ލިވަޕޫލް ސަޕޯޓަރުން ރުޅިއަތުވެއްޖެ، މިރޭގެ މެޗަށް ދިދަ ނުވައްދާނެ
11 އެޕްރީލު 2024 | ބުރާސްފަތި 00:31ޓިކެޓް އަގުބޮޑު ކުރާތީވެ ސަޕޯޓަރުން ދަނީ ނުރުހުން ފާޅު ކުރަމުން
ލިވަޕޫލްގެ ސަޕޯޓަރުން
ލިވަޕޫލުން އަންނަ ސީޒަނުގެ ޓިކެޓް އަގުބޮޑުކުރުމާއެކު ސަޕޯޓަރުން އިހްތިޖާޖު ކުރަން ފަށައިފި އެވެ.
އަދި މިކަމާ ނުރުހުން ފާޅު ކުރުމުގެ ގޮތުން ޔޫރޮޕާ ލީގުގައި މިރޭ އެޓްލާންޓާއާ ދެކޮޅަށް ކުޅޭ މެޗަށް އެ ކުލަބުގެ ބޮޑެތި ދިދަތައް ނުވައްދަން ވަނީ ނިންމައިފަ އެވެ. ކުލަބުން ވަނީ ސަޕޯޓަރުންގެ ޓިކެޓްގެ އަގު ދެ ޕަސެންޓް އަންނަ ސީޒަނުން ފެށިގެން ބޮޑު ކުރަން ނިންމައިފަ އެވެ.
މިކަމާ ގުޅިގެން ކޯޗު ޔާގެން ކްލޮޕް ބުނީ ލިވަޕޫލަކީ ސަޕޯޓަރުން ހިންގާ ކުލަބެއް ކަމަށާއި މިކަމަށް ސަޕޯޓަރުން ހައްލު ހޯދާނެ ކަމަށް އޭނާ އުއްމީދު ކުރާ ކަމަށެވެ. އަދި މެނޭޖްމަންޓުގެ މި ނިންމުން އެއް ފަރާތްކޮށް ޓީމަށް ސަޕޯޓްކޮށްދިނުމަށް އޭނާ ވަނީ އެދިފަ އެވެ.
އިނގިރޭސި ބައެއް ކުލަބުތަކުގެ ޓިކެޓް އަގުބޮޑު ކުރާތީވެ ސަޕޯޓަރުން ދަނީ ނުރުހުން ފާޅު ކުރަމުންނެވެ. މީގެ ކުރިން ޓޮޓެންހަމުން ވެސް ވަނީ ޓިކެޓް އަގުބޮޑުކޮށްފަ އެވެ.
