ރިޔާސީ އިންތިޚާބަށްވުރެ، މަޖިލިސް އިންތިޚާބުގެ ޓާންއައުޓް ދަށްވޭ
ނޫސްވެރިންގެ ބައްދަލުވުމެއްގައި އިލެކްޝަންސް ކޮމިޝަންގެ ސެކްރެޓަރީ ޖެނަރަލް ހަސަން ޒަކަރިއްޔާ ވާހަކަދައްކަވަނީ
އިންތިޚާބުތަކުގެ ޓާންއައުޓް ދަށްވަމުންދަނީ ކަންބޮޑުވާ މިންވަރަށް ކަމަށާއި، މިއަހަރުގެ ރައްޔިތުން މަޖިލިސް އިންތިޚާބުގެ ވޯޓާސް ޓާންއައުޓް 80 އާއި 70 އިންސައްތައިގައި ހިފެހެއްޓޭނެ ކަމަށް ލަފާކުރެވޭ ކަމަށް އިލެކްޝަންސް ކޮމިޝަން (އީސީ)ގެ މެމްބަރުކަމަށް އައްޔަންކުރުމަށް މަޖިލީހުން ރުހުން ދީފައިވާ، އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުން ހަސަން ވިދާޅުވީ ދިވެހިރާއްޖޭގައި މައިގަނޑު ތިން އިންތިޚާބެއް އޮންނައިރު، މި ތިން އިންތިޚާބުގެ ވޯޓާސް ޓާންއައުޓަށް އެއް ޕެޓާންއަކަށް ހިފެހެއްޓެމުންދާ ކަމަށެވެ. 2008 ގެ ފަހުން މި ބޭއްވުނު ހުރިހާ އިންތިޚާބުތަކެއްގައި ވޯޓުލާފައިވާ ނިސްބަތުން އެކަން ކަށަވަރުވާކަމަށް އޭނާ ވިދާޅުވިއެވެ.
ހަސަން ވިދާޅުވީ ރިޔާސީ އިންތިޚާބަށްވުރެ، މަޖިލިސް އިންތިޚާބުގެ ޓާންއައުޓް ދަށްވާ ކަމަށާއި، މަޖިލިސް އިންތިޚާބަށް ވުރެ ލޯކަލް ކައުންސިލްތަކުގެ އިންތިޚާބުގެ ވޯޓާސް ޓާންއައުޓް ދަށްވާ ކަމަށެވެ. ރިޔާސީ އިންތިޚާބަށް އިޝާރާތް ކުރައްވައި ހަސަން ވިދާޅުވީ ދުނިޔޭގެ ނިސްބަތުން ރާއްޖެއަކީ ރިޔާސީ އިންތިޚާބެއްގައި ވޯޓާސް ޓާންއައުޓް އެންމެ މަތީ އެއްގައުމު ކަމަށެވެ.
މީގެ އިތުރުން ހަސަން ވިދާޅުވީ އިންތިޚާބުތަކުގެ ޓްރެންޑަށް ބާލާއިރު، މިއަހަރު ބާއްވާ މަޖިލިސް އިންތިޚާބުގެ ވޯޓާސް ޓާންއައުޓް 80 އިންސައްތައާއި 70 އިންސައްތައާ ދޭތެރޭގައި ހިފެހެއްޓޭނެ ކަމަށް ލަފާކުރެވޭ ކަމަށެވެ. އަދި ވިދާޅުވީ މީގެ ކުރިން ރޯދަ މަސް ތެރޭގައި މަޖިލިސް އިންތިޚާބު ބާއްވަން ނިންމުމުން ގިނަ ބަޔަކު ކަންބޮޑުވުންފާޅު ކުރި ކަމަށާއި، ގިނަ ރައްޔިތުން ވޯޓުލާން ނުނިކުމެދާނެކަމުގެ ބިރުހީވި ކަމަށެވެ. ނަމަވެސް މިހާރު އެމައްސަލަ ވެސް ހައްލުކުރެވިފައިވާކަން އޭނާ ފާހަގަކުރެއްވިއެވެ. އަދި ވިދާޅުވީ އުންމީދުކުރަނީ ގިނަ ބަޔަކު މި އިންތިޚާބުގައި ވެސް ވޯޓުލާން ނުކުންނާނެ ކަމަށެވެ.
ވޯޓާސް ޓާންއައުޓް އިތުރުކުރުމަށް ކުރަމުންދާ މަސައްކަތްތަކަށް އިޝާރާތް ކުރައްވައި ހަސަން ވިދާޅުވީ އާއްމު ރައްޔިތުން ހޭލުންތެރި ކުރުވުމަށް ދައުލަތުގެ އެކި އިދާރާތަކާއި ގުޅިގެން މަސައްކަތް ކުރަމުންދާ ކަމަށާއި، ސޯޝަލް މީޑީއާ މެދުވެރިކޮށް ވެސް ގިނަ މެސެޖްތައް ފޯރުކޮށްދެމުންދާ ކަމަށެވެ. އިންތިޚާބެއްގައި ވޯޓުލުމުގެ މުހިންމުކަން ބުނެދިނުމަށް މަގުބޫލުކަން ލިބިފައިވާ ފަންނާނުން މެދުވެރިކޮށް ވެސް ޚާއްސަ މެސެޖްތައް ފޯރުކޮށްދެމުންދާ ކަމަށް އޭނާ ވިދާޅުވިއެވެ.
މީގެ އިތުރުން ހަސަން ވިދާޅުވީ 18 އަހަރު ވެގެން އަލަށް ވޯޓުލެވޭ ކުދިންނަށް ޚާއްސަކޮށްގެން ވެސް ސެޝަންތައް ކުރިއަށް ގެންދާ ކަމަށާއި، އަލަށް ވޯޓުލެވޭ ކުދިން ލައްވާ ވޯޓުލުމަށް ޚާއްސަ އިސްކަމެއްދީގެން މަސައްކަތް ކުރަންޖެހޭ ކަމަށެވެ. އެގޮތުން މާލެސިޓީ އަދި އަތޮޅުތެރޭގެ ރަށްރަށުގައި 11، 12 ކިޔަވާ ދަރިވަރުންނަށް މި ސެޝަންތައް ކުރިއަށް ގެންގޮސްފައިވާ ކަމަށް ހަސަން ވިދާޅުވިއެވެ.
ހަސަން ވިދާޅުވީ ވޯޓާސް ޓާންއައުޓް ދަށްވެގެންދަނީ ކަންބޮޑުވާ މިންވަރަށް ކަމަށާއި، މިމައްސަލަ ހައްލުކުރުމަށް ހުރިހާ ރައްޔިތުން އެކުއެކީގައި މަސައްކަތް ކުރަންޖެހޭ ކަމަށެވެ. އަދި ސިޔާސީ ޕާޓީތަކުން ވެސް މަސައްކަތް ކުރަންޖެހޭ ކަމަށް އޭނާ ވިދާޅުވިއެވެ.
ހަސަން ވިދާޅުވީ ވޯޓާސް ޓާންއައުޓް ދަށް މައްސަލަ ހައްލުކުރުމަށް ގައުމީ ފެންވަރުގައި ދިރާސާއެއް ހަދަންޖެހޭ ކަމަށާއި، ރައްޔިތުން އިންތިޚާބުތަކުގައި ވޯޓުލާން އެހައި ފޫހިވާ ސަބަބުތައް ދެނެގަނެ މިމައްސަލައަށް ހައްލެއް ހޯދަންޖެހޭ ކަމަށެވެ. މަޖިލިސް އިންތިޚާބުގެ ފަހުން އިންތިޚާބެއް ނެތި ދެއަހަރު ދުވަސް ލިބިގެންދާއިރު، އިލެކްޝަން ކޮމިޝަނުން މިދިރާސާ ހެދުމަށް މަސައްކަތްތައް ފަށާނެ ކަމަށާއި، އެއްބާރުލުން ބޭނުންވާ ކަމަށް އޭނާ ވިދާޅުވިއެވެ.
