ކްރޮއޭޝިއާގެ އަމާޒަކީ މޮޅު ކުޅުމެއް ދެއްކުން!

ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ފުރަތަމަ މެޗަަށް ނިކުންނައިރު، ކްރޮއޭޝިއާގެ އަމާޒަކީ މޮޅު ކުޅުމެއް މުބާރާތުގައި ދެއްކުން ކަމަށް އެ ޓީމުގެ ކޯޗު ލަޓްކޯ ޑަލިކް ބުނެފި އެވެ.

އޭނާ މިހެން ބުނީ މުބާރާތުގެ ގްރޫޕް ސްޓޭޖުގައި ކްރޮއޭޝިއާގެ ފުރަތަމަ މެޗުގައި ސްޕެއިންނާ ދެކޮޅަށް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. މިއަހަރުގެ މުބާރާތުގެ ފޭވަރިޓުންގެ ތެރޭގައި ގިނަ ބަޔަކު ދެކޭ ޓީމުތަކުގެ ތެރޭގައި ކްރޮއޭޝިއާ ނުހިމެނެ އެވެ.

ޑަލިކް ބުނީ މިފަހުން އައިސް ކްރޮއޭޝިއާ އިން ފުޓުބޯޅައިގައި ހާސިލު ކުރަމުން އަންނަ ކަންތައްތަކަކީ އާދަޔާ ޚިލާފު ކަންތައްތަކެއް ކަމަށެވެ. ޑަލިކް ބުނީ، އޭނާ ޤަބޫލު ކުރާ ގޮތުގައި އެއީ ހާސިލު ކުރަން އުނދަގޫ ކަންތައްތަކެއް ކަމަށެވެ. އެހެން ނަމަވެސް، އެންމެ ބޭނުންވާ ދިމާލަށް ނުދެވޭ ކަމުގައި ވެސް ޑަލިކް ވަނީ ބުނެފަ އެވެ.

މީގެ އިތުރުން ޑަލިކް ބުނީ ކްރޮއޭޝިއާގެ ޤާބިލުކަމާއި، ފެންވަރާމެދު ބައެއް މީހުން ސުވާލު އުފައްދާތީ އޭނާ އަށް އުނދަގޫވާ ކަމަށެވެ. އެގެ ބަދަލުގައި ޓީމުގައި ތިބި މަދު ކުޅުންތެރިންނާއި، ފެންވަރު ރަނގަޅު މަދު ކުޅުންތެރިންނާއެކު ކްރޮއޭޝިއާ އިން ހޯދަމުން އަންނަ ކާމިޔާބަށް އިހުތިރާމް ކުރަން ޖެހޭނެ ކަމަށް ޤަބޫލު ކުރާ ކަމަށް ޑަލިކް ބުންޏެވެ.

މުބާރާތުގައި ކްރޮއޭޝިއާ އޮތް ގްރޫޕާއި، މުބާރާތުގެ ފުރަތަމަ މެޗަށް އިޝާރަތްކޮށް ޑަލިކް ބުނީ، އެ ޓީމުން އަންނަނީ ދުނިޔޭގެ ފުޓުބޯޅައިގެ ބޮޑެތި ބާރުތަކާ ދެކޮޅަށް ހަނގުރާމަ ކުރަމުން ކަމަށެވެ. އެގޮތުން ކުޑަ ޤައުމަކަށް ވިޔަސް، ބޮޑެތި ކަންކަން ޙާސިލު ކުރެވޭނެ ކަމުގެ އެންމެ ފުރިހަމަ މިސާލަކީ ކްރޮއޭޝިއާ ކަމަށް ވެސް ޑަލިކް ވަނީ ބުނެފަ އެވެ. އޭނާ ބުނީ އެކަން ދައްކައި ދިނުމުގައި ކްރޮއޭޝިއާ އަކީ އެހެން މީހުންނަށް މިސާލެއް ކަމަށެވެ.

ޑަލިކް ބުނީ، ކްރޮއޭޝިއާގެ އެންމެ ބޮޑު އެއް ބާރަކީ އެ ޓީމުގެ އެއްބައިވަންތަކަން ކަމަށެވެ. އެގޮތުން 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕްގައި ކުޅުނު ގިނަ ކުޅުންތެރިން އަދިވެސް ޓީމާއެކު ތިބިކަން ޑަލިކް ފާހަގަ ކުރި އެވެ. އޭގެ އިތުރުން ބައެއް ޒުވާން ކުޅުންތެރިން ޓީމަށް އިތުރުވެއްޖެ ކަމަށާއި، ތަފާތެއް ގެނެވިދާނެކަން އެ ކުޅުންތެރިން ދައްކައިދެމުން އަންނަ ކަމަށް ވެސް ޑަލިކް ވަނީ ބުނެފަ އެވެ.

މުބާރާތުގެ ގްރޫޕް ބީ ގައި ކްރޮއޭޝިއާ އިން ސްޕެއިނާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ރާއްޖެ ގަޑިން 21:00 ގައެވެ.