ޖަރުމަނުގެ ބަޔާން މިއުނިކްގެ ކޯޗަކަށް، ރަލްފް ރަންގްނިކް ގެންނަން މަސައްކަތް ކުރަން ފަށައިފި އެވެ.

މިހާރު ކުރިއަށްދާ ސީޒަނަށްފަހު، ބަޔާންގެ ކޯޗަކަމުގައި ހުރި ތޯމަސް ޓުޗެލް ވަކިވާނެ އެވެ. އެއީ ބަޔާންގެ ނަތީޖާތައް ދަށްވުމުގެ ސަބަބުން، ކުލަބުގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށްފަހު ޓުޗެލް ނިންމި ނިންމުމެކެވެ. އެއާއެކު ބަޔާނުން ވަނީ އަންނަ ސީޒަނަށް އައު ކޯޗެއް ހޯދުމުގެ މަސައްކަތް ފަށައިފަ އެވެ.

ބަޔާނުން މިހާާރު މަސައްކަތް ކުރަމުން އަންނަނީ އެ ޓީމުގެ ކޯޗަކަށް އުމުރުން 65 އަހަރުގެ ރަންގްނިކް ގެންނަން މަސައްކަތް ކުރަމުންނެވެ. އެކަން ރަންގްނިކް ވެސް ވަނީ ކަށަވަރު ކޮށްދީފަ އެވެ. އެކަން ކަށަވަރު ކޮށްދީ އޭނާ ބުނީ، ބަޔާނުން އޭނާ އަށް ހުށަހެޅުމެއް ލިބިފައިވާ ކަމަށާއި، އެކަން އޮސްޓްރިއާގެ ފުޓުބޯޅަ ފެޑެރޭޝަންގެ ސަމާލު ކަމަށް ވެސް ގެނެސްފައިވާނެ ކަމަށެވެ. ރަންގްނިކް މިވަގުތު ހުރީ އޮސްޓްރިއާގެ ޤައުމީ ޓީމުގެ ކޯޗުކަމުގެ މަގާމުގަ އެވެ.

ރަންގްނިކް ބުނީ މިވަގުތު އޭނާގެ ފޯކަސް ހުރީ އޮސްޓްރިއާގެ ޤައުމީ ޓީމާއެކު، ޖޫން މަހު ފަށާ ޔޫރޯ ފުޓުބޯޅަ މުބާރާތަށް ކަމަށެވެ. އެހެން ނަމަވެސް، ބަޔާންގެ ކޯޗުކަމާ އޭނާ ހަވާލުވާން އެ ކުލަބުން ބޭނުންވާ ކަމަށް ބުނެފި ނަމަ، އެކަން ބޭނުންވޭތޯ އޭނާގެ އަމިއްލަ ނަފްސާއި ސުވާލު ކުރާނެ ކަމަށެވެ.

ބައިނަލްއަޤުވާމީ މީޑިއާ ތަކުގައި ބުނެފައިވާ ގޮތުންް ރަންގްނިކް އަންނަނީ ބަޔާނާއެކު މަޝްވަރާތައް ކުރިއަށް ގެންދަމުންނެވެ. މުސާރައިގެ އެއްވެސް މައްސަލައެއް ދިމާ ނުވާ ކަމަށާއި، ރަންގްނިކް އެނގެން ބޭނުން ވަނީ އޭނާ އަށް އޮތް މަސައްކަތް ކަމަށް ވެސް މީޑިއާ ތަކުން ވަނީ ބުނެފަ އެވެ.

ރަންގްނިކް ވަނީ މީގެ ކުރިން ގިނަ ކުލަބުތަކަށް ވެސް އިރުޝާދު ދީފަ އެވެ. އެންމެ ފަހުން އޭނާ އިރުޝާދު ދިން ކުލަބަކީ އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑު އެވެ.ނަމަވެސް ޔުނައިޓެޑުގެ ކޯޗުކަމުގައި ރަންގްނިކް ހޭދަކޮށްފައި ވަނީ މަދު ދުވަސް ކޮޅެކެވެ.