ކޮމެންޓޭޓަރަށް ރޮނާލްޑޯ ފެނުނީ ހޮޓަލުގެ ލިފްޓުން

ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއާ ބައްދަލުކުރުމަށް އެތައް ބަޔަކު ކިޔޫ ހަދަ އެވެ. މި ފަހަރުގެ ޔޫރޯގައި އޭނާ ހުންނަ ހޮޓަލުގެ ބޭރުގައި ވެސް އެތައް ބަޔަކު އޭނާ ދުށުމަށް ކިޔޫހަދައިގެން އެބަތިއްބެވެ. ޕޯޗުގަލް ޓީމުގެ ބަހުގެ އިންތިޒާރުގައި އެތައް ބަޔަކު މަގުތަކަށް ނުކުމެ އެވެ.

މިހެންވެ ރޮނާލްޑޯ ހުންނަ ހޮޓަލުގެ ސެކިއުރިޓީ ބަލަހައްޓަން އިތުރު ފުލުހުން ވެސް ނެރެންޖެހެ އެވެ.

ޖަރުމަނުގެ އާރުޓީއެލް އަދި ސްކައި ސްޕޯޓްސް އާއި ޑީން ޓީވީ އަށް މެޗުގެ ވާހަކަތައް ކިޔައިދޭ ކޮމެންޓޭޓަރު ފްލޯރިއަން ސްމިޓް ސޯމަފެލްޑް އަކީ ވެސް ރޮނާލްޑޯ ދުށުމެއް އެދޭ މީހެކެވެ. އެންމެ ފަހުން އޭނާގެ ހުވަފެން ހަގީގަތަކަށްވީ ޕޯޗުގަލް އާއި ސްލޮވީނިއާ ރޭ ބައްދަލުކުރި މެޗުގެ ކުރިން ރޮނާލްޑޯ ހުންނަ ހޮޓަލުންނެވެ.

އޭނާ ޓުވިޓާގައި ބުނެފައިވަނީ ރޮނާލްޑޯއާ ބައްދަލުވީ ލިފްޓުން ކަމަށާއި އެ ދެ މީހުންނާއެކު ވަރަށް މައްޗަށް ލިފްޓް ދަތުރުކުރި ކަމަށެވެ. އަދި އޭނާ އަށް ހުރެވުނީ ނުކުންނަން ވެސް ނޭނގިފައި ކަމަށާއި އެކަން ރޮނާލްޑޯ އަށް އެނގުނު ކަމަށެވެ. ނަމަވެސް އޭނާ ތައްޔާރުވެފައި ނެތުމުން ރޮނާލްޑޯކުރެން އެކައްޗެއް ވެސް އަހާނުލެވުނު ކަމަށެވެ.

ސޯމަފެލްޑް ބުނީ ހޮޓަލުގެ ބޭރުގައި ވެސް އެތައް ބަޔަކު ރޮނާލްޑޯ ދުށުމަށް ތިބުމުން ފުލުހުން އަޑުގަދަ ކުރާ ބޭނުންކޮށް، ޕޯޗުގަލކް ޓީމުގެ ބަހަށް ދަތުރުކުރެވޭނެ ގޮތް ހެދުމަށް މީހުން ދުރަށް ޖައްސަން ޖެހުނު ކަމަށެވެ. އަދި ރޮނާލްޑޯ މެޗަށް ދާން ބަހަށް އެރީ ވެސް އިރާކޮޅު ހަތެއްޖެހި ފަހުން ކަމަށެވެ. ހޮޓާތެރެއިން އޭނާ ފެންނަނީ ވެސް ވަރަށް މަދުން ކަމަށެވެ.

އުމުރުން 38 އަހަރުގެ ކެޕްޓަނަށް އަދި މި މުބާރާތުގައި ގޯލެއް ނުޖެހެ އެވެ. ރޭ ސްލޮވީނިއާއާ ދެކޮޅަށް ލިބުނު ޕެނަލްޓީ ވެސް ވަނީ ނާކާމިޔާބުވެފަ އެވެ. އެކަމަކު އޭނާ އުއްމީދު ކުރަނީ މުބާރާތް ނިމުމުގެ ކުރިން ޔޫރޯގައި ގޯލުޖަހާ އެންމެ ދޮށީ ކުޅުންތެރިޔާއަށް ވުމަށެވެ.