މިއީ އަހަރެންގެ ޓީމެއް ކުޅޭ ގޮތެއްނޫން: ކްލޮޕް
ލިވަޕޫލްގެ ކެޕްޓަން ވެންޑައިކް ބޮލުގައި އަތް އަޅައިގެން
ލިވަޕޫލް މިހާރު ދައްކަމުން އަންނަ ގޯސް ކުޅުމަކީ ތައްޓެއް ހޯދޭފަދަ ކުޅުމެއް ނޫން ކަމަށް ކޯޗު ޔާގެން ކްލޮޕް ބުނެފި އެވެ.
އޭނާ މިހެން ބުނީ ޕްރެމިއާ ލީގުގައި ރޭ ކްރިސްޓަލް ޕެލަސް އަތުން 1-0އިން ބަލިވެ، ޓޭބަލުގެ ތިން ވަނަ އަށް ވެއްޓުމުންނެވެ. މޮޅުވިނަމަ ލިވަޕޫލް އޮންނާނީ އެއްވަނާގަ އެވެ.
ކޮންމެ ޓީމަކަށް ބާކީ ހަ މެޗު އޮތްއިރު ލިވަޕޫލް އަތުން ޓޭބަލުގެ ކުރި ގެއްލުނީ 30 މެޗު ކުޅުމަށްފަހު އެވެ.
އޭނާ ބުނީ ލިވަޕޫލާއި އާސެނަލް ބަލިވުމުން އެއްވަނަ މަގާމަށް އެރި ޗެމްޕިއަން މެންޗެސްޓާ ސިޓީ އަކީ ލީގުގެ ފެވަރިޓުންކަން އެ ޓީމުން ސާބިތުކޮށްދެނީ ސަބަބެއް އޮވެގެން ކަމަށެވެ.
އޭނާ ބުނީ ލިވަޕޫލް ކުޅުންތެރިން ގާތުގައި މެޗުގެ ހާފް ޓައިމްގައި ހަމަޖެހިގެން ކުޅެފިނަމަ ނަތީޖާ އަނބުރާލަން ފުރުސަތު ލިބޭނެ ކަމަށް ބުނެ ވާހަކަ ދެއްކި ކަމަށާއި ނަމަވެސް ފަހު ހާފުގައި ވެސް މާބޮޑު ބަދަލެއް ނާންނަ ކަމަށެވެ.
މި ބައްޔާއެކު އަމިއްލަ ދަނޑުގައި 2022ގެ ފަހުން ލިވަޕޫލް ބަލިނުވެ ދަމަހައްޓަމުން އަންނަ ސިލްސިލާ އަށް ވެސް ވަނީ ނިމުން އައިސްފަ އެވެ. ކްލޮޕް ބުނީ ދެން ކުރެވެން އޮތް ކަމަކީ ރަށުން ބޭރުގައި ކުޅެން ޖެހޭ ހަތަރު މެޗު ކާމިޔާބު ކުރުން ކަމަށެވެ.
ލިވަޕޫލްގެ މި ބައްޔަކީ އަމިއްލަ ދަނޑުގައި އިޓަލީގެ އެޓްލާންޓާ އަތުން 3-0އިން ބަލިވެ، ޔޫރޮޕާ ލީގުން ކެޓުމުގެ ބިރާ ކުރިމަތިވެފައިވަނިކޮށް، ލިބުނު އިތުރު ހިތްދަތިކަމެކެވެ.
