މިއީ ޕީއެސްޖީން ފަހަތުން އަރައި މޮޅުވާނެ މެޗު: އެންރީކޭ

ޗެމްޕިއަންސް ލީގު ފުޓްބޯޅަ މުބާރާތުގެ ނޮކްއައުޓް ބުރުގައި މީގެ ކުރިން ދުވަހަކު ވެސް ފްރާންސްގެ ޕީއެސްޖީ ފަހަތުން އަރައި މޮޅުވެފައި ނެތަސް މިއީ އެކަން ކުރާނެ ފަހަރު ކަމުގައި ކޯޗު ލުއިސް އެންރީކޭ ބުނެފި އެވެ.

އޭނާ މިހެން ބުނީ މިރޭ ދަންވަރު ބާސެލޯނާއާ ދެކޮޅަށް ކުޅޭ ކުއާޓާ ފައިނަލްގެ ފަހު ލެގުގެ ކުރިން ވާހަކަ ދައްކަމުންނެވެ. މި ދެ ޓީމު މިދިޔަ ހަފުތާގައި ޕީއެސްޖީގެ ދަނޑުގައި ކުޅެގެން ބާސެލޯނާ މޮޅުވީ 3-2އިންނެވެ.

ބާސެލޯނާ އަކީ އެންރީކޭ އެ ޓީމެއްގެ ކެޕްޓަންކަންކޮށް، ފަހުން ކޯޗުކޮށްދީ ގިނަ ކާމިޔާބީތަކެއް ހޯދައިދިން ޓީމެކެވެ. މި ދެ ޓީމުގެ އެންމެ ފާހަގަކޮށްލެވޭ މެޗަކީ 2017 ވަނަ އަހަރުގެ ޗެމްޕިއަންސް ލީގުގައި ބާސެލޯނާ ފުރަތަމަ ލެގުގައި 4-0އިން ބަލިވުމަށްފަހު އަމިއްލަ ދަނޑުގައި 6-1އިން މޮޅުވި ތާރީހީ މެޗެވެ. އެއިރު ބާސެލޯނާގެ ކޯޗަކީ އެންރީކޭ އެވެ. ކެޕްޓަނަކީ މިހާރުގެ ކޯޗު ޒަވީ ހަނާންޑޭޒެވެ. މި ދެ މީހުންނަކީ އެކުގައި ބާސެލޯނާ އަށް ކުޅުނު ދެ ކުޅުންތެރިން ވެސްމެ އެވެ.

މިހެންވެ އެންރީކޭ ބުނީ ޒަވީ އާއި އޭނާއާ ދެމެދުގައި އޮތީ ވަރަށް އެކުވެރި ގާތް ގުޅުމެއް ކަމަށާއި ނަމަވެސް އޭނާ ފުރަތަމަ ލެގުގެ މެޗުގެ ކުރިން ދެއްކި ވާހަކަތައް ނޫސްވެރިން ލިޔުނީ ދޭތެރެޖެހޭ ގޮތަކަށް ކަމަށެވެ.

އެ މެޗުގެ ކުރިން އެންރީކޭ ބުނީ ޒަވީ އަށްވުރެ ބޮޑަށް ބާސެލޯނާގެ ސްޓައިލްދެކެ ލޯބިކުރަނީ އޭނާ ކަމަށެވެ. މި މެޗަކީ ބާސެލޯނާއިން ވަކިވިފަހުން އެޓީމުގެ ސަޕޯޓަރުންގެ ކުރިމަތީގައި އެންރީކޭ ކުރީގެ ޓީމާ ދެކޮޅަށް ނުކުންނަ ފުރަތަމަ މެޗެވެ.

މި މެޗަށް ނުކުންނައިރު ފުރަތަމަ ލެގުގައި ނުކުޅެވުނު ޕީއެސްޖީގެ ޑިފެންޑަރު އަޝްރަފް ހަކީމީ އަށް ކުޅެވޭނެ އެވެ. ނަމަވެސް ބާސެލޯނާގެ ކެޕްޓަން ސާޖިއޯ ރޮބާޓޯ އާއި ޑިފެންޑަރު އަންދްރޭސް ކްރިސްޓިއަންސެން އަށް ދެ ކާޑު ހަމަވެގެން ނުކުޅެވޭނެ އެވެ.