119 ކިލޯގެ ޑްރަގު އުފުލި ގޮތުގެ ސީސީޓީވީ ފޫޓެޖް ދައްކާލައިފި

މާލެއާއި ހުޅުމާލޭގައި ފުލުހުން ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ ތަހުގީގުގައި ހޯދިފައިވާ މައުލޫމާތާއި ގުޅޭ ވީޑިއޯ ޕްރެޒެންޓޭޝަނެއް ފުލުހުން ދައްކާލައިފިއެވެ.

ކުރިއަށް އޮތް ތަނުގައި ކޯޓުތަކުން ނިންމާ ހުރިހާ ބޮޑެތި މައްސަލަތަކާއި ގުޅިގެންވެސް އެ މައްސަލައެއްގެ ތަހުގީގާ ގުޅޭ މައުލޫމާތު ފުލުހުން ހާމަ ކުރަމުން ގެންދާނެކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.

Advertisement

އެގޮތުގެ މަތިން ފުލުހުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ 119 ކިލޯގެ މަސްތުވާތަކެތީގެ މައްސަލައާ ގުޅޭ ތަހުގީގުގެ މަރުޙަލާގައި ހޯދާފައިވާ މައުލޫމާތު ފޮޓޯއާއެކު، ހިއްސާކޮށްފައެވެ. އެގޮތުން ތުހުމަތު ކުރެވޭ މީހުންނާ ކުށާ ގުޅުވާލެވޭ އަމަލުތަކާ ގުޅޭ ފޮޓޯއާއި ވީޑިއޯ އަދި މަސްތުވާތަކެތި އެތެރެކޮށްފައިވާ ގޮތާއި ގުޅޭގޮތުން ފުލުހުންނަށް ލިބިފައިވާ މަންޒަރުތަކާއެކު ފުލުހުން ވަނީ ހިއްސާކޮށްފައެވެ.

ފުލުހުން ދެއްކި ވީޑިއޯގައި ތުހުމަތުވާ މީހުންނާއި ކުށާ ގުޅުވާލެވޭ އަމަލުތައް ވަކިވަކިން ފެންނަން ހުއްޓެވެ.

ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.

މި މައްސަލައިގެ އަޑުއެހުންތައް ކުރިއަށް ދިޔައިރު ދައުލަތުގެ ވަކީލުން ވަނީ މި މައްސަލައިގައި ފެނިފައިވާ މަސްތުވާތަކެއްޗަށް ވަކި މީހަކު ޒިންމާ ކުރުވުމުގެ މިސްރާބަށް ދިފާއުން ދާ ކަމުގެ ތުހުމަތު ކުރައްވާފައެވެ. 

ކަން އެހެން ވެފައި އޮއްވައި ބުދަ ދުވަހު މި މައްސަލަ ނިމުނުއިރު، ކުށް ސާބިތުވެފައި ވެފައިވަނީވެސް އަލީ ޒުބައިރުގެ މައްޗަށް އެކަންޏެވެ. މުޖާހިދުއާއި ސުނައިނުގެ މައްޗަށް ކުށް ސާބިތުވެފައެއް ނުވެއެވެ.

އޭގެ އިތުރުން، މުޙައްމަދު އަކްރަމް އަބްދުލް ޙަންނާން އަކީވެސް މި މައްސަލައިގައި ތުހުމަތު ކުރެވޭ ފަރާތެކެވެ.

ފުލުހުން ބުނީ، އަކްރަމް އަބްދުލް ޙަންނާންވެސް ހިމެނޭގޮތަށް މި މައްސަލައިގައި ހިމެނޭ ފަރާތްތަކުގެ މައްޗަށް ކުށް ސާބިތުވާ މިންވަރުގެ ތަހުގީގެއް ހިންގިފައިވާކަމަށް ޤަބޫލު ކުރެވޭ ކަމަށެވެ.

އެހެންނަމަވެސް މި ޙާދިސާ ހިނގާ ދިޔަ ދުވަހުގެ ހަވީރު އޭނާ ރާއްޖެއިން ބޭރަށް ދިޔަ ގޮތަށް މިހާތަނަށްވެސް އޭނާ އެނބުރި ރާއްޖެ އައިސްފައިނުވާކަމަށް ދިވެހި ފުލުހުންގެ ޚިދުމަތުން މައުލޫމާތު ދެއެވެ.

އޭނާއާއެކު އެ ފްލައިޓުގައި މި ނެޓްވޯކާ ގުޅުންހުރިކަމަށް ފުލުހުން ތުހުމަތުކުރާ އަރުޝަދު ޚާލިދުވެސް ދިޔަކަމަށް ފުލުހުން ބުނެއެވެ.

ފަހުން ލަންކާއިން ރާއްޖެއަށް ޑީޕޯޓްކޮށްލުމުން އަރުޝަދު އެނބުރި ރާއްޖެއައުމުން ފުލުހުން އޭނާ ހައްޔަރުކޮށްފައިވާއިރު، އަކްރަމް އަދިވެސް ރާއްޖެ އައިސްފައެއް ނުވެއެވެ.