ޝަމްނާޒްގެ ބަންދަށް އިތުރު 5 ދުވަސް
މި މައްސަލަ އާއި ގުޅޭ އިތުރު ތަފްސީލް އަދިވެސް ފުލުހުން ހާމަކޮށްފައެއް ނުވޭ
ސްޓޭޓް މިނިސްޓަރު ޝަމްނާޒް
ސިހުރު ހެދިކަމުގެ ތުހުމަތުގައި ހައްޔަރުކޮށްފައިވާ އެންވަޔަރަމެންޓު މިނިސްޓްރީގެ ކުރީގެ ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމް އާއި އޭނާގެ ކޮއްކޮގެ ބަންދަށް އިތުރު ފަސް ދުވަސް ޖަހައިފިއެވެ.
އެ ދެ މީހުންގެ ބަންދަށް އިތުރު 5 ދުވަސް ޖަހާފައި ވަނީ ހޯމަ ދުވަހުއެވެ.
ކްރިމިނަލް ކޯޓުގައި އެ މީހުންގެ ބަންދާއި މެދު ގޮތެއް ނިންމުމުގެ އަޑު އެހުން ބާއްވާފައި ވަނީ ސިއްރުކޮށްގެންނެވެ.
މި މައްސަލައާ ގުޅޭގޮތުން ފުލުހުން މީގެ ކުރިން ބުނީ، ފުލުހުން ތަހުގީގު ކުރަމުންދާ މައްސަލައަކާއި ގުޅިގެން ކުރީގެ ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމް އާއި އިތުރު 2 މީހަކު ޖޫން 23 ވަނަ ދުވަހު ހައްޔަރުކޮށްފައިވާ ކަމަށާއި، އަދި މި 3 މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 7 ދުވަހަށް ބަންދުކުރުމަށް އޭރު ވަނީ އަމުރުކޮށްފައެވެ.
މި މައްސަލައިގައި ހައްޔަރު ކޮށްފައިވަނީ ޝަމްނާޒްއާއި އޭނާގެ ކޮށްކޮ ސަނާގެ އިތުރުން ސިހުރު ހެދިކަމަށް ތުހުމަތުވާ މީހާއެވެ.
ކޯޓުން މައުލޫމާތު ދޭ ގޮތުގައި ޝަމްނާޒްއާއި އޭނާގެ ކޮށްކޮ ސަނާގެ ބަންދުގެ މުއްދަތު އިތުރު 7 ދުވަހަށް އިތުރު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
އެންވަޔަރމަންޓް މިނިސްޓްރީގެ ސްޓޭޓް މިނިސްޓަރު ކަމުގެ މަޤާމުން ޝަމްނާޒް ވަކިކޮށްފައި ވަނީ ޖޫން މަހުގެ 26 ވަނަ ދުވަހުއެވެ. އަދި އޭނާ މިހާރު ހިމަނާފައި ވަނީ ކުރީގެ ސްޓޭޓް މިނިސްޓަރެއްގެ ގޮތުގައެވެ.
ސިހުރު ހެދިކަމުގެ ތުހުމަތުގައި ހައްޔަރު ކޮށްފައިވާ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް ސިހުރުހެދިކަމަށް ތުހުމަތުކޮށް، ރައީސް ޑރ.މުހައްމަދު މުއިއްޒުވެސް އަދި އެމަނިކުފާނުގެ އާއިލާ އިން ވެސް އެއްވެސް މައްސަލަ އެއް ހުށަހަޅާފައި ނުވާކަމަށް ސަރުކާރުން ބުނެއެވެ. ނަމަވެސް މިއީ ސިޔާސީ ކަމެއް ކަމަށް ބުނެ އާއްމުންނާއި ސިޔާސީ ފަރާތްތަކުން ދަނީ ސަރުކާރަށް ފާޑުކިޔަމުންނެވެ.
މި މައްސަލަ އާއި ގުޅޭ އިތުރު ތަފްސީލް އަދިވެސް ފުލުހުން ހާމަކޮށްފައެއް ނުވެއެވެ.
