ބަނޑިދޫ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުވައިފި

ދިވެހިރާއްޖޭގެ އުއްތަމަ ފަނޑިޔާރު އަޙްމަދު މުޢުތަޞިމް ޢަދުނާން ދ. ބަނޑިދޫ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުއްވައިދެއްވައިފިއެވެ.

ދ. ބަނޑިދޫ ކޯޓު ރަސްމީކޮށް ހުޅުވުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދިވެހިރާއްޖޭގެ އުއްތަމަ ފަނޑިޔާރު ދެއްކެވި ވާހަކަފުޅުގައި ފަނޑިޔާރުކަން ކުރުމުގައި އަދުލުވެރިވުމުގެ އިތުރުން އިހްސާންތެރިކަން އިސްކުރުމަކީ ހުރިހާ ފަނޑިޔާރުންގެ ވާޖިބެއް ކަމުގައި ފާހަގަކުރެއްވިއެެވެ. އަދި ޒަމާނަށް އަންނަ ބަދަލުތަކާއެކު ޝަރުއީދާއިރާގެ ކަންކަން ހިންގާ ބަލަހައްޓަމުން އަންނަ ގޮތްތަކަށްވެސް ބަދަލު އަންނަން ޖެހޭކަން ފާހަގަ ކުރެއްވިއެވެ.

މި ދަތުރުގައި އުއްތަމަފަނޑިޔާރު އަޙްމަދު މުޢުތަސިމް ޢަދުނާންގެ އިތުރުން ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޙުސްނުއް ސުޢޫދު އަދި ޗީފް ޖުޑީޝަލް އެޑް މިނިސްޓްރޭޓަރ ޢާއިޝަތު ރިޒްނާ ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ޖުޑީޝަލް އެޑް މިނިސްޓްރޭޓަރ ޢާއިޝަތު ދެއްކެވި ވާހަކަފުޅުގައި ކޯޓުތަކުގެ އުމްރާނީ ތަރައްޤީއަށް ކުރެވޭ މަސައްކަތްތަކުގެ އިތުރުން އިންސާނީ ވަސީލަތްތައް އިތުރުކުރުމަށާއި ޒަމާނީ ޓެކްނޮލޮޖީ ކޯޓުތަކުގައި ޤާއިމްކުރުމަށްޓަކައި ގިނަ މަސައްކަތްތަކެއް ކުރަމުންދާކަން ފާހަގަކުރެއްވިއެވެ.

އަދި އިމާރާތުގެ މަސައްކަތް ފުރިހަމަކުރުމަށްޓަކައި ދ. ބަނޑިދޫ ކައުންސިލާއި، ކޮންޓްރެކްޓަރާއި، ދ. ޖުޑީޝަލް ދާއިރާގެ މެޖިސްޓްރޭޓުންނާއި މުވައްޒަފުން އަދި ޑީޖޭއޭގެ މުވައްޒަފުންގެ ބުރަ މަސައްކަތުގެ އަގުވަޒަންކޮށް އޭނާ ޝުކުރު އަދާކުރެއްވިއެވެ.