ރައީސް މުއިއްޒުގެ ސަރުކާރު ހިންގަނީ ޕޭޕަރުގައި، އެކްޝަނެއް ނުފެނޭ: މެންބަރު އަހުމަދު ދީދީ

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރު ހިންގަނީ ކަރުދާހުގައި ކަމަށް ރައްޔިތުން މަޖިލީހުގެ އައްޑޫ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ވިދާޅުވީ މިސާރުކާރުގެ މިހާތަނަށް ހިންގާފައިވާ ކަންކަމަށް ބަލާއިރު، ބޮޑަށް ފެނިގެންދަނީ ކަރުދާހުގައި ސަރުކާރު ހިންގާތަން ކަމަށާއި، އެކްޝަން ނުފެންނަ ކަމަށެވެ. މެންބަރު ވިދާޅުވީ އަމަލީ މަސައްކަތްތައް ނުފެނުނު ނަމަވެސް ބޮޑެތި ހެޑްލައިންތަކުން މަޝްރޫއުތައް ފަށާފައިވާ ކަމަށެވެ.

އެމްޑީޕީގެ ސަރުކާރުގައި ރާއްޖޭގައި ވަރަށް ގިނަ މަޝްރޫއުތަކެއް ފަށާފައިވާކަން ފާހަގަކުރައްވައި މެންބަރު ވިދާޅުވީ އެމަޝްރޫއުތައް މިސަރުކާރުން ހުއްޓުވާފައިވާ ކަމަށެވެ. އެ މަޝްރޫއުތައް ކުރިއަށް ކުރިއަށް ގެންދިއުމަކީ ރައްޔިތުންނަށް ފައިދާ ހުރި ގޮތްކަމުގައިވީ ނަމަވެސް މިސަރުކާރުން އެގޮތަށް އަމަލުނުކުރާ ކަމަށް އޭނާ ވިދާޅުވިއެވެ. އަދި ވިދާޅުވީ މަޝްރޫއުތައް ހުއްޓުވުމުން ދެރަ ލިބެނީ ރައްޔިތުންނަށް ކަމަށެވެ.

ސަރުުކާރުގެ ހިންގުން ދަށްވާ ސަބަބުތަކަށް އިޝާރާތް ކުރައްވައި މެންބަރު ވިދާޅުވީ މަސައްކަތް ކުރަން ތިއްބެވި ގާބިލް ބޭފުޅުންނަށް ވެސް ފުރިހަމަ މިނިވަންކަމާއެކު މަސައްކަތް ކުރުމުގެ ފުރުސަތު ނެތް ކަމަށެވެ.

މެންބަރު ވިދާޅުވީ 20 ވަނަ ރައްޔިތުން މަޖިލީހުގެ ފުރަތަމަ ޖަލްސާއިން ވަކި ގޮތަކަށް ވަކި ކަމެއް ކުރުމަށް ބޭފުޅަކު އެންގެވުމުން އެކަމަށް ބައެއް މެންބަރުން ނުރުހުންވާކަން ނުވަތަ ތާއީދުނުކުރާކަން ހާމަވަގެން ދިޔަ ކަމަށެވެ. އަދި ޕީއެންސީގެ އެތެރޭގައި މައްސަލަތައް އުޅޭކަން މިކަމުން ހާމަވާ ކަމަށާއި، ދުވަސްވާވަރަކަށް އެކަންކަން ބޭރަށް ހާމަވާނެ ކަމަށް އޭނާ ވިދާޅުވިއެވެ.

މީގެ އިތުރުން މެންބަރު ވިދާޅުވީ ސަރުކާރުގެ ސުޕަމެޖޯރިޓީއާއެކު ރައްޔިތުންގެ މަޖިލީހުގައި ރައްޔިތުންގެ އަޑު އިއްވުމަށް އުދަނގޫތައް ކުރިމަތިވާނެ ކަމަށެވެ. ނަމަވެސް އެމްޑީޕީއަކީ އަބަދުވެސް ރައްޔިތުންގެ އަޑު އިއްވާ ޕާޓީއެއް ކަމަށާއި، މަޖިލިސް ތެރޭގައި ވަރަށް ރަނގަޅަށް ރައްޔިތުންގެ ފިކުރާއި، ރައްޔިތުންގެ ޝުއޫރު އަދި އަޑު އިއްވަމުން ގެންދާނެ ކަމަށެވެ.