ޔަހޫދީ ސިފައިންގެ ހަމަލާތަކުގެ ނުރައްކާ އިތުރުވެ ޚާން ޔޫނިސް އިން ފަލަސްތީނުގެ 7 މީހުން މަރާލައިފި

ޚާން ޔޫނިސްގެ ނާސިރު ހޮސްޕިޓަލްގެ ކައިރީގައި ހުރި ފަސް ބުރީގެ އިމާރާތަކަށް ބުދަ ދުވަހު ޔަހޫދީ ސިފައިން ހަމަލާދީ ފަލަސްތީނުގެ 7 މީހުން މަރާލައިފިއެވެ.

ޚާން ޔޫނިސް އަށް އަރައިގަނެ ޔަހޫދީ ސިފައިން ދެމުންދާ ހަމަލާ ތަކުގެ އިތުރުން އެ ތަނުގެ އިރުމަތީ ސަރަހައްދުން މީހުން އެކީ ފައިބާ ސަރަހައްދު އެކީ ހުސްކުރުމަށް ޔަހޫދީ ސިފައިން އަމުރު ކުރުމުން އެ ސަރަހައްދުން 250،000 މީހުންނަށް ވުރެ ގިނަ މީހުން ވަނީ މަޖުބޫރީ ހާލަތުގައި އެމީހުންގެ ގޯތި ގެދޮރުން ނުކުމެފައެވެ.

ޔަހޫދީ ސިފައިންގެ އަނިޔާވެރިކަން މައްޗަށް ގޮސް ގާޒާގައި އެއްވެސް މީހަކަށް ރައްކައުތެރި ކަން ނެތް ކަމަށާއި ރައްކައުތެރި ތަނެއްވެސް ނެތް ކަމަށް ފަލަސްތީނުގައި ހުންނަ ޔޫއެން އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއަރޒްގެ ވެރިޔާ އެންޑްރިއޭ ޑީ ޑޮމިނީކޯ ވަނީ ބުނެފައެވެ. ގާޒާގައި ރައްކައުތެރި ވުމަށް ވަންނާނެ ތަނެއްވެސް، އަދި ނުރައްކަލާ ކުރިމަތި ލުން ނޫން ގޮތެއްވެސް ނެތް ކަމަށް އޭނާ ބުނެފައިވާ ކަމަށް އަލްޖަޒީރާ އިން ރިޕޯޓް ކޮށްފައިވެއެވެ.

އަނެއްކޮޅުން ހަނގުރާމަ ނިމުމަކަށް ގެނެވޭތޯ އާއި އަސީރުން ބަދަލު ކުރުމާ ބެހޭ ގޮތުން ހަމާސް ގެ ވެރިޔާ އިސްމާއީލް ހަނިއްޔާ، ގަތަރާއި މިސްރުގެ އޮފިޝަލުން މެދުވެރިކޮށް މަސައްކަތް ކުރަމުންދާ ކަމަށް ޚަމާސް އިން ވަނީ ބުނެފައެވެ.

ޚަމާސް ގެ މެސެޖް އިޒްރޭލަށް ލިބިފައިވާ ކަމަށާއި، އަދި އެކަމަށް އިޒްރޭލުން ދޭ ޖަވާބެއް މެދުވެރިންނަށް ދޭނެ ކަމަށް އިޒްރޭލުގެ ޖާސޫސީ އިދާރާއިން ބުނެފައިވާ ކަމަށް އިޒްރޭލުގެ ބޮޑުވަޒީރުގެ އޮފީހުން ނެރުނު ބަޔާނެއްގައި ބުނެފައިވެއެވެ.

ހުސްވި އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ ސިޓީ އަށް ދެމުންދާ ހަމަލާތަކުގައި މިހާތަނަށް ފަލަސްތީނުން މަރުވި މީހުންގެ އަދަދު 37،953ށް ވަނީ އަރާފައެވެ. އަދި 87،266 މީހުން އިޒްރޭލުގެ ހަމަލާ ތަކުގައި ވަނީ ޒަޚަމްވެފައެވެ. ފަލަސްތީނުގެ ހަމާސް ޖަމާއަތުން އިޒްރޭލަށް ދިން ހަމަލާތަކުގައި އިޒްރޭލުން މަރުވެފައިވާ ކަމަށް ރެކޯޑް ކުރެވިފައިވަނީ 1،139 މީހުންނެވެ.