ރައީސް ވިދާޅުވި ގޮތަށް 8 މަސްތެރޭގައި ރަސްމާލެ ހިއްކާ ނުނިމޭނެ ކަން ސަރުކާރުން ހާމަކޮށްފި
ރަސްމާލެ ހިއްކުމުގެ މަޝްރޫއުއަކީ ރާއްޖޭގައި ބޯހިޔާވަހިކަމަށް ޚާއްސަކޮށްގެން ހިންގާ އެންމެ ބިޔަ މަޝްރޫއުކަމަށް މިނިސްޓަރ ވިދާޅުވި
ފުށިދިއްގަރު ފަޅު ހިއްކަން ފެށުމުގެ ރަސްމިއްޔާތުގެ ތެރެއިން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވެފައިވާ ގޮތަށް ކ. ފުށިދިއްގަރުފަޅު ހިއްކުމުގެ މަޝްރޫއުގެ މަސައްކަތް ފެށިތާ 8 މަސް ދުވަހުގެ ތެރޭގައި ނުނިމޭނެކަން ސަރުކާރުން ހާމަކޮށްފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އިންފްރާސްޓްރަކްޗަރު މިނިސްޓަރު ޑރ. އަބްދުﷲ މުއްތަލިބު ވަނީ ރަސްމާލެ ހިއްކުމުގެ މަޝްރޫއުއަކީ ރާއްޖޭގައި ބޯހިޔާވަހިކަމަށް ޚާއްސަކޮށްގެން ހިންގާ އެންމެ ބިޔަ މަޝްރޫއުކަމަށް ސިފަކުރައްވާފައެވެ. އެ މަޝްރޫއު އަށް މަސްދުވަހުގެ ތެރޭގައި ނިންމައިނުލެވޭނެ ކަމަށާއި، އެހެންކަމުން އެ މަޝްރޫޢު އާއި މެދު ސަރުކާރުން އެހެން ގޮތްތަކެއް ހޯދަމުންދާ ކަމަށް އެމަނިކުފާނު ވިދާޅުވިއެވެ. މީގެ ކުރިން ސަރުކާރުން ނިންމާފައި ވަނީ އެ މަޝްރޫއަށް ޚަރަދުކޮށްގެން މަސައްކަތް ކުރިއަށް ގެންދިއުމުގެ ބަދަލުގައި 70 ހެކްޓަރުގެ ބިން އެ މަސައްކަތް ކުރާ ކޮންޓްރެކްޓަރަށް ދީގެން އެ މަސައްކަތް ނިންމުމަށެވެ. އެގޮތުން ހުޅުމާލެއިން 10 ހެކްޓަރުގެ ބިމާއި ރަސްމާލެ މަޝްރޫއިން 60 ހެކްޓަރުގެ ބިން އެ މަޝްރޫޢުގެ މަސައްކަތް ކުރާ ކުންފުންޏަށް ދޭން ނިންމިއެވެ. މިނިސްޓަރު ވަނީ އެއީ ސަރުކާރަށް ލޯނު ނެގުމަކާ ނުލާ ބޮޑު ދަރަންޏެއް ނެތި އެ މަޝްރޫޢު ކުރިއަށް ގެންދެވޭނެ މަގެއް ކަމަށް ވިދާޅުވެފައެވެ.
އެގޮތަށް މަޝްރޫޢު ކުރިއަށް ގެންދިއުމަކީ ދައުލަތަށް ވަރަށް ބޮޑު ފައިދާއެއް ކުރާނެ ކަމެއް ކަމަށް މިނިސްޓަރ މުއްތަލިބް ވިދާޅުވިއެވެ. އެގޮތުން ގާތްގަނޑަކަށް 1،000 ހެކްޓަރުގެ ބިން ޖުމްލަ 70 ހެކްޓަރުގެ ބިން ދީގެން ލިބޭ ކަމަށް އެމަނިކުފާނު ވިދާޅުވިއެވެ. އެ މަސައްކަތް ލަސްވާ ސަބަބާއި ގުޅޭ ގޮތުން މިނިސްޓަރ ވިދާޅުވީ މަސައްކަތް ލަސްވަނީ ކޮންޓްރެކްޓަރ ހުށަހެޅި ގޮތާއި އެއްގޮތަށް ފައިނޭންސް ނުކުރެވޭތީ ކަމަށެވެ. ކޮންޓްރެކްޓަރ މަސައްކަތް ކުރަން ހުށަހެޅި ގޮތަށް މަސައްކަތް ކުރިއަށް ނުވާތީ ސަރުކާރުން އެހެން ގޮތްތަކެއް ހޯދަމުންދާ ކަމަށް ވެސް މިނިސްޓަރ ވިދާޅުވިއެވެ. އެ މަޝްރޫޢު ކުރިއަށް ގެންދާނީ އެންމެ ޚަރަދު ކުޑަ، އަވަހަށް މަޝްރޫޢު ނިމޭނެ ގޮތަކަށް ކަމަށް މިނިސްޓަރ ވިދާޅުވިއެވެ.
ރަސްމާލޭގެ ނަމުގައި ތަރައްޤީކުރާ ފުށިދިއްގަރު ފަޅުން 1153 ހެކްޓަރުގެ ބޮޑު ސަރަހައްދެއް ހިއްކަން ވަނީ ހަމަޖެހިފައެވެ. މި މަޝްރޫޢޫގެ މަސައްކަތް ފެށީ މިދިޔަ ޑިސެމްބަރު މަހުގެ 18ގައެވެ. ފުށިދިއްގަރުފަޅު ނުހިއްކި ދިގުލައިގެން ދާއިރު ސަރުކާރުން އެކި ފަހަރު އެ މަޝްރޫޢު އާއި މެދު ދައްކަނީ އެކި ވާހަކައެވެ. އެގޮތުން ތިމާވެއްޓަށް ގެއްލުން ލިބޭތީ މަޝްރޫޢު މަޑު ޖެހުނު ކަމަށް މީގެ ކުރިން ބުނެފައިވެއެވެ.
