ޖަރުމަނުގެ ބަޔާން މިއުނިކްގެ ކޯޗަކަށް، ރަލްފް ރަންގްނިކް ގެނައުމުގެ މަޝްވަރާތައް ކުރިއަށް ގެންދާ ކަމަށް އެ ކުލަބުން ބުނެފި އެވެ.

މިހާރު ކުރިއަށްދާ ސީޒަނަށްފަހު، ބަޔާންގެ ކޯޗްކަމުގައި ހުރި ތޯމަސް ޓުޗެލް ވަކިވާނެ އެވެ. އެއީ ބަޔާންގެ ނަތީޖާތައް ދަށްވުމުގެ ސަބަބުން، ކުލަބުގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށްފަހު ޓުޗެލް ނިންމި ނިންމުމެކެވެ. އެއާއެކު ބަޔާނުން ވަނީ އަންނަ ސީޒަނަށް އައު ކޯޗެއް ހޯދުމުގެ މަސައްކަތް ފަށައިފަ އެވެ.

ބަޔާނުން މިހާާރު މަސައްކަތް ކުރަމުން އަންނަނީ އެ ޓީމުގެ ކޯޗަކަށް އުމުރުން 65 އަހަރުގެ ރަންގްނިކް ގެންނަން މަސައްކަތް ކުރަމުން ކަމަށް މީގެ ދެ ދުވަސް ކުރިން މީޑިއާ ތަކުން ވަނީ ރިޕޯޓުކޮށްފަ އެވެ. އެކަން ރަންގްނިކް ވެސް ކަށަވަރު ކޮށްދިނެވެ. އޭރު އޭނާ ބުނީ، ބަޔާނުން އޭނާ އަށް ހުށަހެޅުމެއް ލިބިފައިވާ ކަމަށާއި، އެކަން އޮސްޓްރިއާގެ ފުޓުބޯޅަ ފެޑެރޭޝަންގެ ސަމާލު ކަމަށް ވެސް ގެނެސްފައިވާނެ ކަމަށެވެ. ރަންގްނިކް މިވަގުތު ހުރީ އޮސްޓްރިއާގެ ޤައުމީ ޓީމުގެ ކޯޗުކަމުގެ މަގާމުގަ އެވެ.

އެކަމާ ގުޅިގެން ބަޔާންގެ އިސް އޮފިޝަލަކު ބުނީ، މީޑިއާ ތަކުގައި ދައުރުވަމުން ދަނީ ޞައްޙަ ވާހަކަތަކެއް ކަމަށެވެ. އަދި ރަންގްނިކާ އެކު މަޝްވަރާތައް ކުރިއަށްދާ ކަމަށް ވެސް ވަނީ ބުނެފަ އެވެ. އެ މަޝްވަރާތަކަށްފަހު، ހަފްތާއެއްހާ ދުވަހުގެ ތެރޭގައި ފަައިނަލް ނިންމުމެއް ނިންމޭނެ ކަމުގެ އުންމީދު އޮތް ކަމަށް ވެސް އެ އޮފިޝަލު ވަނީ ބުނެފަ އެވެ.

ރަންގްނިކް ވަނީ މީގެ ކުރިން ގިނަ ކުލަބުތަކަށް ވެސް އިރުޝާދު ދީފަ އެވެ. އެންމެ ފަހުން އޭނާ އިރުޝާދު ދިން ކުލަބަކީ އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑު އެވެ. ނަމަވެސް ޔުނައިޓެޑުގެ ކޯޗުކަމުގައި ރަންގްނިކް ހޭދަކޮށްފައި ވަނީ މަދު ދުވަސް ކޮޅެކެވެ.