އީސީގެ މެމްބަރުންނަށް ޣިޔާސުއްދީން ސްކޫލަށް ނުވަދެވުމުން ނިއުޕޯޓް ސަރަހައްދަށް ޕީއެންއެފްގެ ޖަލްސާ ބަދަލުކޮށްފި

ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދަވާ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ޣިޔާސުއްދީން ސްކޫލް ހޯލުގައި ބާއްވަން އުޅުނު ޖަލްސާއަށް އިލެކްޝަންސް ކޮމިޝަން (އީސީ)ގެ މެމްބަރުންނަށް ނުވަދެވުމުން އެޖަލްސާ ނިއުޕޯޓް ސަރަހައްދުގައި ބޭއްވުމަށް ނިންމައިފިއެވެ.

މިރޭ 9:15 ގައި ޖަލްސާ ބޭއްވުމަށް ޕާޓީގެ އިސްވެރިންނާއި މެމްބަރުން ޣިޔާސުއްދީން ސްކޫލަށް ދިޔައިރު ފުލުހުން ވަނީ ޣިޔާސުއްދީން ސްކޫލްގެ ގޭޓް ބަންދުކޮށް ބައިވެރިން ސްކޫލް ތެރެއަށް ވަނުމަށް ހުރަސްއަޅާފައެވެ.

އެކަމާއި ގުޅޭގޮތުން ފުލުހުން މީޑިޔާއަށް ފޮނުވި މެސެޖެއްގައި ބުނެފައިވަނީ ޣިޔާސުއްދީން އިންޓަރނޭޝަނަލް ސްކޫލުގެ ފަރާތުން އެސްކޫލުގައި ބޭއްވުމަށް މަސައްކަތް ކުރަމުންދާ ހުއްދަދެވިފައިނުވާ އެއްވުމެއް ހުއްޓުވައި ސްކޫލު ރައްކާތެރިކުރުމަށް، މިނިސްޓްރީ އޮފް އެޑިއުކޭޝަންގައި އެދިފައިވާތީ، އެކަން ތަންފީޒުކުރުމަށް، މިނިސްޓްރީގެ ފަރާތުން ފުލުހުންގެ އެހީތެރިކަމަށް އެދިފައިވާތީ، އެސްކޫލުގައި މިވަގުތު ކުރިއަށްދާ އެއްވުމަށް ފުލުހުންދަނީ އެޓެންޑް ކުރަމުންކަމަށެވެ. އެޑިޔުކޭޝަން މިނިސްޓްރީން ފުލުހުންނަށް މިގޮތަށް އެދިފައިވަނީ މިރޭ 6:42 ގައިކަމަށް ފުލުހުން ބުނެފައިވެއެވެ.

އެހުރަސް އެޅުމާއެކުވެސް ޕީއެންއެފުން ވަނީ ޕާޓީ އުފައްދަން ބާއްވަންޖެހޭ ޖަލްސާ ޣިޔާސުއްދީން ސްކޫލް ހޯލުގައި ބޭއްވުމަށް މަސައްކަތްކޮށްފައެވެ. އެގޮތުން ހޯލުގައި ޖަލްސާ ބޭއްވުމަށް ޖަލްސާ ފަށަންވެސްފެށިއެވެ. ނަމަވެސް ޕާޓީ އުފައްދަން ބާއްވަންޖެހޭ ޖަލްސާއަކީ އީސީގެ މެމްބަރުންގެ ޙާޒިރުގައި ބާއްވަންޖެހޭ ޖަލްސާއަކަށްވާތީ އެޖަލްސާ ވަނީ ޣިޔާސުއްދީން ސްކޫލް ހޯލުގައި ނުބޭއްވިފައެވެ.

އެއާއެކު ޕީއެންއެފްގެ އިސް ސަފުގައި ހަރަކާތްތެރިވާ މަލީހު ޖަމާލު ވިދާޅުވީ އެޖަލްސާ ނިއު ޕޯޓު ސަރަހައްދަށް ބަދަލުކޮށްފައިވާކަމަށެވެ. އެކަމަށް ނަގަންޖެހޭ ހުއްދަތައް ނަގާފައިވާކަމަށް މަލީހު ވިދާޅުވިއެވެ. އަދި މިރޭ ޕާޓީ އުފައްދަން ބާއްވަންޖެހޭ ޖަލްސާ އެސަރަހައްދުގައި ބާއްވާ އެޖަލްސާގައި ނިންމަންޖެހޭ ކަންކަން ނިންމާނެކަމަށް މަލީހު ވިދާޅުވިއެވެ.