ބައިނަލްއަޤުވާމީ ރަޙުމަތްތެރިކަމުގައި އަޔަލެންޑާ ދެކޮޅަށް ކުޅުނު މެޗުން ޕޯޗުގަލް މޮޅުވެއްޖެ އެވެ.

އަންގާރަ ދުވަހުގެ ރޭ އަޔަލެންޑާ ދެކޮޅަށް ޕޯޗުގަލް އިން ކުޅުނު މެޗަކީ، މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރަތަށް ތައްޔާރުވުމުގެ ގޮތުން އެ ޓީމުން ކުޅުނު ތިން ވަނަ މެޗެވެ. އޭގެ ތެރެއިން ދެ މެޗުން ޕޯޗުގަލް މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. އަޔަލެންޑާ ދެކޮޅަށް ކުޅުނު މެޗު ޕޯޗުގަލް އިން ކާމިޔާބު ކުރީ 3-0 އިންނެވެ.

މެޗުގެ ފުރަތަމަ ހާފުގައި ޕޯޗުގަލް އަށް ލީޑު ނަގައިދިނީ ޔާއޯ ފެލިކްސް އެވެ. މެޗު ފަށައިގެން 18 ވަނަ މިނެޓުގައި އޭނާ ވަނީ ލަނޑު ޖަހައި ލީޑު ނަގައިދީފަ އެވެ. މެޗުގައި ޕޯޗުގަލްގެ ފަހު ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ. އެ ދެ ލަނޑު ވެސް ޕޯޗުގަލް އަށް ޖަހައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. އެއީ މެޗުގެ 50 ވަނަ މިނެޓާއި، 60 ވަނަ މިނެޓުގައި އޭނާ ޖެހި ދެ ލަނޑެވެ.

މުބާރާތުގައި ޕޯޗުގަލް އޮތީ ގްރޫޕް އެފްގަ އެވެ. ޕޯޗުގަލް އާއެކު މި ގްރޫޕުގައި ދެން އޮތް ތިން ޓީމަކީ، ތުރުކީ، ޖޯޖިއާ އަދި ޗެކް ރިބަޕްލިކް އެވެ. މުބާރާތުގެ ފުރަތަމަ މެޗުގައި ޕޯޗުގަލް ނިކުންނާނީ ޗެކް ރިޕަބްލިކާ ދެކޮޅަށެވެ.