ރަންގްނިކް ވެސް ބަޔާނަށް ނޫނެކޭ ބުނެފި

ބަޔާން މިއުނިކްގެ ކޯޗުކަން ގަބޫލުނުކުރަން އެންމެ ފަހު ވަގުތު ރަލްފް ރަންގްނިކް ނިންމައިފި އެވެ.

އޭނާ އަކީ މިހާރު އޮސްޓްރިއާގެ ގައުމީ ކޯޗެވެ. ބަޔާންގެ ހުށަހެޅުމަށް އޭނާ ނޫކެނޭ ބުނީ އެކުލަބުގެ ކޯޗަކަށްވުމަށް މަޝްވަރާތައްކޮށް ގިނަ ކަންކަމަށް އެއްބަސްވުމަށްފަހު އެވެ. ސަބަބެއް ކަމަށް މެންޗެސްޓާ ޔުނައިޓެޑްގެ ކުރީގެ ކޯޗު ރަންގްނިކް ބުނީ ވަޒީފާ ގަބޫލުކުރުރަން ނިންމީ އަމިއްލަ ސަބަބުތަކާހެދި ކަމަށެވެ.

ރަންގްނިކް ބަޔާނަށް ނޫނެކޭ ބުނެފައިމިވަނީ އެކުލަބުގެ ކޯޗުކަމާ ހަވާލުވާން ބަޔާ ލެވަކޫސަންގެ ކޯޗު ޒަބީ އަލޮންސޯ އާއި ޖަރުމަނުގެ ގައުމީ ޓީމުގައި ހުރި ބަޔާންގެ ކުރީގެ ކޯޗު ހޫލިއަން ނާގަލްސްމަން ވެސް ނޫނެކޭ ބުނެފައިވަނިކޮށެވެ.

ބަޔާންގެ ކޯޗުކަން ހުސްވަނީ މި ސީޒަނަށް ފަހު ކޯޗުކަމުން ތޯމަސް ޓުޗެލް ވަކިވާތީ އެވެ. މިދިޔަ ފެބްރުއަރީ މަހު އޭނާ މަގާމުން ވަކިވާން ނިންމީ 11 އަހަރަށް ފަހު ޖަރުމަނު ލީގު ދިފާއު ނުކުރެވެމުންނާއި ނަތީޖާތައް ދަށްވެ، ކުޅުންތެރިންނާއި ސަޕޯޓަރުންގެ ފިއްތުންތައް ވެސް ކުރިމަތިވުމުންނެވެ. ނަމަވެސް ޗެމްޕިއަންސް ލީގުގެ ސެމީ ފައިނަލަށް ބަޔާން ދިއުމާއެކު ކުލަބުގެ ސަޕޯޓަރުން ވަނީ އެމީހުން ބޭނުންވަނީ ޓުޗެލް ކޯޗުކަމުގައި ބަހައްޓަން ކަމަށް ބުނެ ޕެޓިޝަނެއްގައި ސޮއިކުރަން ފަށައިފަ އެވެ. މި ޕެޓިޝަނުގައި މިހާތަނަށް 20000 މީހުން ވަނީ ސޮއިކޮށްފަ އެވެ. އަދި މި ޕެޓިޝަނުގައި ރަންގްނިކް ކޯޗުކަމަށް ގެންނަން ގަބޫލުނުވާ ވާހަކަ ވެސް ލިޔެފައި އެބައޮތެވެ.

މި ޕެޓިޝަން ހެދި ނަމަވެސް ބަޔާން އާއި ޓުޗެލް ވެސް ބުނީ އެއްވެސް ކަމެއް ބަދަލުނުވާނެ ކަމަށާއި މި ސީޒަނަށް ފަހު އޭނާ ވަކިވާން އޮތީ ނިންމައިފައި ކަމަށެވެ. އަދި ބަޔާންގެ ވެރިން ވެސް ވަނީ އަންނަ ހަފުތާގައި އައު ކޯޗާއެކު އެއްބަސްވުމަކަށް އާދެވޭނެ ކަމަށް ބުނެފަ އެވެ. ނަމަވެސް ރަންގްނިކް ނޫނެކޭ ބުނުމުން ބަޔާންގެ ވެރިން އަދި އެއްވެސް ވާހަކައެއް ނުބުނެ އެވެ.