ޖަރުމަނުގެ އައިންޓްރަކްޓް ފްރޭންކްފާޓް އަށް ކުޅެމުން އަންނަ ފްރާންސްގެ ހޫގޯ އެކިޓީކޭ ހޯދުމަށް ލިވަޕޫލް އިން ކުރި މަސައްކަތް ކާމިޔާބު ކޮށްފައިވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 23 އަހަރުގެ ޒުވާން ކުޅުންތެރިޔާ ހޯދުމުގެ ޑީލް ލިވަޕޫލް އިން ކާމިޔާބު ކޮށްފައިވާއިރު، އޭނާ ހޯދުމުގެ މަސައްކަތް ނިއުކާސަލް ޔުނައިޓެޑުން ވެސް ވަނީ ކޮށްފަ އެވެ. ނިއުކާސަލް އިން ވަނީ އެކަމާ ގުޅުން ހުރި މަޝްވަރާތައް ކޮށްފައި ކަމަށް ވެސް ރިޕޯޓުތައް ބުނެ އެވެ. ނަމަވެސް އެ ޑީލްގެ ތެރެއަށް ލިވަޕޫލް ވަދެ، އެކިޓީކޭ ހޯދުމަށް ކުރި މަސައްކަތް މިހާރު ވަނީ ކާމިޔާބު ކޮށްފަ އެވެ.

ފްރޭންކްފާޓާ އެކު އެކިޓީކޭ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނނީ 2029 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ ހަތަަރު އަހަރު އޮއްވައި އެއްބަސްވުން އުވާލުމަށް ލިވަޕޫލް އިން އެ ކުލަަބަށް 95 މިލިއަން ޔޫރޯގެ އަދަދެއް ދައްކާނެ ކަމަށް މީޑިއާ ތަކުގައި ވަނީ ބުނެފަ އެވެ.

މީޑިއާ ތަކުގައި ބުނެފައިވާ ގޮތުން އެކިޓީކޭ ލިވަޕޫލް އަށް ބަދަލުވާނީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، ލިވަޕޫލާ އެކު އޭނާ ހަ އަހަރު ދުވަހުގެ އެއްބަސްވުމެއްގައި ސޮއި ކޮށްފި ނަމަ، 2031 ވަނަ އަހަރާ ހަމައަށް އޭނާ ލިވަޕޫލަށް ކުޅޭނެ އެވެ.

އެކިޓީކޭ ވަނީ އޭނާ ފްރޭންކްފާޓަށް ކުޅެދިން 64 މެޗުގައި 26 ލަނޑު ޖަހައިފަ އެވެ. ފްރާންސްގެ ރެއިމްސް އިން ސީނިއާ ކެރިއަރު ފެށި އެކިޓީކޭ ވަނީ، ވެޖްލް ބޯލްޑްކްލަބްގެ އިތުރުން، ޕެރިސް ސެއިންޓް ޖާމަން (ޕީއެސްޖީ) އަށް ވެސް ކުޅެފަ އެވެ. ޕީއެސްޖީ އާއެކު އޭނާ ވަނީ ފްރާންސް ލީގު ވެސް ކާމިޔާބު ކޮށްފަ އެވެ.