުގަނެ ބޭރުކޮށްލާފައެވެ.

އެއީ މަތީ ތައުލީމަށް އިސްކަން ދޭ ސަރުކާރަކުން ކުރާނެ ޒާތުގެ ކަމެއް ނޫން ކަމަށް މީކާއިލް ވިދާޅުވިއެވެ. މީގެ އިތުރުން މަޤާމުތަކަށް މީހުން އައްޔަންކުރާ އިރު މަތީ ތައުލީމަށް އިސްކަން ނުދޭ ކަމަށާއި އެ ކަމުގައި ސަރުކާރުގެ ސިޔާސަތު ވަރަށް ސާފުކަމަށް މީކާއިލް ވިދާޅުވިއެވެ.

މީކާއިލް ވަނީ ޚަރަދު ކުޑަ ކުރުމުގެ ނަމުގައި ދަރިވަރުންގެ ސްޓައިޕެންޑާއި ކުޅެމުންދާކަމަށް ވިދާޅުވެފައެވެ. އެހެންނަމަވެސް ސަރުކާރަށް އިސް މަޤާމުތަކަށް މީހުން އައްޔަން ކުރަމުންދާ ކަމަށާއި އެހެންކަމުން ޚަރަދު ކުޑަކުރުމުގެ ނަމުގައި ސަރުކާރުން ކުރާ ކަންކަމާއި މެދު ސުވާލު އުފެދޭ ކަމަށް އޭނާ ވިދާޅުވިއެވެ.

މީކާއިލް ވަނީ މި ބިލް ފަރުމާކޮށް މިހާ އަވަހަށް ކުރިއަށް ދަނީ ވަކި ވަކި ފަރުދުންގެ ވިޔަފާރީގެ މަސްލަހަތު ޕްރޮމޯޓް ކުރުމަށްޓަކާ ކަމަށް ފާހަގަކޮށްފައެވެ. އެހެންނަމަވެސް އިދިކޮޅު މެމްބަރުން ވަނީ އެއީ މާމިގިލީ ދާއިރާގެ މެމްބަރު ޤާސިމް އިބްރާހިމްގެ މަސްލަހަތު ހިމާޔަތްކުރުމަށް ކުރި ކަމެއްގެ ގޮތުގައި ސިފަކުރައްވާފައެވެ.