ޖަރުމަނުގެ ނާޓްޒީ ސިފައިންގެ ނިޝާނާ ވައްތަރުގޮތެއް ހުންނަ ކަމަށް ބުނެ އާއްމުންގެ ފާޑުކިއުން ބޮޑުވުމުން ޔޫރޯ 2024ގައި ބޭނުންކުރާނެ ޖަރުމަނުގެ ޖާޒީ ނަންބަރު ހަތަރެއްގެ ޑިޒައިނަށް ބަދަލު ގެންނަން ނިންމައިފި އެވެ.

އެޑިޑާސް ކުންފުނިން ޔޫރޯ އަށް ތައްޔާރުކުރި ޖާޒީގައި ޖަހާފައިވާ ހަތަރު ނަންބަރު ފޮންޓަށް ފާޑުކިއުން އަމާޒުވީ ދެ ހަތަރެއް އެއްކޮށްލުމުން 44 ނަންބަރު، ނާޓްޒީންގެ ނިޝާނާ ވައްތަރުވާތީ އެވެ.

ޖަރުމަނުން ވަނީ މި ޖާޒީގައި މިދިޔަ ހަފުތާގައި ފްރާންސާ ދެކޮޅަށް ވެސް ކުޅެފަ އެވެ. ނަމަވެސް ފޮންޓްގެ މައްސަލަ ދިމާވީ އެޑިޑާސް ކުންފުނިން މީހަކު ގަތް ޖާޒީގައި 44 ނަންބަރު ޖަހައިގެން އުޅުމުގެ ތެރޭގަ އެވެ.

މިކަމާ ގުޅިގެން ޖަރުމަނު ފުޓްބޯޅަ ފެޑަރޭޝަނުން ބުނީ ޔޫރޯގައި ބޭނުންކުރާ ޖާޒީ ނަންބަރުތައް ފާސްކުރުމަށް 1 އިން ފެށިގެން 26އާ ހަމައަށް އަދަދުތައް ފޮނުވީ 0އިން ފެށިގެން 9 ވަނަ ނަންބަރާ ހަމައަށް ހުރިހާ ނަންބަރެއް ރަނގަޅަށް ބަލައި ޗެކްކުރުމަށްފަހު ކަމަށެވެ.

ނާޓްޒީންގެ މި ނިޝާނަކީ ދެވަނަ ބޮޑު ހަނގުރާމައިގައި ހިންގި ބޮޑެތި ގަތުލު އާއްމުތަކުގައި އެތައް ބަޔަކު މަރައި ހެދި އެ ޕާޓީގެ ސުޓްސްޓަފަލް ސިފައިންގެ ގްރޫޕުން ބޭނުންކުރި ޖާޒީގައިވާ ލޯގޯ އެވެ. ބުނެވޭ ގޮތުގައި މިއީ ސުޓްސްޓަފަލްގެ ނަން ކުރުކޮށް ބޭނުންކުރާ ދެ އެސް އަކުރެވެ. އަދި ޖާޒީ ނަންބަރުގައި ދިމާވި މައްސަލައާހެދި ޖަރުމަނުގައި އިނގިރޭސި އަކުރުން ދެ އެސް ސްޓައިލްކޮށްގެން ބޭނުންކުރުން މިއަދު ވަނީ މަނާކޮށްފަ އެވެ.

މިކަމާ ގުޅިގެން އެޑިޑާސް ކުންފުނިން ބުނީ ޖާޒީ އާއި ނަންބަރު ޑިޒައިން ކުރީ ޖަރުމަނު ފެޑަރޭޝަނާއި 11 ސްޕޯޓްސްއިން ކަމަށާއި ޒިންމާވާން ޖެހޭނީ އެދެ ފަރާތުން ކަމަށެވެ.

ޖަރުމަނުގައި މި އަހަރުގެ ޔޫރޯ ފުޓްބޯޅަ މުބާރާތް ފަށާނީ ޖޫން މަހުގެ 14 ވަނަ ދުވަހު އެވެ.