އަސާސީ ހުރިހާ ކަމަކަށް ބަރޯސާވާ ޤައުމަކާ ޖެހިގަތުމަކީ ނުރައްކާތެރި ކަމެއް: ޝަރީފް

އަސާސީ ހުރިހާ ކަމަކަށް ބަރޯސާވާ ޤައުމަކާ ޖެހިގަތުމަކީ ނުރައްކާތެރި ކަމެއްކަމަށް ކެލާ ދާއިރާގެ މެންބަރު އިބްރާހީމް ޝަރީފް ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޝަރީފް ވަނީ ކޮވިޑްގެ ދަތި ޙާލުގައި ރާއްޖެއަށް ދިމާވި އިޤްތިސާދީ ގޮންޖެހުންތަކަށް އަލިއަޅުވާލައްވާފައެވެ.

އޭރު އޮތް ޙާލަތުން އަރައިގަތުމަށް އިންޑިއާއިން ވެދިން އެހީވެސް މެމްބަރު ޝަރީފް ފާހަގަ ކުރެއްވިއެވެ.

ޝަރީފް ވިދާޅުވީ، ރާއްޖެއިން އެކި ކަންކަމުގައި އިންޑިއާއަށް ބަރޯސާވާ ކަމަށާއި، އިންޑިއާ ފަދަ އިޤްތިސާދަކާ "ޖެހިގެން" ރާއްޖެ އޮތުމަކީ އެދެވޭ ކަމެއް ނޫން ކަމަށެވެ. އެއީ ނުރައްކާތެރި ކަމެއްގެ ގޮތުގައިވެސް ޝަރީފް ސިފަ ކުރެއްވިއެވެ.

އެއީ ދިވެހިންގެ އިތުރުން އެހެން ޤައުމުތަކުންވެސް ބަލައިގަންނާނެ ކަންކަމެއް ނޫންކަން މެމްބަރު ފާހަގަ ކުރެއްވިއެވެ.

ޝަރީފް އިތުރަށް ވިދާޅުވީ، ބޭސްފަރުވާއާއި އެހެނިހެން ޒަރޫރީ ބޭނުންތަކަށް ކޮންމެ މަހަކުވެސް 5000 ވަރަކަށް ދިވެހިން އިންޑިއާއަށް ދަތުރު ކުރާ ކަަމަށެވެ. އަނެއްކޮޅުން އިންޑިއާއިންވެސް އެތައް ލައްކަ ފަތުރުވެރިންނެއް ރާއްޖެ އަންނަކަމަށް މެމްބަރު ވިދާޅުވިއެވެ.

އެފަދަ ޤައުމުތަކާ ރާއްޖެއިން ގުޅުން ގޯސްކުރާނަމަ، ރާއްޖެއަށް ފަސޭހަކަމާއެކު ބަޖެޓު ސަޕޯޓު ލިބުން ދަތިވާނެކަމަށްވެސް މެމްބަރު ވިދާޅުވިއެވެ.

 އިންޑިއާ ސަރުކާރުން ވަނީ ބަޖެޓް ސަޕޯޓުގެ ގޮތުގައި ރާއްޖެއަށް ދީފައިވާ 50 މިލިއަން ޑޮލަރު އަނބުރާ ދެއްކުމަށް ލުއި ގޮތްތަކެއްވެސް ހަމަޖައްސައިދީފައެވެ. އެގޮތުން މި މަހު ދައްކަން ޖެހޭ 50 މިލިއަން ޑޮލަރު އަނބުރާ ދެއްކުމަށް އެއް އަހަރު ދުވަހުގެ މުއްދަތެއް އެ ގައުމުގެ ސަރުކާރުން ވަނީ ދެއްވާފައެވެ.