މާދެލީގައި އަޅަން ނިންމި މަސް ފެކްޓަރީ ނިލަންދޫ އަށް ބަދަލުކުރީ ރާއްޖޭގެ މާލީ ހާލަތު އޮތް ގޮތުން: މިނިސްޓަރު ޝިޔާމް

ރައީސް ޑރ. މުހައްމަދު މުއިއްޒުގެ ރިޔާސީ ވައުދެއްގެ ގޮތުގައި، ދ. މާދެލީގައި އަޅަން ނިންމި މަސް ފެކްޓަރީ ފ. ނިލަންދޫ އަށް ބަދަލުކުރީ ރާއްޖޭގެ މާލީ ހާލަތު އޮތް ގޮތުން ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.

ފިޝަރީޒް މިނިސްޓްރީގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޝިޔާމް ވިދާޅުވީ ދ. މާދެލީގައި މަސް ފެކްޓްރީއެއް އަޅުއްވައިދެއްވާނެ ކަމަށް ރައީސް މުއިއްޒު ވައުދުވެވަޑައިގެންނެވި ކަމަށެވެ. އެ ވައުދުވެވަޑައިގެންނެވިއިރު ވެސް އެރަށަކީ އެހެން ކަމަކަށް ދޫކޮށްފައިވާ ރަށެއްކަން ރައީސްއަށް ވެސް އެނގިވަޑައިގަންނަވާ ކަމަށް މިނިސްޓަރު ޝިޔާމް ވިދާޅުވިއެވެ. އަދި އެދުވަސްވަރު އެގޮތަށް ވައުދުވެވަޑައިގެންނެވީ އެހިސާބުގެ މަސްވެރިންނާއި ރައްޔިތުން ވަރަށް ބޮޑަށް އެދޭ ކަމެއްކަމުގައިވާތީ ކަމަށް މިނިސްޓަރު ޝިޔާމް ވިދާޅުވިއެވެ.

ނަމަވެސް އެރަށުގައި މަސްފެކްޓްރީ ގާއިމްކުރެވޭނެ ގޮތް ނުވީ ރާއްޖޭގެ މާލީ ހާލަތު މިވަގުތު އޮތް ގޮތުންނާއި، އެހެން ބޭނުމަކަށް ދީފައިވާ ރަށަކަށްވާތީ ކަމަށް މިނިސްޓަރު ޝިޔާމް ވިދާޅުވިއެވެ. އަދި އެރަށް އަނބުރާ ދައުލަތަށް ހޯދުމަށް މާލީ ވަރަށް ބުރައެއް ދައުލަތަށް އުފުލަންޖެހޭ ކަމަށް މިނިސްޓަރު ޝިޔާމް ވިދާޅުވިއެވެ. އެހެންކަމުން ދ. މާދެލީގައި އަޅަން ނިންމި މަސް ފެކްޓަރީ ފ. ނިލަންދޫ އަށް ބަދަލުކުރީ ކަމަށް މިނިސްޓަރު ޝިޔާމް ވިދާޅުވިއެވެ.

ރިޔާސީ އިންތިޚާބުގެ ކެމްޕެއިނުގެ ތެރެއިން ފ. ނިލަންދޫގައި ވާހަކަ ދައްކަވަމުން، މާދެލީގައި މަސް ފެކްޓަރީއެއް އެޅުމަށް ރައީސް މުއިއްޒު ވައުދުވެވަޑައިގަތީ 17 އޯގަސްޓު 2023 ގައެވެ. އެ މަޝްރޫއު ފ. އަތޮޅު ވެރިރަށް ނިލަންދޫ އަށް ބަދަލުކުރީ އެ ރަށް އާބަން ސެންޓަރެއްގެ ގޮތުގައި ތަރައްގީ ކުރަން މި ސަރުކާރުން ކަނޑައަޅާފައިވާތީ ކަމަށް މީގެ ކުރިން ފިޝަރީޒް މިނިސްޓްރީން ބުނެފައިވެއެވެ.

މާދެލީގައި މަސް ފެކްޓަރީއެއް ހަދަން ރައީސް މުއިއްޒު ވައުދުވެވަޑައިގެންނެވިއިރު ވެސް އެ ރަށުގައި ރިސޯޓެއް ހަދަން އެސްއޭއެސް ކެޕިޓަލް ޕްރައިވެޓް ލިމިޓެޑްއާ އޮތީ ހަވާލުކޮށްފައެވެ. ސެއިންޓް ރެޖިސްގެ ވޮއްމުލި ހިންގާ އެ ކުންފުންޏާ މާދެލި ހަވާލުކުރީ 5 ޖުލައި 2023 ގައެވެ.