ބޮލީވިއާގެ ސިފައިން އެ ގައުމުގެ ސަރުކާރު ވައްޓާލަން ކުރި ބަޣާވާތް ނާކާމިޔާބު ވެއްޖެ
ބަޣާވާތުގެ އިސްކޮށް ހުރީ ސިފައިންގެ ވެރިޔަކަށް ހުރި ޖެނެރަލް އެވެ.
ބައެއް ރިޕޯޓްތައް ބުނާ ގޮތުގައި ހަތިޔާރު އެޅި ޓޭންކަކުން ރިޔާސީ ގަނޑުވަރުގެ ތެރެއަށް ވަދެގަތީ އެތާނގެ ދޮރު ފަޅާލާފަ
ބޮލީވިއާގެ ސިފައިން އެ ގައުމުގެ ސަރުކާރު ވައްޓާލަން ކުރި ބަޣާވާތް ނާކާމިޔާބު ވެއްޖެއެވެ.
ރިޕޯޓުތައް ބުނެފައިވަނީ، ބަޣާވާތް ކުރުމުގައި އިސްކޮށް ހުރި އަސްކަރީ ޖެނެރަލް ޚުއާން ހޮޒޭ ޒުންނިގަ ގެ ކޮމާންޑްގެ ދަށުން ބުދަ ދުވަހުގެ ހަވީރު އަސްކަރީ ޓޭންކް ތައް އައިސް ބޮލީވިއާގެ ވެރިރަށް ލޮޕާޒް ގައި ހުންނަ ރިޔާސީ ގަނޑުވަރުގެ ކަރިން މުރިލޯ ސްކުއަރ ގައި ޕޮސިޝަން ނެގި ކަމަށެވެ. ބައެއް ރިޕޯޓްތައް ބުނާ ގޮތުގައި ހަތިޔާރު އެޅި ޓޭންކަކުން ރިޔާސީ ގަނޑުވަރުގެ ތެރެއަށް ވަދެގަތީ އެތާނގެ ދޮރު ފަޅާލާފައެވެ.
އެހެން ނަމަވެސް ބަޣާވާތުގެ ޚަބަރުތައް ފެތުރެން ފެށުމާއެކު ދުނިޔޭގެ ގައުމުތަކުން، ހާއްސަކޮށް ބޮލީވިއާގެ އަވައްޓެރި ގައުމުތަކުން ބޮލީވިއާ ސިފައިންގެ އަމަލުތަކަކީ ޣައިރު ގާނޫނީ އަމަލުތަކެއް ކަމަށް ބުނެ ވާޣާވާތާ ދެކޮޅަށް ނުރުހުން ފާޅު ކުރަން ފެށުމާއެކު ޒުންނިގަ އޭނާގެ ސިފައިންނަށް އަނބުރި ދިޔުމަށް އެންގިއެވެ.
ބަޣާވާތާ ދެކޮޅު ހެދުމަށް ބޮލީވިއާގެ މަގުތަކަށް އެތައް ހާސް މީހުން އެއްވެ ވަނީ އަޑުއުފުލާފައެވެ.
ސިފައިން ގަނޑުވަރުގެ ސަރަހައްދު ދޫކޮށް ދިއުމާއެކު، ބޮލީވިއާ ގެ ރައީސް ލުއިސް އާރްސޭ ވަނީ ގައުމާ މުޚާތަބް ކުރައްވާ ވާހަކަ ފުޅު ދައްކަވަމުން، ރައްޔިތުންނަށް ޝުކުރު އަދާ ކުރައްވާފައެވެ.
ރިޔާސީ ގަނޑުވަރުން ޖެނެރަލް ޒުންނިގަ އާއި ބޮލީވިއާގެ ރައީސް ލުއިސް އާރްސޭ ކުރިމަތި ލައްވާ ވާހަކަފުޅު ދައްކަވާ މަންޒަރު ވަނީ އައްމުވެފައެވެ. އެ ފުޓޭޖުން ފެންނަ ގޮތުން، ބޮލީވިއާގެ ރައީސް ބަޣާވާތުގެ ކޮމާންޑަރަށް "އަހަންނަކީ ކަލޭގެ ކެޕްޓަން، މި އަންގަނީ ހަމަ މިހާރު ސިފައިން މިތަނުން ގެންދިއުމަށް، ބަޣާވާތަކަށް ފުރުސަތެއް ނުދޭނަން." ވިދާޅުވެއެވެ.
ރޮއިޓާސް އިން ބުނާ ގޮތުގައި ބޮލީވިއާގެ ފުލުހުން މިހާރު ވަނީ ބަޣާވާތުގެ އިސްކޮށް ކުރި ޖެނެރަލް ޒުންނިގަ ހައްޔަރު ކޮށްފައެވެ.
ބަޣާވާތުގައި އިސްކޮށް ހުރި ޒުންނިގާ އަކީ ރައީސް އާރްސޭ އެ ގައުމުގެ އަސްކަރިއްޔާގެ ވެރިއަކަށް އައްޔަން ކުރެއްވި ފަރާތެވެ. އެހެން ނަމަވެސް އަސްކަރިއްޔާގެ އެންމެ އިސް މަގާމުން މިދިޔަ އަންގާރަ ދުވަހު ރައީސް ވަނީ އޭނާ ކޮށްފައެވެ.
