ކުދިއާބާދީ ރަށްތަކުގައި ޚިދުމަތްތައް ފުޅާކޮށް، ތަރައްގީ ކުރުމުގެ ވިސްނުމެއް މިސަރުކާރުގެ ނެތް ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.

ބާރަށުގައި ބުރާސްފަތި ދުވަހު ބޭއްވި މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ ހއ.މިރަށްތަކަކީ އިގްތިސާދީ އެތައް ފައިދާއެއް ހޯދޭނެ ރަށްތަކެއް ކަމަށެވެ. އެއީ ރީތި ފަޅުތަކާއި ހުދު ގޮނޑުދޮށްތަކާއި، ދަނޑުވެރިކަމަށް ރަނގަޅު ރަށްތަކެއް ހުރިކަމަށް ރައީސް ސާލިހު ވިދާޅުވިއެވެ.

ގުދުރަތީ ގޮތުން ލިބިފައިވާ މުއްސަންދިކަން ބޭނުންކޮށް އަތޮޅަށް ތަރައްގީކުރެވޭނީ ސަރުކާރުގެ އެވިސްނުން ހުރެގެންކަން ފާހަގަކުރައްވައި ރައީސް ސާލިހު ވިދާޅުވީ ކުދިއާބާދީގެ ރަށްތައް ތަރައްގީ ކުރުމުގެ ވިސްނުން މިސަރުކާރުގެ ނެތް ކަމަށެވެ. މިސަރުކާރުން މަސައްކަތް ކުރަނީ ރައްޔިތުންތައް އެތަނަކަށް ޖަމާކޮށް، މާލެ ސަރަހައްދު ތަރައްގީ ކުރަން ކަމަށް ރައީސް ސާލިހު ވިދާޅުވިއެވެ.

ނަމަވެސް އެމްޑީޕީގެ ސިޔާސަތަކީ އަބަދުވެސް ރައްޔިތުންނަށް ބޭނުންވާ ތަރައްގީއާއި ބޭނުންވާ ޚިދުމަތްތައް އެބަޔަކު ތިބި ތަނަކުން އެބަޔަކަށް ފަސޭހައިން ހޯދައިދިނުން ކަމަށް ރައީސް ސާލިހު ވިދާޅުވިއެވެ.

ލާމަރުކަޒީ ނިޒާމަށް އިޝާރާތް ކުރައްވައި ރައީސް ސާލިހު ވިދާޅުވީ މިސަރުކާރުން މަސައްކަތް ކުރަނީ ނިޒާމު ވެސް ފުޑުފުޑުކޮށްލަން ކަމަށެވެ. މިސަރުކާރުން އެޓޯލްސް މިނިސްޓްރީ އުފައްދައި، ބާރުތައް މިހާރު ވެސް ނަގަމުންދާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ރައީސް ސާލިހު ވިދާޅުވީ އެމްޑީޕީ އުފެދިގެން އައީވެސް އަޅުވެތިކަމެއްގެ ތެރޭގައި ގައުމު އޮތް ދުވަސްވަރެއްގައި ކަމަށެވެ. ނަމަވެސް އެދުވަހު މަސައްކަތް ކުރީ ރައްޔިތުންގެ ހައްގުގައި ކަމަށާއި، މިއަދު ވެސް ރައްޔިތުންގެ ހައްގުގައި މަސައްކަތް ކުރާނެ ކަމަށް ރައީސް ސާލިހު ވިދާޅުވިއެވެ.