ދ.ބަނޑިދޫ ފެނަކަ ބްރާންޗުގައި މަސައްކަތް ކުރަމުންދިޔަ 5 މުވައްޒަފުން ކުއްލި ގޮތަކަށް ވަޒީފާއިން ވަކިކޮށްފި އެވެ.

އިތުބާރުހުރި ފަރާތަކުން ރާއްޖެއެމްވީއަށް ބުނީ، ބަނޑިދޫ ފެނަކަ ބްރާންޗުގައި މަސައްކަތް ކުރަމުންދިޔަ 5 މުވައްޒަފުން ކުއްލި ގޮތަކަށް ވަޒީފާއިން ވަކިކޮށްފައިވާ ކަމަށާއި، އެ މުވައްޒަފުން ވަޒީފާއިން ވަކިކޮށްފައިވަނީ ސަރުކާރުގެ ޕާޓީ، ޕީއެންސީއަށް ވަނުމަށް ފުރުސަތު ދިނުމަށްފަހު، އެޕާޓީއަށް ސޮއިނުކުރުމުން ކަމަށެވެ.

ޕީއެންސީ ބަނޑިދޫ ސްޓިއަރިން ކޮމެޓީގެ އިސް މެންބަރުން އެތައް ފަހަރެއްގެ މަތިން ޕާޓީއަށް ސޮއިނުކުރާނަމަ ވަޒީފާ ދާއިމީ ނުވާނެ ކަމާއި، އަދި ވަޒީފާއިން ވަކި ކުރާނެ ކަމުގެ އިންޒާރު އެތައް ފަހަރެއްގެ މަތިންދީފައިވާ ކަމަށް ތުހުމަތުކޮށްފައިވެ އެވެ.

މީގެ އިތުރުން މި 5 މުވައްޒަފުން ވަޒީފާއިން ވަކިކުރުމުގެ ހަފްތާއެއްހާ ދުވަސްކުރިން އިތުރު 11 މީހުންނަށް ފެނަކައިން ވަޒީފާ ދީފައިވާ ކަމަށާއި، އަދި ކުރިއަށް އޮތްތަނުގައި އިތުރު 17 މީހަކަށް ވަޒީފާ ދިނުމަށް ނިންމާފައިވާ ކަމަށް މައުލޫމާތު ލިބިފައިވާ ކަމަށް ބުނެފައިވެއެވެ.

މި ހަފްތާތެރޭގައި މި ވަކި ކުރި 5 މުވައްޒަފުން މީގެ ކުރިން ވެސް ވަޒީފާއިން ވަކިކޮށްފައިވެއެވެ. ނަމަވެސް ވަޒީފާއިން ވަކިކުރެވިފައިވަނީ އޮޅުމަކުން ކަމަށް ބުނެ ވަޒީފާ އަލުން ވަނީ ދީފައެވެ.

މި މައްސަލައާ ގުޅޭގޮތުން ބަނޑިދޫ ފެނަކަ ބްރާންޗުގެ ބަހެއް ވަނީ ލިބޭގޮތް ނުވެފައެވެ.