ލިވަޕޫލް ކަޓައިފި، މެޗާ މެދު ކްލޮޕް ހިތްހަމަޖެހޭ

ޔޫރޮޕާ ލީގުން ލިވަޕޫލް ކެޓި ނަމަވެސް ރޭ އެޓްލާންޓާއާ ދެކޮޅަށް ދެއްކި ކުޅުމާމެދު ހިތްހަމަޖެހޭ ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.

މެޗަށް ފަހު ވާހަކަ ދައްކަމުން ކްލޮޕް ބުނީ މުހައްމަދު ސަލާހް ޖެހި ޕެނަލްޓީއިން ރޭގެ މެޗު 1-0އިން ކާމިޔާބު ކުރެވުނު ނަމަވެސް ހުސްވި ހަފުތާގައި 3-0އިން ބަލިވެފައި އޮތުމުން އެ ނަތީޖާ އަނބުރާލުން އުނދަގޫވާނެ ކަމަށް ކުރިން ވެސް ގަބޫލުކުރި ކަމަށެވެ.

މި ސީޒަނަށް ފަހު ޓީމާ ވަކިވާ ކޯޗު ބުނީ އޭނާގެ ޓީމަށް ތިން މެޗަށް ފަހު މޮޅެއް ލިބުމުން ދެން އޮތީ ޕްރެމިއާ ލީގުގައި ކުޅެން ޖެހޭ މެޗުތަކަށް ތައްޔާރުވުން ކަމަށާއި ތިން މެޗުގައި 63 ފަހަރު ގޯލަށް ޝޫޓްކޮށް މޮޅެއް ނުލިބުން ނިމުމަކަށް އައުމުން ހިތްހަމަޖެހުމެއް ލިބިއްޖެ ކަމަށެވެ.

ލިވަޕޫލަށް މި ސީޒަނުގައި މިހާރު ތައްޓެއް ލިބެން އޮތް ހަމައެކަނި މުބާރާތަކީ ޕްރެމިއާ ލީގެވެ. އެ ލީގު ތަށީ ހޯދުމުގެ އަމިއްލަ ބާރު އޮއްވައި އެ ބާރު ގެއްލި މިވަގުތު ޓީމު އޮތީ ތާވަލުގެ ތިން ވަނާގަ އެވެ.