އިޒްރޭލް ޕާސްޕޯޓްގައި ރާއްޖެއަށް މީހުން އެތެރެވުން މަނާނުކުރާ ސަބަބު ސަރުކާރުން ހާމަނުކޮށް، ސީދާ ޖަވާބެއް ދިނުމަށް ދެކޮޅު ހަދައިފިއެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ފަލަސްތީނު ރައްޔިތުންގެ ހައްގުގައި މިހާތަނަށް އެންމެ ބޮޑަށް އަޑު އުފުލަމުން ދަނީ ރާއްޖެއިން ކަމަށެވެ. ހީނާ ވިދާޅުވީ ޚާއްސަކޮށް ރައީސް ޑރ.މުހައްމަދު މުއިއްޒު ފަލަސްތީނުގައި ހިންގަމުންދާ އުދުވާންތައް ކުށްވެރިކޮށް ހަރުއަޑުން އެކަމާ ދެކޮޅު ހައްދަވާ ކަމަށެވެ. އަދި ސިޑްސްގައި ކުރިއަށް ގެންދިޔަ ކޮންފަރެންސްތަކުގައި ވެސް އެކަމަށް އަލިއަޅުއްވާލައްވާ ވާހަކަފުޅު ދައްކަވާފައިވާ ކަމަށް ހީނާ ވިދާޅުވިއެވެ.
ހީނާ ވިދާޅުވީ ރާއްޖޭގެ ސްޓޭންޑް ބަދަލުނުވާ ކަމަށާއި، ފަލަސްތީނުގެ މިނިވަން ދައުލަތެއް އޮތުމަށް އަބަދުވެސް ވަކާލާތު ކުރާ ކަމަށެވެ.
ޕީޖީ ލީޑަރު ވިދާޅުވި ވާހަކަފުޅަކަށް އެއީ ކީއްވެގެން ވިދާޅުވި ވާހަކަފުޅެއްކަން އެނގޭނީ ޕީޖީ ލީޑަރަށް. އެކަމަކަށް އަޅުގަނޑަށް ކޮމެންޓް ކުރަން ތަންކޮޅެއް އުދަނގޫވާނެ. އެހެން ނަމަވެސް ފަލަސްތީނުގެ ރައްޔިތުންގެ ހައްގުގައި މިހާތަނަށް ވެސް އެންމެ ބޮޑަށް ވެސް އަޑު އުފުލަމުން މިދަނީ ދިވެހިރާއްޖެއިން. އެނގިވަޑައިގަންނަވާނެ ޚާއްސަ ގޮތެއްގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސިޑްސްގައި ކުރިއަށް ދިޔަ އެސްޓޭޓްމަންޓްގެ ތެރޭގައި ވަރަށް ހަރުއަޑުފުޅުން ގޮވާލެއްވި ހަމަ ފަލަސްތީނުގައި މިހިނގަމުންދާ ކަންތައްތައް ކުށްވެރި ކުރައްވާ އަދި ހަމަ މިކަން ހުއްޓާލަންޖެހޭކަން އެމަނިކުފާނު ވަނީ ބައިނަލްއަގުވާމީ ފްލެޓްފޯމްގައި ވެސް ގޮވާލައްވާފައި. އެހެންވީމަ ފަލަސްތީނުގެ އިޝޫ އަކީ އަޅުގަނޑުމެންގެ ހުރިހާ ދިވެހި ރައްޔިތުންގެ ހިތާ އެންމެ ގާތުގައި ގުޅިފައިވާ އެންމެ މުހިންމު އެއްކަންތައް. ފަލަސްތީނުގެ މިނިވަން ދައުލަތެއް އޮތުމަށް އަޅުގަނޑުމެން މިދަނީ ހަމަ ތަކުރާރުކޮށް ވަކާލާތު ކުރަމުން.ރައީސް އޮފީހުގެ ތަރުޖަމާން ހީނާ ވަލީދު
ފަލަސްތީނުގެ ރައްޔިތުންނަށް ޒަމާނުއްސުރެ ޔަހޫދީ ދައުލަތް އިސްރާއީލުން ދެމުން އަންނަ ލާއިންސާނީ އަނިިޔާތަކާއި، އަދި މިފަހުން މިދިޔަ އަހަރުގެ އޮކްޓޯބަރު 7 ވަނަ ދުވަހު އިސްރާއިލުން ފަލަސްތީނުގެ ޣައްޒާއަށް އަރައި ނަސްލު ދޮވެލުމަށް ކުރަމުންދާ ހަނގުރާމައާއި ގުޅިގެން، އިސްރާއިލު ރައްޔިތުންނަށް ރާއްޖެ އެތެރެ ނުވެވޭ ގޮތަށް ޕާސްޕޯޓް މަނާކުރުމަށް ގޮވާލާ މަޖިލީހަށް ވަނީ ގަރާރެއް ހުށަހަޅާފައެވެ.
ނަމަވެސް ގަރާރުގެ މަސައްކަތް އެއްކޮށް ނުނިމި އޮއްވާ 19 ވަނަ މަޖިލިސް ނިމި 20 ވަނަ މަޖިލިސް ވަނީ ހުވާކޮށްފައެވެ. 20 ވަނަ މަޖިލީހުގައި ސުޕަރ މެޖޯރިޓީއާއެކު މަސައްކަތް ކުރަނީ ވެރިކަން ކުރާ ޕީއެންސީގެ މެންބަރުންނެވެ. 20 ވަނަ މަޖިލީހުގެ މެންބަރުން ހުވާކުރުމަށްފަހު މަޖިލީހުގައި ޕީއެންސީގެ ޕާލަމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި އިސްރާއިލުގެ ޕާސްޕޯޓު މަނާކުރުމުގެ މައްސަލައާ ގުޅޭގޮތުން ކުރި ސުވާލަށް ސީދާ ސާފު ޖަވާބެއް ނުދީ އެއީ ދެގައުމެއްގެ ދެމެދުގައި ހިނގަމުންދާ ދާހިލީ މައްސަލައެއްގެ ގޮތަށް ވަނީ ސިފަކޮށްފައެވެ.
ޔަހޫދީ ހަރުކަށި ދައުލަތް އިސްރާއިލުން ޣައްޒާގެ އާންމުންނަށް އަމާޒުކޮށް ދެމުންދާ ހަމަލާތަކާއި ހިންގަމުންދާ ގަތުލައާންމާއި ގުޅިގެން އިޒްރޭލު ރައްޔިތުން ރާއްޖެއައުން މަނާކޮށް، ޕާސްޕޯޓް ބޭން ކުރުމަށް ގޮވާލާ ސަރުކާރަށް ވަނީ ޕެޓިޝަނެއް ހުށަހަޅާފައެވެ. ނަމަވެސް އެ މައްސަލައިގައި މިހާތަނަށް ވެސް ސަރުކާރުން ސާފު ޖަވާބެއް ނުދެއެވެ.
