ޗެލްސީ ފަސް ލަނޑުން ބަލިކޮށް، އާސެނަލް އިން ގޯލްގެ ތަފާތު ބޮޑުކޮށްފި

އިނގިރޭސި ޕްރިމިއަރ ލީގުގައި ޗެލްސީ ފަސް ލަނޑުން ބަލިކޮށް، އާސެނަލް އިން ވާދަވެރި ޓީމްތަކުގެ މައްޗަށް ގޯލްގެ ތަފާތު ބޮޑުކޮށްފި އެވެ.

އަމިއްލަ ދަނޑުގައި 5-0 ން ޗެލްސީ ބަލިކޮށް, އާސެނަލް ވަނީ ތާވަލްގެ އެއް ވަނައިގައި 3 ޕޮއިންޓްގެ ލީޑެއްވެސް ނަގާފައެވެ. ނަމަވެސް އެއީ މެންޗެސްޓަރ ސިޓީއަށް ވުރެ އިތުރަށް ދެ މެޗު ކުޅެގެންނެވެ. މެޗުގެ އަދަދު ހަމަކުރާއިރު އެއްވަނަ ހޯދުމުގެ ފުރުޞަތު އޮތީ ސިޓީއަށެވެ. މިވަގުތު ސިޓީ އޮތީ ތިން ވަނައިގައެވެ.

ޗެލްސީ ކޮޅަށް އާސެނަލް އިން މެޗުގައި ލީޑް ނެގީ 4 ވަނަ މިނިޓްގައި ޓްރޮސާޑް ޖެހި ލަނޑުންނެވެ. 52 ވަނަ މިނިޓްގައި ދެވަނަ ލަނޑު ޖެހީ ވައިޓް އެވެ. އޭގެ 4 މިނިޓް ފަހުން އާސެނަލްގެ ތިންވަނަ ލަނޑު ޖެހީ ކައި ހާވާޓްޒް އެވެ. 65 ވަނަ މިނިޓްގައި ހަވަޓްޒް ދެވަނަ ލަނޑެއް ޖަހާ އާސެނަލްގެ ލީޑް ހަތަރު ލަނޑަށް ފުޅާކުރިއެވެ. ފަސްވަނަ ލަނޑު ޖެހީ ވައިޓް އެވެ.

މިމޮޅާއެކު އާސެނަލް އެއްވަނައިގައި އޮތީ 34 މެޗުން 77 ޕޮއިންޓް ހޯދައިގެންނެވެ. ފައިދާ 56 ގޯލް އެބައޮތެވެ. މިއީ ވާދަވެރި ލިވަޕޫލާއި ސިޓީއަށްވުރެ ގިނަ އަދަދެކެވެ.