ކަރަންޓު މައްސަލަ ހައްލުނުވެގެން ހދ. ކުޅުދުއްފުށީ ރައްޔިތުން ހޯމަ ދުވަހުގެ ރޭ މުޒާހަރާކޮށްފައި ވަނިކޮށް ކުޅުދުއްފުށީ ގޭބީސީތަކުގެ އޭޕްރީލްމަހުގެ ކަަރަންޓު ބިލަށް 50 އިންސައްތައިގެ ޑިސްކައުންޓެއް ދިނުމަށް ފެނަކަ ކޯޕަރޭޝަނުން ނިންމައިފިއެވެ.
އެކަން ހާމަކޮށް ފެނަކަ ކޯޕަރޭޝަނުން ބުނީ ކުޅުދުއްފުށްޓަށް ފޯރުކޮށްދޭ ކަރަންޓުގެ ޙިދުމަތްތަކަށް ބުރޫ އަރަމުންދާތީ ރައްޔިތުންނަށް އެކަމުގެ ސަބަބުން ބޮޑެތި ތަކުލީފުތަކާއި ދިމާވާ ކަމަށެވެ. އަދި ކުޅުދުއްފުށްޓަށް ކަރަންޓު ފޯރުކޮށްދިނުމުގައި ދިމާވާ ދަތިތައް ހައްލުކުރުމަށް މަސައްކަތްކުރަމުންދާ ކަމަށް އެ ކުންފުނިން ބުނެއެވެ. އެ ކުންފުނިން އިތުރަށް ބުނީ މައްސަލަ ހައްލުކުރުމަށްޓަކައި އައު ޖަނަރޭޓަރު ސެޓެއް ގެންގޮސް، އިންސްޓޯލް ކުރުމުގެ މަސައްކަތް މިހާރު ވެސް ކުރަމުންދާ ކަމަށެވެ. އަދި ކަރަންޓު ބިލަށް ޑިސްކައުންޓެއް ދިނުމަށް ނިންމާފައިވަނީ ކަރަންޓުގެ ހިދުމަތަށް ބުރޫ އެރީ ކަރަންޓު އުފެއްދޭ މިންވަރަށް ވުރެ، ބޭނުންކުރާ މިންވަރު އިތުރުވުމުގެ ސަބަބުންކަމަށް ވެސް ފެނަކައިން ބުނެއެވެ.
ދޮޅުމަސް ދުވަސް ވަންދެން ކަރަންޓުގެ މައްސަލަ ދިމާވެ، އެ މައްސަލަ ހައްލުނުވެގެން އެންމެ ފަހުން ރައްޔިތުން ނުކުމެ ހޯމަ ދުވަހުގެ ރޭ މުޒާހަރާކޮށްފައިވަނީ ކުޅުދުއްފުށީ ސިޓީގެ ފެނަކަ އިންޖީނުގެ ކުރިމަތީގައެވެ. އެތަނަށް އެއްވެ މުޒާހަރާކޮށްފައިވާ މީހުން ވަނީ ކަރަންޓުގެ މައްސަލަ ހައްލުކޮށް، ކަރަންޓު ކެނޑުމުން މުދަލަށް ލިބުނު ގެއްލުމަށް ބަދަލުދިނުމަށް ގޮވާލާފައެވެ. އަދި ކުޅުދުއްފުށި ރައްޔިތުން ވަނީ ހަލާކުވި މުދާ ހޯދުމަށް ސަރުކާރަށް ގޮވާލާ ޕެޓިޝަނެއް ތައްޔާރުކޮށް އޭގައި ސޮއިކުރަން ވެސް ފަށާފައެވެ.
